Четверг, марта 28, 2024
Важное

«Эрзянь правдасо» мон ульнинь сехте од сотрудникекс, зярдо 1963 иень тунда КПСС-нь обкомонь идеологиянь коряс секретаресь А.В. Климкина ёвтызе тенек редакторокс П.П. Борейкинэнь.

Паряк, ськамон а содылияяк сонзэ, куш лемензэ, нама, марсия. Умонь журналисттнэ кортнесть: Покш Игнатовань районсо, келя, сёрмадстомадонть мелявтомс а сави, тосо идеологиянь коряс райкомонь секретаресь Борейкин эрзянь газетанть кисэ свал пшкади. Мейле мизолдозь толковасть: саизь вана Борейкинэнь обкомс – оймамо эйсэнек а кады, звонси, темат ёвтни.

Редакторокс самозо вастозель аволь вейкетьстэ. Веенст талность, омбонст эзть сёпо кенярксост. Минь Н.М. Симдянов марто чатьмонинек, ломаненть, меремс, овсе апак сода. Кие арсесь сестэ, што самай миненек сави роботамс Пётр Прохорович марто сехте кувать, пенсияв туемазонзо?

Ледстяви, виевстэ, крутасто ушодсь Пётр Прохорович редакциянь эрямонь, важодемань лувонть полавтомо. Кой-кинень савсь туемс. Видьстэ меремс, туевтизь. Аволь весе тень марто согласякшность. Вейке ялганть велявтыксэлизь мекев, мекс приказонть сёрмадомадо икеле эзизь кевксте вере аштиця профкомонть – сон тов кочказель. Ялатеке те ломанентень савсь вешнемс лия робота. Паряк, кой-мезенть теемаль ёжо марязь, седе чевтестэ? Од редакторось шканть эзь сатстне, капшась… Полавтнесь отделэнь прявттнэнь, газетань рубрикатнень, мик девизэнтькак – аволь «Весе масторонь пролетарийть, пурнаводо вейс!», но «…вейсэндяводо!». Ды истя эрьва мейсэ: одс, лиякс, седе смустевекс бажась тееме весементь, мезе максовсь газетасо. Лемензэяк «Эрзянь правданть» рисовавтызе одов, седе покшокс ды мазыекс.

Эрси истя: ушоды ломанесь од тев, кирвази сонсь, лиятненьгак сыргавтсынзе. Но вана ютась кой-зяро шка, ды стувтовсь ушодозесь. Миненек, эрзянь журналисттнэнень, куроксто уш неявсь: од редакторось мездеяк а стувтни. Планёркасо, промкссо черьксты мезе-бути, лиясто мик вейке-кавто валт, путсы конёвонть натой аволь кедь маласкак, ды вант, ледстясы тевенть сестэ, зярдо мерезесь уш лиссь кинь-бути превстэ… Чарькодевсь: мериндеряй мезеяк Пётр Прохорович, одс ледстямкат-кевкстнемат иля учне, тейть ды тонсь ёвтак, мейсэ прядовсь. Истямо ладсо кемекстась дисциплинанть.

Тонадовсь: эрьва косо улемстэ, покш промкс те эли командировкав якамсто, башка ломань марто кортамо, марязенть эйстэ ёвтнемс сехте эрявиксэнть. Лиясто келесь а кирди, ёвтавлить бу кодамояк покш начальникень пельде марязь пшти валтнэнь. Пётр Прохорович казямосто пшкади тень каршо:

– К чему, на что? Ёвтадо, мезе миненек, эсенек газетантень эряви.

Истя медьарво ладсо эрьвась бажась кандомо мезе-бути од, лезэв, пештямс газетанть аволь мезде понгсь, но ледстявикс материалдо. Кадык а свал те удалакшнось. Ансяк оймамо Пётр Прохорович киньгак эзь кадно! Икелевгак – эсь прянзо. Лишнойть эзь корта, лабордомат эзь вечке. Ашти столензэ экшсэ озадо, кунсолы, сонсь та-мезть рисови макетэнть лангс.

–Тон мезть таго прят яжат? – ёжовсто мизолдозеви землякозо ды, кода сонсь кортыль, икелень тонавтыцязо, ответсекретаресь Дмитрий Сергеевич Круглов.

– Вана теть вандынь кавто полосань макетт. Ды – култык-култык кавто костылензэ марто эскельди овсе редакторонть малас. Весемева неяви: арась секретаренть мелезэ «яжамс прянть», теинзе макеттнэнь, кода тонадовсь. Опытэзэ, алкукскак, сатышка. Эрявиндеряйть зярыя строчкат – нейке витьстэ машинкас диктовасы ТАСС-нь информациянть.

