Суббота, июля 13, 2024
Важное

Июнень 15-це чистэ Дубёнкань райононь Антоновка велесь тешкстызе сядо иень юбилеензэ, конань лувсо ютавтозель «Садо, садо моронь кужос» фольклоронь фестивалесь. Тей пурнавкшность инжеть весе районстонть ды сонзэ томбальдеяк. Фестиваленть шкасто Дубенкань райононь велетнень ансамблятне ды ськамост морыцятне ваныцятнень кецявтызь раськень моротнесэ.

Тесэ морасть Кендень – «Эрзянка», Орданьбуень – «Эрзянь ава», Поводелень – «Лайме», Кобалень – «Надежда», Дубёнкань – «Морамо», Ломатынь – «Чишмя» дуэтэсь ды лиятне. Те фестивалесь Антоновка веленть чачома чистэнзэ кармась алкуксонь казнекс. Тесэ эрьвась варчнинзе раськень ярсамопельтнень. Кияк эзь юта декоративно-прикладной творчествань выставканть-ярмунканть вакска. Эйкакштнень туртов теезель налксемань башка тарка.

Покш инжетнень ютксо ульнесть Дубёнкань райононь прявтось В.Н. Нефёдов, МР-ва Пенсионной ды социальной страхованиянь фондонь Отделениянь управляющеесь В. И. Василькин, конась икелень шкасто важодсь тесэнь школань директорокс, «Центр управления коммерческой недвижимостью» ООО-нь директорось А. И. Василькин, «Сабанчеевское» ООО-нь директорось Д. Н. Игушкин ды ламо лият. Ютксост ульнесть велень эрицятне А. И. ды В. И. Абедкинтнэ – тетясь-авась, конань цёраст неень шкасто СВО-со. Райононь прявтось Виктор Нефёдов велень эрицятненень явшесь Благодарностть ды лия казнеть. Сон тешкстась: «Велень чачома чись – те кенярксчи сеть ломантнень туртов, кить тесэ чачсть-кассть, важодсть ды путсть вийть сонзэ вадрялгавтомга. Эрьвантень Антоновка велесь эсензэ. Кие-бути ледстясы тесэнь эйкакшчинзэ, лиятнень мельс ледить республиканть келес содавикс орожиицятне-лецицятне – Оля баба ды Вера баба, конат ней арасть ютксонок. Монь туртов Антоновкась – те Ленин лемсэ колхозсонть васенце важодема таркам. Тесэ ульнесть васень наставникень. Тесэть од порань сехте валдо ледстнеман…»

Дубёнкань районсо Антоновка велесь ловови пек одокс. Эсь эрямонзо сон ушодызе 1924 иестэ. Васенце эрицянзо састь шабра кезэрень Поводелестэ, конань эрицянзо ламольть, моданзо жо эзть сатно весень туртов. Неть чаво таркатне лововсть Поводеленсекс. Прявттнэ кувать эзть максо те тарканть од эрицятненень, конат натой судястькак мартост. Ды шкань ютазь модась тенст ялатеке явозель. 1924 иестэ васенцекс тей састь вете семият. Сынст мельс пек тусть мазый таркатне. Сыцятнестэ вейке кудонь азорокс ульнесь Антон Фролович Суродеев, конань лемсэ лемдезельгак велесь. Иень ютазь тесэ уш лововсть 17 кудоюртт. 1926 иестэ Антоновканть малас теезель Излань велесь, конань лемезэ тусь тия чудиця Азлань леенть эйстэ. Иень ютазь Антоновканть каршо, овсе кинь трокс, теевсь Залесье колмоце велесь, конань ули эрзянь лемезэяк. Ёвтнематнень коряс, зярдо Поводелень эрицятне кармасть тей само, кист ютась виренть трокс. Зярыя таркань молезь, пачкодсть леентень ды кецязь серьгедсть: «Баа! Уш лейгак тесэ ули!». Истя, келя, те велентень кармастькак мереме – Баужлей. Тесэнь весе эрицятне 1929 иес, колхозтнэнь теемазост, эрясть кардазсо-пиресэ трязьсэнть-кастозьсэнть. Васня эрьва веленть ульнесь эсензэ колхозозо: Антоновкасо – «Красный Октябрь», Изланьсэ – «Излань», Залесьясо – «Колхоз им. Молотова». Башка-башка колхозтнэ эрясть 1950 иес. Мейле колмонест совавтовсть вейкес – «Колхоз им. Молотова». Председателекс кармась С.З. Суродеев. Войнадо мейле тесэ ульнесть 117 кудоюртт, конатнесэ эрясть 650 ломанть. 1958 иестэ Молотовонь лемсэ колхозось совась Поводелень Ленинэнь лемсэ колхозонтень ды кармась сонзэ ветеце бригадакс. Колхозтнэнь шкасто покш невтевксэст ульнесть мушконь, модамарень ды лия касовкстнэнь коряс. 1970-це иетнестэ содавиксчи велентень кандокшнось сюракшов ракшань трямось. Парсте важодицятнень тердтнизь натой Московонь ВДНХ-в, казизь медальсэ, автомобильсэ ды лия питней казнесэ.
Велесэнть коллективизациянь шкасто Абедкинэнь икельце кудосонть панжозель начальной классонь школа, удалцесэнть эрясь сонсь семиясь. 1930 иестэ школанть панжокшнызь икелень кулаконть Пётр Фадейкинэнь кудонтень. 1958 иестэ вейсэндизь колхозтнэнь, строякшность велень куншкакуро, косо ульнесть конторат ды лия общественной таркат. Чувтонь кудонть паломадо мейле стявтозель кирьпецень школась, конань вальмало ютавтовськак неень фестивалесь. Школась велесэнть эрясь 2006 иес, ней тонавтницятнень, конатнеде кадовсть кавто, усксить Поводелень школав. Кода пекстызь школанть, эрицятне эрямо кармасть тукшномо лия таркава. А эдь тесэнь школась нолдась ламодояк ламо содавикс ломанть, конатнень ютксо генералт, профессорт, учёнойть, управленецт... Ней Антоновкасо кадовсть, ловт, сядошка ломанть. Лавкаяк арась, кши ды лия ярсамопельть усксить тей машинасо. Ули ансяк ФАП ды тоско социальной центра, конань панжовтызе тесэнь активисткась Т.П. Волгушева.

