Четверг, июня 17, 2021
Важное

Шумбрат, вишка ловныця! Течи кортамонок карматано ветямо ракшатнеде. Васняяк, ёвтык, кодат ракшат содат?

Те кевкстеманть каршо ламо эйкакштнень превс васняяк сыть истят ракшатне, конатне эрить эсест маласо: кудосо, кардазсо. Кинь-бути мельс сеске леди ниле пильгсэ оязо – кисказо, лиятне кармить ледстнеме лия ракшатнень лемест: скал, лишме, сея, реве, туво ды истя седе тов. Кой-кить сельмест икеле неить эрьва кодамо тюсонь нимилявтнень, медень пурныця мекштнень, свал та-ков капшиця коткудавтнень. Весе сынь совить ракшань масторов.

Ракшатнеде наукантень мерить зоология. Те – биологиянь таго вейке пелькс.

Ракшатне явовить пек ламо кужова (группава). Эрьва группасонть зярыя видэнь ракшат. Учёнойтне содыть малав 1 миллион 500 тёжат видэнь ракшат. Миллиондо ламотне эйстэст – сукст-унжат (насекомойть). Калтнэде содыть малав 20000 видэнь, модань-веденсетнеде – 3400, пресмыкающейтнеде – 6000, нармунтнеде – 8600, идем ракшатнеде – 4000.

Ды ялатеке учёнойтне содасызь аволь весе ракшатнень, конат эрить Моданть лангсо. Лиясто мукшныть од видэнь ракшат, сехте сеедьстэ истятнэнь ютксо – сукст-унжат.

 

Кода чачить

ракшатне?

 

Велесэ эриця эйкакшось, секень вант, некшни, кода чачить ракшатне. Скалось вазыи, реветне ды лия ракшатне левксыить. Истямо ладсо моли идем ракшатнень чачомасткак. Сынь левксыить левкст ды андыть эйсэст ловсодо. Секс сынст лемдить млекопитающейкс.

Седе ламо ракшатнень левксэст чачить тунда. Ривезенть сынь эрить пизэсэ, уронть – чувто ундосо эли чувто лангсо пизэсэ, нумолонть – куракш ало анеявома таркасо. Ривезь ды ур левкстнэ чачить сокорокс ды лавшокс. А вана нумолонь левкстнэ ансяк кенерить чачомо, секе чистэнть уш неить ды маштыть якамо. Неицякс чачить миянь (рузокс – бобёр) левкстнэяк. Пек куроксто сынь тонадыть укшномо. Нама, зярдо сынь тонавтнить укшномо, мельгаст ваныть тетяст-аваст. Тетятнень-аватнень ёндо мелявксось эряви весе лия ракша левкстнэненьгак.

 

Кить мезде вечкить ярсамо?

 

Кудонь ракшатне, арсян, содат, мезде ярснить. Малав весе сынь ярснить касовксто. Скалось, лишмесь, сеятнень марто реветне, тувось – весе сынь ярснить седе, мезесь касы мода лангсо. Юткстост ськамонзо псакась кундси чеерть, саразтнэ, видьмеде башка, вечкить таргсеме мода потсто сукскеть ды унжинеть.

Ракшатненень, конат ярснить касовксонь ярсамопельде, мерить касовксто ярсыцят. Сеть ракшатнень, конань ярсамопелест унжат, лемдить унжадо ярсыцякс. Седе покш ракша лангс кайсевить сывельде ярсыця ракшатне (хищниктне). Насекомойтнень, конат сэвить вейкест-вейкест, истя жо ловить хищникекс. Улить, окойники, эрьва мезде ярсыцят.

Идем ракшатнеяк ярснить эрьва мезде. Саемс нумолотнень. Сынь ярснить чувтонь (поень) керде. Теде башка, нумолотне, кода сёрмадыть эрьва косо, вечкить капста, пурькат (морковт). Эсензэ нумолонть сеедьстэ кундасы ды сэвсы верьгиз.

Вирень чеертне ярснить сэрядо. Сынсест чеертнень лангс кайсевить покш пря корштне. Истямо ладсо тееви ярсамонь рисьме: тумо – вирень чеерь – покш пря корш.

Ярсамонь рисьметне ушодовить касовкстнэстэ. Те – васенце сюлминесь. Рисьмень омбоце сюлминесь – тикшеде-лопадо ярсниця ракшатне. Колмоце сюлминесь – насекомойде ярсниця ракшатне (хищниктне).

 

Мезес маштыть

ракшатне?