П.П. Борейкин мизолгады, вадяшасынзе яла эштё кудряв, но уш чурокстомозь ды яла ашолгадыця черензэ, макеттнэнь велявтомо жо а капши. Вечксь сонсь арсеме се шкань номерэнть лангсо, ладсемс-рисовамс газетань полосас уликс материалтнэнь истя, штобу конаськак илязо ёма-кекшеве, эрьвась неявозо ды аволь «лепштя» лиятнень. Тень лезэс – од рубрикатнеяк, а покш, сень кис пек редявикс клишинкатнеяк. Художникесь-ретушёрось Ф.Ф. Леснов, мейле – В.А. Лошкарев эзть аште тевтеме!

Фотокорреспонденттнэненьгак сатыль! Пётр Прохорович эзь вечке пазавань кондят снимкат. Сонсь керсесь-онкстнесь сынст. Чуросто кие редактортнэнь эйстэ маштсь ды вечксь макетэнь рисовамо, кода П.П. Борейкин. Типографиясо минек газетань верстальщикесь Ю.Н. Смирнов, кинень мерильть «ас», музгордськак лиясто. Ансяк а весть видькстакшнось: Борейкинэнь макеттнэ видеть, шождат теемс ды мазыйть. Теске ёвтасынек: самай Пётр Прохоровичень пингстэ васня «Эрзянь правдась», мейле республиканской лия газетатнеяк ютасть сисем колонкасто кавксо колонкань вёрсткас. Макетэнь рисовамо жо ды газетань нолдамо тевентень П.П. Борейкин тонавтсь зярыя ломанть.

Эдь кода эрси: рузонь газетанть наяв ды апак визде покш трибуна экшстэяк главнойкс ловозь, национальнойтнень кой-кить кедезэсткак эзть сайне. Но вана весть, омбоцеде появась эйсэст од, аволь лиятнень кондямо, ды уш а путсак ве ёнов теке жо «Эрзянь правданть». Ков молят, сави видькстамс: эрзятне таго «фитиль» нерькстасть.

Илядо лово прянь шнамокс, ансяк нейгак мельспаросо ледстневи, кода «Советская Мордовия» газетань фотокорось В.П. Тюрин, эсест редактордонть П.В. Шавензовдо пелезь, снимась «Саранск – Ботевград» ояксчинь договоронь сёрмадстыцятнень альбомсто фототнень минек газетас максомс. Те событиядонть монь материалось минек печатьсэ ульнесь васенцекс. Икельдинек лия газетатнень!

Паряк, а ледстявитькак весе ушодкстнэ, конат ульнесть «Эрзянь правдасо» П.П. Борейкинэнь пингстэ. Примеркс, сеске шназель культурань отделэнть мелезэ макснемс газетасо тиринь таркатнеде материалт. Пшкадсть содавикс краеведэнтень И.Д. Ворониннэнь. Ды номерстэ номерс кармасть лиснеме Иван Дмитриевичень ёвтнеманзо, конатнень покш мельсэ ловность сыренек-однэк. Сынь мейле тейсть юр «Достопримечательности Мордовии» сонзэ книгантень.

Редакторось пек кармавтсь «пансемс» информациянть, свежа кулятнень мельга, бажась, штобу седе сеедьстэ газетасонть вастневель «исяк» (лисни, газетань нолдамо чистэнть) валось. Тестэ – «Республиканть чизэ» вейсэнь репортажтнеяк, «Кулят, событият, фактт» ды лия рубрикатнеяк.

Кемекставкшность сюлмавкстнэ писательтнень, учёнойтнень марто. Появакшность «Субутань ловномат», «Бувалань эрямосто», «Ратор атя» ды лият. Умонь писателенть В.И. Радаевень прявтсо кемекставкшнось «Тештине» литобъединениясь, конань участниктнестэ зярыя мейле састь эсенек редакцияв роботамо. Од автортнэнь произведениятнестэ секе-тев максневсть полосат, нолдазель мик цела сборник, мезесь удалась Пётр Прохоровичень ёндо ламодояк ламо виень ды мелень путозь.

Пётр Прохорович лоткавтымизь типографиясо газетанть печатьс сёрмадстомадо мейле стяко аштемадояк – «светс» газетанть сёрмадстомо кармавтызе – тагояк васенцекс! – выпускающеенть, кона роботы чинь ютазь. «Теяк аламо», – кортнесь сон. – «Светс» сёрмадстомась – сонсензэ типографиянь тев».

Минек редакторось ответственностте эзь пеле. Макснесь лангс ваномс а топавтовикс заданият ды отвечась журналистэнть марто вейсэ сонзэ эрьва строчканть кис. Мурнесь, но аштеськак кисэнек. Стяконь алтамот пельдензэ эзинек марсе. Прянь шнамот истя жо. Теиндеряй мезеяк – чатьмонезь. Кода илязо кежиявтне – творческой тевень коряс пшкадицятнень зярдояк эзь керя, эзь лепштя. Бути кинь лангс кемсь, то уш певтеме. Нейгак дивас прат: мекс сон истя апак пеле аравтымим монь, ава ломаненть ды истя одсто, ответственной секретарекс? Сон, нать, тень мондень икеле чарькодизе? Мейле кувать савсь роботамс мартонзо сонзэ полавтыцякс. Видьстэ ёвтаса: школазо ульнесь стака ды казямо. Сень кис лезэв. Пётр Прохорович эсь прянзояк эзь жаля, лиятнень пельдеяк вешсь. Дисциплинась сонзэ туртов ульнесь васенце таркасо. Командно-административной системанть «эйдекс» улезь, промкссо мейсэяк эзь моле Уставонть каршо. Макссь ки одтнэнень.

