Алтави СССР-нь Народной учителенть Степан Ильич Дергачевонь 100 иетнень топодемантень
«Ломанесь чачи аволь сень кис – емамс апак редя челькинекс. Ломанесь чачи сень кис, кадомс эсь мельга пингень тешкс…»
(В. А. Сухомлинский)
Шкась, истя куроксто ливтиця шкась, зярдояк а велявты мекев. Сон саи мартонзо неенсенть – течинь чинть, валонок, чачонок, тамашатнень… Весемесь ванстови ансяк ледстнемасо. Теде башка, мельганок кадовить тевенек.
Модалангонь эрьва эрицясь, те – башка история. Минек Дубенкань буесь – ламо содавикс ломанень чачома енкс, кинь тевест ды валост аштить течинь эрицятненень алкуксонь невтемакс, питнейдеяк питней сюпавчикс.
Превейдеяк превей тонавтыця, эсь тевень содыця журналист, тиринь енксонь ды эрзянь келень вечкиця ломань, краевед, СССР-нь Народной учитель – сон те шкас истямо лемень кандыцятнень ютксо минек республикасо ськамонзо – Степан Ильич Дергачевонь содасызь аволь ансяк тиринь районсо, томбалеяк. Апрелень меельце читнестэ Дубенкань ДК-со ютась покш мероприятия, конась алтазель С.И. Дергачевонь 100 иетнень топодемантень.
Те мероприятиясонть ульнесть Дубенкань буень прявтось В.Н. Нефедов, Степан Ильичень тейтерезэ Мария Степановна Борейкина, Дубенкань буень школатнень прявттнэ, тонавтыцят ды тонавтницят, ламот, кить содылизь ды вечкилизь те ломаненть. Ульнесть тесэ Юрий ды Виктор Дыринтнэяк – артыцятне, кинь тонавтсь сонсь Степан Ильич.
Мария Степановна Борейкина евтась седейшкавань валт, кие сась тетянзо ледстнема мероприятиянтень. Сон тешкстызе: «Школась монь тетянь туртов свал ульнесь васень таркасо. Сон эрясь теньсэ, лексесь эсь вечкевикс тевсэнзэ… Сон ульнесь паро тонавтыцякс, паро тетякс, вадря ломанекс».
Мария Степановна казсь тонавтницятненень, кить изнясть «Эйкакштнень туртов максозь седей» сочинениянь муниципальной пелькстамосонть, Шнамонь коневт ды казнеть.
Валентина Васильевна Шлабина, Кочкурвелень школань прявтось, эсензэ кортамосо тешкстызе, кодамо домка вечкема кандтнесь потсонзо Степан Ильич тиринь эрзянь келентень, эсь школантень, Чачома енксонтень: «Мон аштян каштанчисэ – минек школанок кандтни Степан Ильич Дергачевонь лемензэ. Минь сонзэ прявтсо тонадынек аволь ансяк ловномо ды ловомо – стамо, пидеме, ракша мельга яксеме, мода лангсо важодеме, мекшень кирдеме, тракторонь ветямо, музеень тевсэ котьмамо… Минь течияк теде а стувтнетяно. Свал кирдтяно мельсэ сень, кода сон вечкилизе тиринь келензэ, ды бажатано те вечкеманть максомс тонавтницянок туртов». Сон евтась сюкпря Л.М. Холодкованень, Степан Ильичень тонавтницянстэнь, ды КФХ-нь прявттнэнень – М.Я. Афонькиннэнь ды С.Н. Наумкиннэнь, кить ярмаксо лездасть ютавтомс те покшчинть.
Вана кода ледстнесь эсензэ тонавтыцянзо ланга Василий Николаевич Наумкин: «Степан Ильич муиль эрявикс валт куш покш ломань марто кортамсто, куш эйкакш марто. Минь эринек школа маласо. Тетям сестэ важодсь школань ванстыцякс. Секскак мон школасто, мерть, эзинь тукшнояк. Те ломанесь редясь эрьва эйкакшонть эйсэ, кие ков маштови, кинь кодамо ерокчизэ… Сюкпря тензэ, монь эйстэ несь тонавтыця, кикс мон карминьгак».
Степан Ильич Дергачев чачсь 1925-це иень апрелень 25-це чистэ Кочкурвелесэ сокицянь-видицянь аволь сюпав семиясо. Вишка пингестэ саезь бажась ламо содамо, редясь одонть ды мельспаросо тонавтнесь. Ульнесь нардевекс ды вечкилизе спортонть. Кеме обуцязо неявсь уш вишкинестэ.
Кочкурвелень аволь полной школань прядомадо мейле сон арсесь поладомс тонавтнеманзо седе тов Отяжелень райононь Шейн-Майдан велесэ, мейле уш кармамс тонавтыцякс. Сонзэ пек покшоль мелезэ улемс тонавтыцякс. Ансяк шкатне ульнесть аволь шождынеть, эрявсь кудосояк лездамс, ламо важодемс… Мезеяк лангс апак вано, церынесь ялатеке прядызе тонавтнеманзо ды кармась важодеме тиринь велесэ «Марс» колхозсо бригадирэкс.