 

Кортыть, масторлангсо весемеде превей – те ломанесь. Те истя улияк. Теке марто ракшатнеяк ламо мезес чарькодить ды маштыть. Сайсынек кискатнень. Сынь пек шождасто тонавтовить эрьва мезень тееме.

Вирьсэ эриця ракшатнеяк маштыть косо кода ветямс прянть. Ривезенть а стяко ловить ёжовокс. Сэтьместэ якамось, парсте марямось, пшти пейтне – весе те лезды сонензэ ярсамопелень кундсеме.

А вана те – покш пря корш. Сонзэ сельмензэ пек парсте неить веть ды чить, чевте толганзо кувалма а маряви ливтямсто, пшти кенжензэ ды мендязь виев нерезэ лездыть тензэ кирдемс кундазь чееренть ды ярсамс.

Мезть кортамс, хищниктне парсте маштыть ярсамопелень мукшномо ды кундсеме. Сеть ракшатнеяк, конатнень сынь кундсить, маштыть ванстомо эсь прянть. Нумолось пек эрязасто чийни – сонзэ стака кундамс. Нумолонть иди оршамонзо тюсоськак: кизна – сёрмав, тельня – ашо. Сееленть вансты салмуксов оршамозо.

Сеель

Вирьсэ вейке ракша эри,

Яки – киринекс кевери.

Сонсь вишкине, чова нерне,

Алка пильге, а покш сэрне.

 

Салмукст ланганзо поволезь,

Сэтьме шкасто сынь новолезь,

Токамс сонзэ снартат зярдо,

Сеске салмукстнэ стить стядо.

 

Сонсь сеск велявты киринекс,

Пильгтнень эсензэ ды приненть

Кириненть потмос кекшсынзе,

Кувать пекстазь сынст кирдьсынзе.

Кодак юты лембе кизэсь,

Теле лангс мади эсь пизэс.

Тундось сы, одов сыргози,

Ярсамс вешнезь, котьми-ози.

 

Ломань ладсо кешни, вешки,

Нармунекс кернеме вечки.

Ярсни унжат, сукст ды сэрят…

Сеель тензэ эрзякс мерить.

(Р. Щанкина)

 

Насекомойтнеяк пряст ванстыть лангозост каявицятнень эйстэ – метьказтнэнь, насекомойде ярсниця нармунтнень ды лиятнень эйстэ. Пакся тастанть (рузокс – кузнечик) иди пиже тюсозо – тикше потсо а неяви. Маней патясь, мекевлангт, сельмс каяты эсензэ мазый тюссонзо. Истямо ладсо сон тандавтни сетнень, кить анокт сэвемензэ: «Ванодо, мон а маштован ярсамс! Илямизь токше!»

 

Ули-арась лезэст

кежей идем ракшатнень (хищниктнень)?

 

Ракшатне эрсить касовксто ярсыцят, насекомойде ярсыцят, весемеде ярсыцят ды кежей идем ракшат (хищникть).

Ломантне редизь: тосо, косо эзть кадово кежей идем ракшат, касовксто ярсыця ракшатне – нумолотне, идем тувотне, сярдотне, вирьсаразтнэ – васня ламолгадыть, мейле, мекевлангт, кармить яла седе аламолгадомо. Мекс?

Тувталось вана мейсэ. Кежей идем ракшатне васняяк кундсить сэредиця ракшатнень. Шумбратнень ды виевтнень сыненст стака кундамс ды изнямс. Тосо, косо чавнозельть кежей идем ракшатне, касовксто ярсыцятне кармасть сэредеме эрьва кодамо ормасо ды кулсеме. Лисни, кежей идем ракшатне – пертьпельксэнь санитарт.

Содазь, ривезтне ды покш пря корштне ярснить чеерде ды мода потсо лия ракшадо, конат вечкить пореме паксятнесэ зёрнанть. Вейке покш пря коршось кизэнь перть иди тонна зёрна!

Кежей идем ракшатнень ды нармунтнень ней кармасть ванстомо. Ломантненень эрявить ванстомс насекомойтненьгак, ютксост салмуксоньзалытнень (рузокс – стрекоза), маней патятнень (рузокс – божья коровка).

