Кода ванстомс минек кельтнень искусственной интеллектэнть вельде, кода кармавтомс од информационной технологиятнень лездамс тенек, парос эли аволь те вети – теде ды аволь ансяк кортавсь маень 14-15-це читнестэ Московсо «Яндекс» компаниянть штабсо ды Россиянь Раськетнень кудосо «Информационные технологии и языки народов России» II-це стратегической сессиясонть, конанть анокстыцякс ульнесть вере евтазь организациятне ды Россиянь раськетнень тевест коряс федеральной агентствась (ФАДН). Мероприятиясь истя жо ютась коренной раськень кельтнень кемень иетнень тешкстамонть лувсо.
Васенце чистэнть пленарной промкссонть пурнавозтне мельспаросо кунсолызь спикертнэнь мелест. Игорь Баринов тешкстызе: «Масторлангсонть весе кельтнестэ малав 40 процентт емамо лангсот. Те лувонть изнямга Россиясо ламо-мезе тееви этнокультурань сюпавчитнень ды кельтнень ламочист ванстомань коряс. Минь васенцетнень ютксо келень политиканть коряс. Неень шкане, зярдо эрямонтень совасть Интернетэсь, мобильной устройстватне, социальной сеттне ды мессенджертнэ, полавтовсть минек вейке-вейкень марто кортамонь енкстнэяк, ды минь ламо шка ютавттано цифровой пертьпелькссэнть. Секскак вишка раськетнень кельтнень сыця шкаст, сынст касомаст-кепетемаст, нама, пек пштистэ сюлмавозь цифровой среданть марто».
Петр Тултаев кортась седе, минек кельтнень сыця шкаст сюлмавозь цифровизациянть марто, сондензэ ковгак а туят, ды ансяк демографиянть ды школасо парсте тонавтоманть вельде келесь а ванстови. Кода эно тень теемс? Васняяк эряви анокстамс образовательной программат, тонавтомань цифровой пособият, анокстамс чарькодиця кадрат, совавтомс эрьва кодат мультимедийной ресурст, кастомс тиринь кельтнень тонавтыцятнень квалификацияст онлайн-курсатнень вельде, анокстамс келень тонавтнемань туртов приложеният покштнень ды вишкинетнень туртов. Ансяк сестэ минь карматано редямо од ломантнень ендо кельтненень мелень явоманть. Неень шкасто информационной технологиятневтеме те а тееви ды сынь ней аволь кажо – эште вейке енкс, конатнень вельде ванстовить ды кемекставить кельтне.
Минек масторось васенцетнень ютксо келень политиканть коряс. Невтемга, «Россия» телеканалось невти передачат ды вети радиоэфирт 64 ды 58 кельтнесэ, Россиянь раськетнень 58 кельтнесэ лиснить 6,5 тежат газетат, тонавтомась жо ветяви 76 кельтнесэ.
Кода невтизе кельтнень ванкшномась, весе сынь эрить-аштить эсест лувсо ды сынст сыця шкась ламосо ашти кельтнень активисттнэнь эйстэ. Седе паро, зярдо общественниктнень марто вейсэ кармить важодеме IT-компаниятне, коммерческой структуратне. ФАДН-сь вети покш робота, штобу келень ванстомань технологиятне улевельть пачтязь весенень. 2023 иестэ саезь федеральной агентствась парсте сюлмавсь «Яндекс» компаниянть марто ды иень ютазь «Яндекс-переводчик» сервисэнтень уш совавтозель осетинэнь келесь, мелят – коми ды тувинской кельтне, важодемась моли эште 30 кельтнень коряс. Сервисэнтень совавтозь башкирэнь, чуважонь кельтнень кортамотнень чарькодемань ды синтезэнь технологиятне. Седе парсте кармасть ютавтовомо маринь ды удмуртонь кельтне.
Стратегической сессиянь омбоце чистэнть Экспертной группань промкссонть эрзянь ды мокшонь кельтнень параллельной корпустонть евтнесь Н.П. Огарев лемсэ МГУ-нь филологиянь факультетэнь деканось Иван Рябов. Сон тешкстызе, корпуссонть пурназь 120 тежат валонь формат эрзянь кельсэ ды малав 101 тежа валонь формат мокшонь кельсэ. Ней сынь пачтязь Яндекс-сервисэнь специалисттнэнень, ды, бути весе карми молеме парсте, уш те иестэнть эрьванень рузонь кельстэ эрзянь-мокшонь кельс ютавтомасо ды мекевлангт лезды те содавикс площадкась. Эрьва иестэ корпусось карми пештявомо седе ламо валонь формадо ды ютавтоматне кармить седе видеть ды ванькст. Тешкставлинек, базанть пурнамосо таликаст ули Мордовиянь раськень кельсэ сермадыця журналисттнэньгак, конатне ютавтнесть сядодо ламо сермадовкст рузонь кельстэ эрзякс ды мокшокс, ды те сюпавчинть мельспаросо казизь университетэнь ученойтненень.
Мейсэ тенек лезды кельстэ кельс ютавтыцясь, кевксттядо тынь? Васняяк, сон лезды минек ловныцятненень, конатне эли а содасызь келенть, эли аволь вадрясто чарькодить сонзэ. Сермадовксось те сервисэнть вельде сеске карми ютавтозь аволь ансяк рузонь кельс ды мекевлангт, куш кодамо омбо масторонь кельскак. Ансяк Яндекс-ютавтыцясь – те васенце эскелькс, минек кельтненень эрявить эште электронной валкст, кортамонь синтезаторт ды анализаторт, тиринь кельсэ мобильной приложеният ды персональной компьютерэнь программат, грамматикань ванкшномань системат… Ды сы шка, зярдо минек кельтнень туртов лисить «Алисат» эли «Олдайкат» (кода башкиртнэнь «Хомаесь»), ды журналисттнэнь таркас очерктнень карми сермадомо искусственной интеллектэсь. Ансяк те карми, нать, а курок, секскак, ялгат, илядо стувто сермадстомс тиринь «Эрзянь правданть», сон свал тынк марто, вечкевикс ды чарькодевикс!
Марина Девятова