Эрьва кодат профессиятнеде модамасторонть лангсо тежа, паряк, кавксть седе ламо. Важодемань эрьва енксось эсензэ коряс эрявикс ды питней. Масторонть лангсо мезе ансяк арась, ды весемесь те теезь ды арсезь ломанень превсэ. Ютксонок улить истят, кие чачи гениекс, а улить сеть, кинень эряви лездамс муемс ды панжомс эсь ерокчинть. Истямо лездыцякс ды эрямонь смустень панжицякс а стяко ловить тонавтыцятнень.
Тиринь газетань ловныцятнень туртов евтнетяно Дубенкань райононь тонавтыцянь семиянь династиядонть, конанень топодсть 300 иеть. Те трудонь династиясь вейсэндинзе 13 ломантнень, кить эсь пингест алтызь эйкакшонь тонавтомантень. Содатано, улемс тонавтыцякс – те призвания ды седеень тердема. Тонавтомань тевентень вечкемавтомо профессиясонть теемс а мезе. Ды неть валтнэнь кемексты Святкинтнэнь-Ивановтнень тонавтыцянь династиясь.
Династиянь ушодыцятне – мирдть-нить Илья Степанович ды Мария Александровна Святкинтнэ. Илья Святкин чачсь 1920 иестэ Дубенкань райононь Поводелесэ сокицянь-видицянь семиясо. Школадо мейле тусь тонавтнеме Орданьбуень педагогической училищав. Тонавтнеманть прядомадо мейле велявтсь тиринь велев, косо кармась важодеме сисем иень школасо 5–7 классонь тонавтыцякс. Важодемась церанть туртов вечкевсь, ансяк роботамс кенерсь а кувать – саизь армияв. Шкань ютазь ушодовсь зыянов шкась – войнась. Од церась понгсь Ине Отечественной войнань тюремань паксятнес. Нама, тонавтыцянь важодемась кадовсь, мерят, лия эрямос. Войнадо мейле Илья Степанович велявтсь тиринь енксов ды тагояк поладызе тонавтыцянь кинть: кармась важодеме Поводелень лавшо шумбрачи марто эйкакшонь школасо. Секе жо шкастонть вастызе Мария вечкевиксэнзэ. Зярыя шкань ютазь од ломантне налксесть свадьба. Чачсь эйкакшост. Тонавтыцянть ерокчинзэ ды маштомачинзэ сеске редизь сестэнь райононь прявттнэ. Ды шкань ютазь Илья Святкин кармась Поводелень сисем иень школань прявтокс. 1951–1966 иетнестэ Илья Степанович роботась Кочкуровань райононь Воеводское ды Вирь ало Тавла велетнень, Орданьбуень Куцян велень ды Дубенкань райононь Кенде велень сисем иень школатнень прявтокс. Мария Александровна низэ ульнесь алкуксонь декабристкакс, ве чияк эзь явовкшно мирдедензэ, свал ульнесь мартонзо. Авась важодсь секеть школатнесэ, косо ульнесь прявтокс Илья Степанович. Мирдть-нить Святкинтнэ свал ульнесть ломантнень туртов вадря невтемакс, эдь сынь виев ды ероков тонавтыцяльть, теде башка, семияст вечкицяль ды кемель. Ансяк лиясто эрси истя, валдо ды маней эрямонть токи зыянось. Истя, 1967 иестэ Илья Степанович тусь эрямостонть, сонензэ ульнесть ансяк 47 иеть. Тувталокс кармась войнань шкасто ранявомась, конась эрямонь перть секе-тев ледстневтсь эседензэ. Илья Святкинэнь важодемань стажозо – 22 иеть, конатнень перть ульнесь теезь аволь аламо вадря тевть. Мария Александровна жо мирдензэ куломадо мейле поладызе школасо важодеманть. Тонавтыцянь профессиянтень сон алтась 35 иеть. Вадрясто важодемань кисэ Мария Святкинанень максовсь «Ветеран труда» лемесь.
