Александр Макарович Доронин – Мордовия Республикань заслуженной (1996) ды народной (2009) писатель, МР-нь Государственной, Мордовиянь комсомолонь ды Мордовия Республикань Прявтонь премиятнень лауреат. 2004 иестэ Россиянь Писателень XIV съездсэ сон кочказель Россиянь Писателень союзонь правлениянь секретарекс. 2000 иестэ саезь куломазонзо ульнесь МР-нь Писателень союзонь прявтокс.
Мартонь 20-це чистэ Покш Игнатбуень Покш Игнатова велесэ ютавтовсь эрзянь содавикс поэтэнтень, прозаикентень, очеркистэнтень Александр Макарович Дорониннэнь алтазь «Доронинские чтения: векторы сохранения культурного кода мордовского народа» регионъютконь научно-практической конференциясь.
Тундонь маней чистэнть мельспаросо сынек аволь умок одкстомтозь, мазылгавтозь модельной библиотекантень, конась кандтни «Превей кудо» (руз. «Умный дом») лементь. Ледстясынек, библиотекась панжозель ютазь иень сентябрясто. Прась уцяска теевемс мартонзо содавиксэкс васенцеде ды сон пек тусь мелезэнь. Экскурсиянть тенек ютавтсь ды домкасто эрьва таркадонть евтнесь Покш Игнатовань муниципальной райононь «Центральная районная библиотека» МБУК-нь прявтось, мазый эрзянь авась Ангелина Ермушева. Мезе ансяк арась те «Превей кудосонть» ды весемесь теезь неень шкань вешематнень коряс. Теде кодаяк евтнетяно башка сермадовкссо.
Дорониннэнь алтазь ловноматнень панжомсто Ангелина Степановна тешкстась, те мероприятиянть ютавтомадо арсемась сась тенст 2024 иестэ. Сынь сестэ ансяк ушодокшность научно-практической конференциянтень анокстамо, кода сась тенст кенярксов куля: сынст библиотекаст изнясь модельной библиотекань теемань коряс конкурссонть. Ушодовсь покш важодема сынст зданиянть одкстомтоманзо коряс. Тевтнень прядомадо мейле кочказель шка: те мероприятиянть ютавтомс Александр Доронинэнь лемензэ ледстнемань читнестэ – тедедень мартонь 17-це чистэ топодсть вете иеть, кода тусь юткстонок Александр Макарович.
– Доронинской ловноматнень прявт тевесь – писателенть сермадовкстнэнь ванстомась. Истя жо Покш Игнатбуень культурань идентичностенть кемекстамось, те таркасонть, косо сермадеесь чачсь ды эрясь, – мерсь Ангелина Степановна. – Те аволь ансяк научно-практической конференция, эли минек енксонь содавикс ломаненть лемензэ ледстямо, те – районсонок тиринь литературантень покш мелень явома ды эрзянь культуранть, койтнень-кирдатнень ванстома.
Тешкстасынек, научно-практической конференцияс пурнавкшность ламо инжеть. Сынст ютксо сеть ломантне, кить парсте содасызь ды вечксызь Александр Макаровичень сермадовксонзо. Неть: Н.П. Огарев лемсэ филологической наукань докторось, финнэнь-угрань филологиянь кафедрань прявтось Юрий Антонов, Россиянь ды Мордовия Республикань Писателень вейсэндявксос совицясь Наталья Рузанкина, «Сятко» журналонь прявт редакторось Людмила Ломшина, Нижегородской областень Большеболдинской округонь Покш Болдинань А.С. Пушкин лемсэ райононь центральной библиотекань методистэсь Светлана Новикова, Александр Макаровичень низэ Полина Михайловна, сазоронзо Анна Пьянзина ды Надежда Чапурина, «Рябинушка» народной ансамбляс совицятне. Истя жо тосо ульнесть «Центральная районная библиотека» МБУК-нь важодицятне, Андрейвелень общеобразовательной школань тонавтницятне ды эрзянь келень тонавтыцяст Галина Дорофеева.
Те мероприятиянть анокстамосо ды ютавтомасо покш путовксост Ангелина Ермушевань ды А.С. Пушкин лемсэ библиотекань раськень ды краеведениянь отделэнь прявтонть Надежда Бочкановань. Истя жо Саранскойстэ тов якась библиотекаресь Марина Майорова. Сынь вейсэ арсизь, кода седе парсте анокстамс ды ветямс те конференциянть, конась путсь ушодкс Доронинэнь ловноматненень, ды седе тов сынст ютавтомс эрьва иестэ. Тень теемс тенст удалась. Дорониннэнь алтазь ловноматне ютасть прок вейке лекстямосо. Весе тов сыцятне седейшкава евтнесть, кодамокс кадовсь сынст ледстнематнес Александр Макарович. Кортасть эрямо кидензэ, а шожда пингедензэ, тейсть анализ сонзэ сермадовкстнэнень. Организатортнэ кенерсть ютавтомо пелькстамо Доронинэнь произведениянзо коряс, косо изницякс лиссь Андрейвелень общеобразовательной школань тонавтницясь Виктория Вирясова (тонавтыцязо – Галина Дорофеева).Теде башка, анокстазель книгань выставка, конась алтавсь Александр Макаровичень шкинемантень.
Седейс токась сонзэ нинть Полина Михайловнань кортамозо, кинь покштояк покш путовксозо Александр Доронинэнь шкинеманзо кастомасо. Сон евтнесь, кода парсте сермадсь ды вечксь тиринь келенть мирдезэ. Валонзо коряс, эрсесь, веньберть сермадсь. Лиясто энялдсь тензэ лездамс произведениятнень печатамо ды эрзянь кельстэ рузонь кельс подстрочникень тееме.
Александр Доронин комсте ламо иень перть ульнесь Мордовия Республикань Писателень союзонь прявтокс. Стихензэ ды очеркензэ лиснесть «Наш современник», «Молодая гвардия», «Юность», «Волга» журналтнэсэ, «Литературная Россия» газетасо. Ютавтозь рузонь, мокшонь, коминь, удмуртонь, маринь, карелэнь, вепсэнь, чувашонь, татаронь кельтнес.
Сон «Чачома енкс», «Од порань валдо», «Велев кись юты седейган», «Родословное дерево» стихень сборниктнень, «Кинть ютасы молицясь» ды «Ялгадо вал» художественной очерктнень, «Кочкодыкесь – пакся нармунь», «Баягань сулейть», «Кузьма Алексеев» романтнэнь автор.
Валентина Юдина
Фототне авторонть.
Аванень
Тон теке сулей монь икелев стить.
Ваннан крестсто снимканть – тень а содават…
Кельме модас допрок одсто туить,
Тосто, авай, кияк мекев эзь саво.
Нусманя каль комась тонь калмот вельксс,
Токши тарадсо таймазкадозь крестонть.
Чуман, авай, чуман, седеень пелькс,
Сень кис, мекс тонеть мон сакшнан чуросто.
Простямак уш, ламоксть инжекс а сат:
То шкам арась, то калмазырденть пелян.
Истя эрси: калмот вакска ютан –
Лия ава сельмень икеле вели.
Сон эрзянь авась ливтимим ломанькс,
Секс сон эри, кода тонгак, оймесэнь.
Тон максыть седей, сон – эрямонь тансть,
Кияк, авай, а чумо, нама, тесэ.
Ней тон удат… Модась чевте тодов
Прят алов путсь, сэтьме аштемат вансты.
Крестонь вановтонть мон сайса кудов
Эсень седейсэ сехте стака канстокс.