Неть читнестэ Марий Эл Республикань Йошкар-Оласо ютась «Ритмы и краски Финно-угрии – 2026» раськеютконь форумось. Сонзэ анокстыцянзо – ФАДН-сь, Марий Эл Республикань Раськень тевтнень, культурань ды печатень коряс министерствась, маринь культурань республиканской центрась, АФУН-нь Од ломанень советэсь ды МарГУ-сь.
Мероприятиясь алтазель ероков од ломантнень туртов. Участниктнеде весемезэ ульнесь 21 ломань, те сеть, кить совить АФУН-нь Од ломанень советэнтень. Инжетне сакшность Московсто, Санкт-Петербургсто, Удмуртиясто, Татарстансто, Самарасто ды Мордовиясто. Минек республикасто якасть колмо ломанть – те «Тавла» образованиянь центрань – 17-це № средней общеобразовательной школань эрзянь келень тонавтыцясь Ольга Дорофеева, М.Е. Евсевьев лемсэ МГПУ-нь студенткась Анастасия Виряскина, мокшонь блогерэсь ды тиринь кельсэ онлайн-курсань ветицясь Оксана Белкина. Кавто чинь перть од ломантнень туртов анокстазель сюпав ды мельстуиця культурной программа.
Форумось панжовсь «Мой финно-угорский стиль» раськеютконь оршамопелень невтемань выставкасо. Седе тов программань весе участниктне явозельть ниле секциява: «Родные языки в цифровом пространстве», «Этностиль в современной одежде», «Этностиль в современной музыке» ды «Технологии вовлечения молодежи в процесс сохранения и изучения традиционной национальной культуры». Весе неть площадкатнесэ чинь перть ютась лезэв важодема.
Форумонь инжетне евтнесть ды невтсть мелень витиця проектт ды презентацият, эрьвась пачтясь эсь региононь историядо, тиринь кельде ды раськень эрямодо. Башка мель явовсь анокстазь проекттнэнень. Саемга, Ольга Дорофеева евтнесь, кодамо важодема сон вети эрзянь келенть ванстомга, кодат од енкст нолды эйкакштнень тонавтомсто. Анастасия Виряскина невтсь зярыя мастер-класст ды евтнесь, кода Мордовиясо ванстови эрзянь ды мокшонь культурась. Оксана Белкина пачтясь мокшонь келень коряс онлайн-курсадонзо.
Форумонь омбоце чистэнть участниктне пурнавкшность промксов, конань лувсо кемекстазельть АФУН-нь Од ломанень советэнть ды Марий Эл Республикань Од ломанень парламентэнть ютксо ялгаксчинь сюлмотне. Форумось прядовсь «Юный гармонист» гармонисттнэнь ды раськень инструментальной ансамблятнень раськеютконь фестивалень-пелькстамонь ваномасо.
Меельцекс тешкстама, форумонь кавто читне участниктненень казсть ежо, конась максы кемема – финнэнь-угрань эрьва раськенть улить поладыцянзо – од ломантне, конатне эрьва чи мелявтыть эсь раськест ды келест кисэ ды теить весементь, ансяк бу покштятнень-бабатнень мельга кадозь сюпавчись ванстоволь седе товгак.
Алена Артемьева
Фотось АФУН-нь
Од ломанень советэнть.