Тонавтыцянь династиянь поладыцякс Святкинтнэнь семиясо кармась Лидия тейтерест. Сон чачсь 1949 иестэ. Ды эште пиже тейтерькакс бажась улемс тонавтыцякс. Эдь сельмензэ икеле ульнесь вадря невтема. Тетязо-авазо каршо эзть моле, мекевлангт, пек кенярдсть Лидиянь мелензэ коряс. Школадо мейле тейтересь тусь тонавтнеме Н. П. Огарев лемсэ МГУ-нь филологиянь факультетэв, конань прядызе якстере диплом марто. Университеттэ мейле сась важодеме тиринь Поводелень школав, косо тонавтсь рузонь кель ды литература, теде башка, ветясь продленка. Велев велявтомадо мейле лиссь мирденень. Мирдезэ, Николай Иванович Иванов, истя жо ульнесь тонавтыцякс. Церанть чачома енксозо – Орданьбуень райононь Куцян велесь. Вишка порасто саезь сон вечкилизе спортонть. Школадо мейле кочкизе Физической культурань институтонть, конань прядызе якстере диплом марто. Аламос важодсь эсест велесэ. Шкань ютазь ладизь Поводелень школань прявтокс. Секе жо шкастонть теевсь содавиксэкс Лидия Святкина марто. Од ломантнень ютксо кирвазсь вечкема. Сынь налксесть свадьба. Шкань ютазь чачсь эйкакшост. Николай ды Лидия Ивановтне весе пингест алтызь эйкакш марто школасо важодемантень. Неть кавто ломантнень туртов тонавтомась эрямосонть сайсь покш тарка.
Илья Степанович ды Мария Александровна Святкинтнэнь Александр омбоце цераст низэ Раиса (тейтерьксэнь фамилиязо Русскина) ламо иеть важодсь культурасо. Ды ансяк 1988 иестэ ютась Кенде велень кавксо иень школав, косо роботась воспитателекс, седе тов пионервожатоекс ды историянь тонавтыцякс.
Эрямось мольсь, Святкинтнэнь тонавтыцянь династиясь кассь. Илья Степановичень ды Мария Александровнань чачсть нуцькаст. Вететнестэ нилетне сюлмизь эрямост тонавтоманть марто.
Эдуард Николаевич Иванов – нуцькатнестэ вейкесь, чачсь Орданьбуень райононь Ульяновка велесэ. Од порасто бажась сюлмамс эрямонзо тонавтыцянь тевенть марто. Н.П. Огарев лемсэ МГУ-нть прядомадо мейле важодсь Дубенкань райононь Красино велень школасо. Ансяк те тевсэнть роботась аволь кувать. Эрямосонть лиссь истя, Эдуард Николаевич кармась роботамо инспекторокс зыянс понгозь эйкакштнень марто. Те таркасонть важодемстэ церантень пек лездасть тонавтыцянь содамочитне. Эдь эйкакш марто роботамсто эряви вадрясто чарькодемс ломанень психологиянть, эрьванть марто муемс кель-вал.
Эдуард Николаевичень низэ, Татьяна Викторовна Иванова (тейтерькс Батаршева), истя жо тонавтыця. Аванть чачома енксозо – Покш Игнатовань районось. Н. П. Огарев лемсэ МГУ-нть прядомадо мейле сон кармась важодеме Дубенкань райононь школасо немецень келень тонавтыцякс. Седе тов роботакшнось Покш Игнатовань школасояк. Татьяна Викторовна – ероков тонавтыця, а стяко 2021 иестэ сонензэ максозь «МР-нь заслуженной тонавтыця» лемесь, истя жо авась тешкстазь «Ветеран труда» лемсэ. Теде башка, сон Гете лемсэ немецень культурань центрань стипендиат, Регионъютконь ассоциациянь немецень келень тонавтыцянь член, «Немецкий Ш-А-Г» раськеютконь проектэнь участник. Нурькинестэ – те авась весе виензэ ды седеензэ путы вечкевикс тевентень.
