Воскресенье, июня 15, 2025
Важное
Дубенкань райононь Орданьбуе велев якинек инжекс аволь весть. Эряви евтамс, те велесэнть эрить важодеме вечкиця, эсь тевест вадрясто топавтыця, инжень вастомо маштыця, чевте седей ды панжадо ойме ломанть. Тесэ свал кенярдыть сыцятненень. Теде башка, Орданьбуень ломантне путыть мель эсь раськень койтнень ванстомантень ды эрзянь культуранть вельмевтемантень. Тень коряс ютавтови покш важодема школасо ды эйдень кужосо.
Дока тонавтыцятне евтнить эйкакштненень раськень историядонть ды тиринь келень сюпавчиденть. Истя, аволь умок Орданьбуень школасо ютавтовсь «Свал гайгезэ эрзянь келесь» лем ало лембе вастовома. Сонзэ лувсо ютась эрзянь келень тонавтыцянь семинарось, конасонть минь теевинек содавиксэкс Татьяна Михайловна СУХАНОВА марто.Тонавтыцянь тевесьТе ероков авась – Орданьбуень школасо вишка классонь тонавтыця. Тонавтомань стажозо малав 20 иеть. Татьяна Суханова чачсь-кассь теке велесэнть. Школадо мейле тонавтнесь М.Е. Евсевьев лемсэ педагогической университетсэ (сестэ эште институтоль). Вузонть прядозь, сась важодеме тиринь енксов. Тонавтыцякс важодема таркат сестэ арасельть, секскак од тейтересь кармась роботамо школань библиотекасо. Шкань ютазь лиссь тарка тонавтыцякскак.Кода ледстни Татьяна Михайловна, важодемасонть васенце эскелькстнэнь теемс а шождаль. Сеть шкатнестэ классонть эйкакштнеде ульнесть неень шкань коряс ков седе ламо ды эрьванть марто эрявсь муемс кель-вал. Ульнесть истяткак шкат, зярдо Орданьбуень школасо савкшнось вейсэндямс васенце, омбоце ды колмоце классонь тонавтницятнень, лиякс меремс, школась важодсь кода малокомплектной. Тонавтыцятнень тевест ульнесь ков седе ламо. Неень шкантень жо весемесь арась тарказонзо.– Эйкакш марто важодемасо ламо превс путомат ды содамочить макссь тень эсень васенце тонавтыцям – Надежда Ивановна Биушкина. Ломанесь сон минек велень. Ерокчизэ покшоль, эдь те авась весе пингензэ алтызе тонавтомань тевентень. Ды сюкпря евтан целанек весе школань коллективентень. Эрьвась лездась тень. Весе вейсэ – минь вейке покш семия, – мельспаросо евтни тонавтыцясь.Татьяна Михайловнань валонзо коряс, неень шкань эйкакштнесэ улить редявикс полавтомат. Авась корты, икелень шкань тонавтницятне ков седе ламо мель путыльть покштнень туртов, седе кунсолыцяльть. Ней жо эйкакштне седе ламо мель явить гаджеттнэнень. Содамочитнень мельга пшкалить аволь тонавтыцятненень, кевкстьсызь Интернетэнть. Сон уш зяроце ие весементь лангсо прявт. Лиясто мик арсезеват, паряк, тонавтыцятне а эрявитькак, эдь ней весемесь ули телефонсо. Ды эште вейке покш мелявксось – эрзянь велень эйкакштнень рузыямось. Чарькодеви, те тамашась ломантнень ютксо канды ламо ризнэмат, пиштевтемат.
Ансяк зярс мекс-бути те «ормадонть» эзь муеве лецямопель. Нама, эряволь бу, шкань ютазь эрзятнеде лиядыть кавто-колмо ломанть.