Ламос сон тонавтсь райононь газетань журналисттнэньгак. Эдь кувать ульнесь Мордовиянь журналистской организациянь прявтокс. Тесэяк – вастовомат, семинарт, кустовой летучкат, рецензият, журналистэнь конкурст. Организациясь пингстэнзэ пек покшолгадсь, виензась.

«Ве таркасо шешкемань» а шожда иетнестэ зярошка вийть путсь Пётр Прохорович, штобу сявордомс минень-сюнонь бюрократонь пирявкстнэнь ды окойники а кемицятненьгак кемевтемс: «Эрзянь правдась» – аволь ансяк «Эрзянь коммунань», но «Якстере тештень» поладкс. Эряволь бу ловомс сонзэ «Чинь стямонь» поладксокскак. Лемезэяк, паряк, полавтомс истямо ладсо.

Ашти мельсэнь: минек газетань кемень тыщаце номерэнть лисеманзо тешкстамсто вал сайсь Никул Эркай. Ды мерсь: «Минек пек паро редакторонок».

Редакторось П.П. Борейкин алкукскак виевель. Г.А. Егоров ладсо эрямосонзо васенце таркасо аштесь партийной ды газетной роботась. Од цёрынекс кармась сёрмалеме райгазетас, тонавтнесь вечкевикс тевенть. Ине Отечественной войнастояк сёрмалесь эрзянь газетав, стихтькак складясь. Аволь улеяк редакторокс, паряк, сёрмадоволь бу седе ламо. Арась, лангозонзо каязь канстонть эйстэ менеме эзь бажа. Седеензэ сеземадо (миокардонь инфарктто) мейлеяк велявтсь редакторонь тевентень.

...Весть та-кода неинь: васодсть кавто фронтовикть, ды вейкесь сюконясь омбоцентень. Толковизе, мекс. Монсь, келя, войнанть педе-пев ютыя, те ялганть икелензэ жо сюконян: сон ульнесь Ленинградской фронтсо, косо, содатано, весемеде стакаль.

Ленинградской фронтсо воевась П.П. Борейкингак. Ёвтнесь, кода блокаданть сеземадо мейле сыненст, од цёратненень, эль-эль кандтневсть тарказост «Русской музеень» картинатне – истя лавшомокшность вачочиденть, стакачиде. Паряк, тосо седеяк кемекстась сонзэ обуцясь, эрямонть питнензэ чарькодемась?

Тагояк бу ледстявлинь некеть валтнэнь, конатнень ёвтынь 1986 иестэ П.П. Борейкинэнь пенсияв ильтямстонзо. Тей, редакцияв, само шкань сестэнь Борейкинэнть бу – ней, перестройкань иетнес! Зяро од тевть ушодовольть бу сонзэ прявтсо!

Редакциясто туемадо мейлеяк Пётр Прохорович пек мелявтсь газетадонть. Ламо шка ютавтсь ветеранонь республиканской советсэ, косо тензэ свал муевильть тевть. Паряк, тагояк кеняркшноволь сенень, што «Чилисема» журналов эрзякс кармась сёрмалеме Лена нуцьказо…

Пётр Прохорович Борейкинэнь седеезэ лоткась чавомадо 1990 иень октябрянь 14-це чистэ. Кулось, кода кортыть, мазый куломасо: сёксень сад-пиресэ, козонь озавтыксэль эштё вейке куро. Озась кудыненть вакссо эзем лангс ды теке сутямсь…

* * *

Кавто редактортнэде, Г.А. Егоровдо ды П.П. Борейкиндэ ёвтнемстэ мелезэнь ледни писателенть Г. Марковонь «Сибирь» романстонзо вейке персонажось – Полянь тетясь Горбиков, велень фельдшерэсь. Подполковниктнень ютксо тензэ мерильть «Глухарь». Меремс, те книганть ловномсто самай мельс сакшнось Пётр Прохорович, мейле – Григорий Антоновичкак. Неть а вейкеть ломантне, кода художественной произведениянь образоськак, молить вейке-вейке ёнов сеньсэ, кода маштсть сынь максозь тевенть седейшкава тееме, эстест кодамояк лезэнь апак учне, апак вешне, прянь апак шна. Теньсэ несть эрямонь смустест. Сюкпря тенст. Седе ламо бу истятнэде неень пек а шожда шкастонть! Эно а стувтсынек лемест.

Татьяна Ковалева,

журналист, Россиянь ды Мордовиянь культурань заслуженной роботник.Саезь «Эрзянь правда» газетасто,

1991 иень июлень 25-це чи.

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».