Аволь умок Сочи ошсо ютась «Вся Россия – 2025» неень шкань журналистикань XXIX Форумось. Мордовиянь журналистэнь командась, вейсэ региононь Журналистэнь союзонь прявтонть Людмила Резяпкина марто, аволь ансяк кармасть Форумонть участникекс, истя жо сынь тов ускокшнызь «Семья глазами журналистов» фотовыставканть, конась алтазель Кудораськень иентень. Сонзэ ваныцякс ды панжицякс кармасть сонсь Россиянь журналисттнэнь лидерэсь Владимир Соловьев, СЖР-нь секретаресь Роман Серебряный ды медиафорумонь весе инжетне.
Мордовиянь делегациясь весенень казсь викшневкс марто чевте «седейнеть». Истямо казнесь пек кецявтызе телеведущеенть, общественной деятеленть Арина Шараповань, конась алтась понгавтомс налкшкенть од иень кузнэнзэ лангс.
Форумонь вете читне пештязельть мельстуиця вастовоматнеде, кортамотнеде, тонавтнематнеде. Спикертнэнь ютксольть содавикс телеведущейтне, журналисттнэ Арина Шарапова, Антон Степаненко, Гусейн Гусейнов, Мария Ситтель...
Форумонть шкасто евтазельть «10 лучших газет России 2025» пелькстамонь изницятне, невтезельть мастер-класст, фильмат, презентацият. Истя жо казезельть «Вся Россия – 2025» форумонь профессиональной творческой конкурсонь дипломанттнэ ды изницятне. Мордовиянь представительтне сайсть натой 3 дипломт ды вейке 3-це тарка. Изницятнень ютксо: «Известия Мордовии» газетань отделэнь прявтось Валентин Пиняев (сон кармась Россиянь Журналистэнь союзонь конкурсонь дипломантокс), «Эрзянь правда» газетань прявт редакторось Марина Девятова (диплом «Тавла трейл – фестиваль бега с национальным колоритом» специальной репортажонть кис). «Возрождение» газетань корреспондентэсь Карина Кадейкина сайсь колмоце тарка «Лучшая авторская публикация» номинациясонть печатной СМИ-тнень ютксо.
Мордовиянь Журналистэнь союзось ды сонзэ прявтось Людмила Резяпкина кармасть дипломантокс сехте паро фотовыставканть кис. Весе изницятне казезельть Дипломсо, а вана васенце таркань саицятне тердезельть сыця иень Форумонтень питневтеме.
– Мельспаросан минек журналисттнэнь кис! Истянь зняро лауреатт ды дипломантт арасельть зярдояк Союзонть важодеманзо ды Форумонть 29 иензэ перть. Арсян, сынст ламочист карми касомо иеде иес, – мерсь Людмила Резяпкина. – Сы иестэ юты юбилейной Форумось ды, учан, минек журналистэнь делегациясь карми седеяк покшокс ды виевекс.