Татьяна Михайловнань классо сисем тонавтницят. Зярдо-бути жо ульнесть кавксть седе ламо. Орданьбуень школав усксить рузонь Петровка велень эйкакшткак. Тень кувалма тиринь келень уроктне школасонть ветявить эрзякс ды секе-тев ютавтовить рузонь кельс. Тонавтыцятне бажить куш кодаяк ванстомс тиринь келенть, тень марто раськенть сыця шкань эрямонзояк.– Эрзянь келень ды литературань эрьва уроконть мон ушодса весенень содавикс валтнэстэ: «Шумбрачи, эйкакшт!». Эрьва эрзянь валонтень путан весе седейлембем, оймеежом. Монь эрьва уроксо гайги мазый тиринь келесь, сонзэ вельде эйкакштнень туртов максовить эрьва кодат содамочить, невтевить ежомарямот. Эрьва урокс анокстамсто прясон кирдян арсема: чиде-чис кастомс тонавтницятнень ловномань ды сермадомань ерокчист, кепедемс мелест вечкемс ды ванстомс тетянь-авань келенть. Тонавтан вечкеме эрзянь келенть, а виздемс тиринседенть, аштемс каштанчисэ. Мон чачинь эрзянь семиясо, свал ледстнян тонавтницян туртов, кода тиринь келенть парсте содамозо лезды пертьпельксэнть ежонзо чарькодемасо ды рузонь келенть тонавтнемстэ. Рузонь эйкакштнень туртов жо евтнян, кодамо сюпав, гайтев ды мазый минек келесь. Арсян, тевем а еми стяко, – корты Татьяна Михайловна.Истя жо минек героинясь пек вечки морамо. Тонавтыцясь вана уш зярыя иень перть морси «Лейне» школань ансамблясо. Сонзэ репертуарсо эрзянь ды рузонь морот. «Лейнень» морыцятне свалшкань участникть республикань куш кодамо кенярксчитнесэ. Ерокчист а весть невтнизь «Шумбрат, Мордовия!» республикань фестивальсэнть-пелькстамосонть. Эрзянь аватнень улить эсест мазый оршамопелест. Сынст вайгелест токить седей, кепедить ежо.

СемиядонзоТатьяна Суханова чачсь велесэ тевде а пелиця кудораськесэ. Тетязо пингензэ перть важодсь механизаторокс, авазо роботакшнось кирьпецень теемань заводсо. Татьяна вишка порасто саезь содасы важодемань танстенть. Тетязо-авазо свал кирдсть покш хозяйства, путнесть покш эмежпиреть. Эйкакшост тонавтсть улемс важодемадо а пелицякс, чевте седей ломанекс. Истямо лув Татьяна Михайловна кирди эсь семиясонзояк. Вечкевикс мирдензэ марто трясть-кастсть кавто церат. Вейкесь эйстэст истя жо кочкизе педагогиканть. Ансяк зярс а важоди те енкссонть. Татьяна Михайловнань кавонест церанзо эрить Саранскойсэ.– Ды тагояк велявтан тиринь келентень. Монь вана кавто церан. Кавонест эрзят. Неень шкасто эрить ды важодить ошсо. Свал рузонь ломань ютксот. Ансяк эсест раськень ды келень коряс визьксчама а кирдить. Мон аштян каштанчисэ сынст кувалма. Эдь келесь ловови раськень сюпавчикс, оймень лисьмапрякс, – тешксты Татьяна Суханова.Содатано, тонавтыцянь тевесь саи ламо шка ды вийть, ансяк Татьяна Михайловна авась эряза, куш ков кенери. Сухановтне кирдить апокшке хозяйства, эрьва ие озавтнить эмежть, кастыть мазый ды покш садпире, косо кодат чувтот ансяк арасть. Кизна Татьяна Михайловнань цецянзо кенярдовтыть весе веленть.
Теде башка, аванть ули эште вейке вечкевикс тевезэ – кудосонзо касты-ташты фиалка ды орхидея цецятнень коллекциянть. Сынст мазычидест абунгадат. Аванть эйстэдест байтяк. Ды кодат тюсонь ды сортонь минек героинясь ансяк а касты!Эряви меремс, Татьяна Суханова – уцяскав ава! Вакссонзо сехте малавикс ломанензэ, ули лембе кудозо ды вечкевикс тевезэ, конась канды эрямозонзо покш кеняркс.Алена Артемьева
 
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».