Январень 29-це чистэ Владимир Чибиркинэнь прявтсо ютавтовсь Мордовия Республикань Государственной Собраниянь сисемеце тердемань ведьгемень котоце сессиясь.
Сонзэ важодемасонзо ульнесть Мордовиянь Прявтось Артем Здунов, региононь Правительствань, Мордовия Республикань Прявтонь ды Мордовия Республикань Правительствань Администрациянь члентнэ, министерстватнень ды ведомстватнень руководительтне, муниципальной районтнэнь прявттнэ. Депутаттнэ ваннызь промксонь повесткань 25 кевкстематнень.
Депутаттнэ кирдизь Мордовиянь Прявтонть «О государственных наградах Республики Мордовия» МР-нь Закононтень полавтоматнень совавтомадо меленть: кемекставить кавто од госнаградат – Мордовия Республикань Ояксчинь ды «Родительская доблесть и слава Республики Мордовия» ордентнэ.
«Родительская доблесть и слава Республики Мордовия» орденэнть коряс тетятнень-аватнень эйстэ вейкентень арсеви пандомс 200 тежат целковойть.
Специальной военной операциянь ветерантнэнь ды участниктнень муниципальной службав самонть туртов «О регулировании отношений в сфере муниципальной службы» МР-нь Законсонть витезь муниципальной службань должносттнень полавтоманть туртов квалификациянь вешематне (киртязь вешематне специальностень коряс муниципальной службань стажонтень эли специальностень коряс важодемантень, высшей ды главной должносттнень полавтоманть туртов анокстамонь енксонтень, истя жо ведущей, старшей ды младшей должносттнень полавтоманть туртов образованиянь уровенентень).
Совавтозь полавтомат «О разграничении полномочий органов государственной власти Республики Мордовия в области гражданской обороны» МР-нь Закононтень.
Примазь «О молодежной политике в Республике Мордовия» МР-нь Законось.
Законось ванкшны государственной властень органтнэнь ды местной самоуправлениянь органтнэнь од ломанень политикань коряс полномочияст, кемексты од ломантнень марто важодемантень неень шкань енкстнэнь ды теи од инструментт од ломантненень лездамонть туртов. Тешкстазь республикасонть од ломантнень политикань топавтомань прявт енкстнэ ды свалшкань важодеманть туртов вейкине юрось. Закононь кемекстамонь смустесь – теемс од ломантнень политиканть седе практичноекс, панжадокс ды од ломантнень алкуксонь вешемаст лангс нежедицякс.
Истя промкссонть кортавсь «Об обеспечении детей-сирот и детей, оставшихся без попечения родителей, лиц из числа детей-сирот и детей, оставшихся без попечения родителей, жилыми помещениями» МР-нь Закононтень полавтоматнень совавтомадонть.
Арсеви киртямс специализированной эрямонь помещениянь сиведемань договоронь тевтеемань шканть 5 иестэ саезь 3 иес. Те лезды уроз эйкакштненень, кить эрить башка эрямо таркасо, седе куроксто получамс квартира свалшкань пользованияс.
Истя жо ней Мордовиясо теезь муниципальной округт.
Депутаттнэ кирдизь Законопроекттнэнь, конат совавтозь законодательной инициативань лувсо Атюрьевань, Покш Березникень, Покш Игнатовань, Дубенкань, Ельникинь, Ицялонь, Кочкуровань, Ташто Шайговань ды Теньгушевань районтнэнь депутаттнэнь Советтнэнь пельде местной самоуправлениянь территориальной организациянь оптимизациянть туртов. Неть районтнэсэ теевить муниципальной округт, мезесь а полавтсы местной самоуправлениянь органтнэнь ды социальной сферань учреждениятнень – здравоохранениянь, образованиянь, культурань – услугатнень вадрячист.