Святкинтнэнь эште вейке нуцькаст – Павел Николаевич Иванов. Сон чачсь Орданьбуесэ. Эште вишка церынекс седейсэнзэ кирвазсь мель – касы покшокс, карми улеме тонавтыцякс. Весемесь истя лисськак. Школань прядомадо мейле Павел кочкизе Ф. В. Сычков лемсэ художественной училищанть. Важодема кизэ ушодовсь Дубенкань райононь средней школасо. Тосо жо теевсь содавиксэкс Мария Павловна нинзэ марто, кона истя жо тонавтыцяль. Течияк мирдть-нить Ивановтне топавтыть вечкевикс тевест.
Седе тов содавттадызь Святкинтнэнь эште вейке нуцькаст – Юрий Николаевич Иванов марто. Неень шкане церась важоди Поводелень администрациянь прявтокс. Теде икеле роботась Поводелень школань-интернатонь прявтокс. Тосо важодсь 2005 иестэнть саезь. Эйкакш марто важодемась аволь шождынетнестэ, тень лангс апак вано, Юрий Николаевич тевензэ вечкилизе. Сон чачсь Поводелесэ, прядызе тиринь велень школанть ды тонавтнесь Саранскойсэ – прядызе Н. П. Огарев лемсэ МГУ-нь географической факультетэнть. Мейле сась важодеме тиринь районов. Ушодсь Кенде велень школасо тонавтыцякс, мейле ютась Поводелень школав, косо ветясь история ды география предметтнэнь. 2003 иестэ ладизь Свиносовхоз поселкань школань прявтокс, кавто иень ютазь – интернатонь прявтокс. Эряви меремс, Юрий Николаевичень низэ, Галина Николаевна, истя жо тонавтыця. Вана уш малав 20 иеть авась важоди логопедэкс Поводелень школасо-интернатсо. Аванть важодемазо кеместэ сюлмавозь эйкакшонь психологиянть марто. А стяко 2013 иестэ тонавтыцясь казевсь МР-нь Образованиянь министерствань Почетной грамотасо. Галина Николаевнадо кортыть, сон алкуксонь профессионал.
Течи Святкинтнэнь тонавтыцянь династиянть полады Игорь Александрович. Неень шкане сон важоди Санкт-Петербургонь школасо. Церанть ундоксонзо Дубенкань райононь Кенде велестэ. Важодема кинзэ ушодызе Антоновка велень средней школасо математикань ды физикань тонавтыцякс. Седе тов ютась Свиносовхозонь школав, косо зярыя иеть важодсь прявтокс. Мейле жо эрямо китне пачтизь Ленинградов. Те ошось кармась церанть туртов омбоце тиринь кудокс. Истя жо Игорь Александрович, тонавтыцянь тевденть башка, топавты школань прявтонь полавтыцянь тевенть. Эряви меремс, Игорень низэ, Анна Сергеевна, истя жо тонавтыця. Авась чачсь-кассь Петербургсо. Тесэ жо прядызе Н.А. Некрасов лемсэ педагогикань колледженть, мейле тонавтнесь Психологиянь ды специальной педагогикань институтсо. 2008 иестэ саезь Анна важоди вишка классонь ды англань келень тонавтыцякс.
Зярс неть лемтнень лангс прядови Святкинтнэнь-Ивановтнень тонавтыцянь династиясь. Ансяк минь кемтяно, шкань ютазь, династиянь ушодыцятнень – мирденть-нинть Илья Степанович ды Мария Александровна Святкинтнэнь правнуцькатнень ютксто муевить истят энтузиастт, конатне поладсызь те кудораськенть важодемань династиянть. Эдь Святкинтнэнь-Ивановтнень важодемань тевест весе шкатнестэ ульнесь ды кадови сехте эрявикс профессиякс. Содатано, тонавтыцятне, воспитательтне ды преподавательтне путыть оймепелькскест эсь тонавтницятненень, максыть содамочить ды эрямонь опыт.
Алена Артемьева