Тонавтыцякс улемс мелесь кадовсь покш бажамокс. Сонзэ кардызе 1941-це иень июнень 22-це чистэ войнань ушодовомась.
Ды 1943-це иестэ, ансяк топодсть кемгавксово иеть, Степан лиятнень марто вейсэ тусь фронтов ятонть каршо тюреме.
1946-це иестэ велявтсь тиринь велев. Васняяк важодсь клубонь прявтокс, мейле вельсоветэнь секретарекс.
Ансяк улемс тонавтыцякс меленть ялатеке эзизе кадно.
Ды 1950-це иестэ церась кармась тонавтнеме Саранскоень педучилищасо, конань прядсы шкадо икеле – экстерна, ды седе тов поладсы тонавтнеманзо Мордовской учительской институтсо естественно-географической куросо.
Кавксо иень ютазь, 1958-це иестэ, Степан Ильич Дергачев велявтсь тиринь велень школав тонавтыцякс! Ученикензэ ледстнемга, Степан Ильич тонавтыцясь содась ды маштсь, кода евтнемс эйкакштнень туртов кочказь теманть – чарькодевезэ, ансяк вешематнеяк мейле ульнесть алкуксонь, сон эзь кольневте киньгак.
Школань прявтокс улемстэ, 1961-це иестэ, Кочкурвелесэ кепедезель-стявтозель од школа, конась васенцекс Дубенкань буесэнть ютась башка кабинетсэ тонавтнемас, ды тесэ васенцекс совавтызь тонавтомалувонтень тонавтнемань кувалгавтоманть-продленканть…
1959-це иестэ саезь Степан Ильич тонавтыцянзо ды тонавтницянзо марто ушодыть покш эрявикс тев. Сынь кармить пурнамо музеень материал (сестэ музеесь ульнесь вишка башка классо). 1985-це иень сентябрясто окойники строязель школань краеведениянь музеентень башка кудо. Покш, мазый, козонь кельгстязельть-ладсезельть ламо экспонатт… Сеть иетнестэ Кочкурвелень школань краеведениянь музеесь республикасонок лововсь вадрятнень ютксо, ды теицязоль сонзэ оно кие – сонсь С.И. Дергачев.
Эряви меремс, Степан Ильичень теевксэзэ редязель. Сон казезель Отечественной войнань омбоце степенень, Ленинэнь ды Трудовой Красной Знаменень орденсэ, ламо медальсэ. 1963-це иестэ тензэ максозель «Заслуженный учитель школы Мордовской АССР» лемесь. Сехте питней казнекс жо лововсь 1980-це иестэ «Народный учитель СССР» лемень максомась. Минек республикасо сон кармась васенцекс ды меельцекс, кие кандтнесь те лементь.
Течи Кочкурвелень школасо тонавтыть Степан Ильичень тонавтницянзо, кить пек лембестэ ледстнить эйстэнзэ, кить поладыть сонзэ тевензэ ды весе вийсэ бажить молеме сонзэ енов.
Степан Ильич Дергачев кастсь колмо тейтерть. Покштне – Раиса ды Антонина – поладызь тетяст тевензэ, кармасть тонавтыцякс. Вишкинесь, Мария, тетянзо превс путоманзо коряс, прядсь музыкальной училища. Течи сынст эсесткак уш улить эйкакшост ды нуцькаст, ансяк тетяст валонзо ды превень максоманзо зярдояк а стувтнить.
С.И. Дергачев тусь эрямосто 2002 иень февралень 17-це чистэ. Калмазь Кочкурвелень калмазырьс.
2003-це иестэ, сонзэ ледстнемга, школань зданиянь фасадс понгавтозель мемориальной лаз.
С.И. Дергачевонь чачома чистэ 100 иетнень тешкстамга, Кочкурвелень школань администрациясь ды тонавтыцятне, велень администрациянь ды Дубенкань буень администрациянь прявттнэнь лездамост вельде, истя жо буень ДК-нь важодицятне, анокстасть ледстнемань концерт, косо гайгсть Степан Ильичень вечкевикс моронзо.
Кочкурвелень школань тонавтницятне артсть артовкст – сынь рисовизь сонзэ кудонзо ды портретэнзэ.
Е.Н. Дырина – Кочкурвелень библиотекань прявтось, анокстакшнось С.И. Дергачевонь книганзо ды статьянзо, истя жо сондензэ материал марто мельстуиця выставка.
Те мероприятиянть мельга, весе, кинь ульнесь мелезэ, тердевсть С.И. Дергачевонь прявтсо пурназь-теезь школань краеведческой музеев. Мейле весемень учось тантей каванямо.
Тагояк зярсыя гайгсть лембе ледстнематне…
Алкукскак, ломанесь семс эри, зярс сондензэ а стувтыть. Степан Ильичень лемезэ эри седе тов. Весемесь, мезенть сон теизе, кадозь миненек.
Любовь Дергачева