Нама, велесь ёмамо лангсо, ансяк истямо вишкине велесэяк улить алкуксонь патриотт, конань тевест вельде велесь эри ды натой моли икелев. Истямокс ловови Антоновка велень ветеранонь организациянь председателесь, трудонь ветеранось Татьяна Петровна Волгушева, кона чачсь-кассь Залесьясо, венчась Антоновкав. Школадо мейле прядсь Н. П. Огарёв лемсэ МГУ-нь филологиянь факультет. Антоновкань школасо роботась 36 иеть, эйстэдест 20 иеть ульнесь завучекс. Тонавтсь рузонь кель, литература ды история. Ламо мель явсь тиринь ёнксонь тонавтнемантень. 1991 иестэ панжокшнось пек сюпав музей. Кода школанть пекстызь, музеесь ютась Поводелень школав. Ды ней те музеенть прявтсо Татьяна Петровнань тейтерезэ – Наталья Ивановна, кона полады аванзо тевенть. «Ней нуцькамгак филфаксо тонавтни. Минек тонавтыцянь цела династия лиси, – паро мельсэ ёвтни Татьяна Волгушева. – Нуцькам лемезэ Анастасия Колесникова. Сонзэ содасызь «Сятко» журналонь ловныцятне. Тосо лиснесть васенце валморонь пурнавксонзо».

Т. П. Волгушевань мелензэ коряс анокстазель истямо покш чиськак. Сень лангс апак вано, авантень уш 72 иеть, свал лаки тевсэ. Иван Петрович мирдензэ марто те шкас кирдить скал ды лия ракшат. Кастсть кавто тейтерть. Вейкесь Поводелень школасо тонавтыцякс роботы, омбоцесь – Дубёнкань маслозаводсо главбухокс.
Татьяна Петровна цела пинге икеле молицятнень ютксоль. Тевтеме аштекшнемс эзь вечке. Ломанть школасо урокост ютавтылизь ды туильть кудов, сон жо поладыль роботамо музеень тевтнень лангсо. Васняяк ардтнинзе весе маласо аштиця велетнень. Арседе тынсь: Поводелень школантень максозельть 1000 экспонатт, конатнень те ёроков авась пурнынзе эсь кедьсэ. Ды эрьвантень эрявсь сёрмадомс сатышка материал! Сондензэ икеле Поводелесэ музей арасель.
Кода школась пекставсь, пекстызь клубонтькак, арасель кодамояк пурнавома тарка. Ды вана ютазь иень тунда ФАП-нть витнизь, залонть жо кадызь. «Мон кода неия, арсезевинь – ды те миненек соццентракс вадря ули. Арсинь сонзэ вешемс главврачонть кедьстэ. Эдь допрок тенек а косо пурнакшновомс, сыре ломанень чинтькак тенек а косо тешкстамс… Главврачось каршо эзь моле ды мирдем марто ушодынек витнемань-петнемань тевтнень, – ёвтни Татьяна Петровна. – Клубс кадовкшность ламо стендэнь, конатнесэ невтевить Ине Отечественной, Афганонь войнатнень участниктне, велень содавикс ломантне… Пек ризнынь ёмамост кувалма. Ды мирдем марто ускинек тей. Лиссь мини-музей, таго пурнынь чакшкеть-мезть ды ней оймемгак кецни теезь тевденть».

Покш чись ютавтовсь мазыйдеяк мазый таркасо. Школанть перька касыть люпинэнь паксят. Сэрей пандопряв чии чопода тусто виресь. Валт арасть, зяро пертьпельга мазычи, мерят, Швейцария перькат. А коштось – ловсонь таркас симемс маштови, кода морасть вейке эрзянь моросонть. Паро бу улевель те школанть аламодо витнемс-петнемс ды панжомс тезэнь райононь эйкакштнень туртов оймсема тарка – кизэнь лагерь. Эдь тесэнь пертьпелькссэнть каштмолема, коштось ванькс, машинань увткак арась. Райцентрадонтькак аволь васоло. Истя велеськак эряволь, аволь ёма.
Чачома чи марто, вишка Антоновка веле! Улезэ манеекс вандынь чить!

Марина Агафонова

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».