Салмуксоньзалытне кундсить ламодояк ламо сеськеть ды карвот, маней патятне – чувтонь сэвиця сийтнень (тлянть). Теде башка, идем ракшатнень ванстыть секскак: весе сынь пек мазыйть. Ванстомс сынст – те, лисни, ванстомс пертьпельксэнть мазычинзэ. Саемс истят ракшатнень, кода чомболксось (руз. – ласка), чинемесь (руз. – куница), чарась (руз. – выхухоль). Ламо таркава сынст кундсить мазый ды питней киськест кисэ. Секс ней вастневить пек чуросто. Чаратне натой пачкодсть ёмамос. Сынь сёрмадозь Якстере книгас.

 

Чомболкс,

чинеме ды чара

Чомболкс, чинеме ды чара…

Кодат ансяк ракшат арасть.

Вирьсэ-паксясо эрицят,

Ведьсэ укшныцят, ливтницят.

 

Неть колмотне а покшкинеть,

Сэрьскак алкинеть, вишкинеть.

Чарась эри ведь чиресэ,

Чомболксось, чинемесь – вирьсэ.

 

Чомболксонть пекезэ вачи,

Велев сакшны, кардазс варштни.

Мезе тосо ули тантей,

Пулодо кундасы: «Сак тей!»

 

Чинемеськак чомболкс ладсо,

Вирень пизынензэ кадсы,

Сараз юткс инжекс «чопавтни»,

Атякштнень кежест сон савтни.

 

Чаранть мелявксозо вейке:

Кода кастомс левкстнэнь-эйдтнень.

Мазый пек киськензэ кисэ

Ломантне пандыть сырнесэ.

 

Секс ней сынь тестэ а тукшныть,

Лей чирева вешнить-мучкить.

Тень кувалма майси чарась,

Эрямо тензэ ней арась.

 

Чаратне пачкодсть ёмамос,

Сындест кадовсть пек аламо.

Савсь Якстерь книгас совавтомс,

Паряк, те лезды сынст ванстомс.

(Р. Щанкина)

 

Мезекс эрявить

ванстомс ракшатнень?

 

Ракшатне покш лезэ кандыть пертьпельксэнть туртов. Сынстемест ламо касовкстнэ авольть уле ды авольть срадо таркадо таркас.

Ракшатне эрявить ломантнень туртовгак. Ды аволь ансяк сень кувалма, мекс сынст пельде ули ярсамопеленек ды сынст киськестэ стазь лембе ды питней оршамопеленек, секскак, мекс малав весе ракшатне пек мазыйть ды мельстуицят.

Ломантне апак арсе керить виренть, рудазкавтыть лейтнесэ веденть, тень пингстэ, сынськак теде апак арсе, кандыть покш зыян ламо идем ракшатненень, конатнень туртов виресь ды леесь – кудост.

Ней ламо таркава кой-кона чуросто вастневиця ракшатнень кундсемаст кардазь. Конатнень мереви, но аволь свал ды аволь зяро мелеть. Ракшатнень ванстыця таркатне – заповедниктне ды зоопарктне. Истямо ладсо идезельть ламо ракшатне. Ютксост миясь (бобёр) ды соболесь.

Ванстомс эрявить аволь ансяк чуросто вастневиця ракшатнень. Ванстомс эрявить сетненьгак, конатнеде зярс ламо ды конат апак совавто Якстере книгас. Сынст эрямост сеедьстэ ашти сень эйстэ, кода ломанесь вети прянзо пертьпелькссэнть.

Чарькодеви, тапсемс-калавтнемс нармунень пизэтнень, чавномс ватракштнень, кундсемс мода мекштнень, нимилявтнень, салмуксоньзалытнень, сравтнемс коткудавонь пизэтнень – те пек берянь тев, ды сон кардави! Теке марто сестэяк, зярдо истят тевть а тейневить, ракшатненень зыян ялатеке кандови. Вирьсэ весенень эряви маштомс ветямс прянть. Бути тон кармат чийнеме, пижнеме ды шалтонь кепсеме, чувтотнень прява кузнеме – теньсэ покш мелявкс кандат ракшатненень. Истямо ладсо прянь ветямось весемеде покш зыян ракшатненень канды се шкастонть, зярдо сынь левксыямо лангсот, тунда ды кизэнть ушодовомсто.

С т у в т о з ь в а л т:

Вирез – руз. ягнёнок

Максазей – руз. крот

Мия – руз. бобёр

Пакся таста – руз. кузнечик

Салмуксоньзалы – руз. стрекоза

Скирипкай – руз. трясогузка (небольшая птица с длинным, постоянно покачивающимся хвостом)

Чомболкс – руз. ласка

Чинеме – руз. куница

Чара – руз. выхухоль

Чеменькай – руз. селезень

Юмборге – руз. суслик

 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».