Четверг, марта 28, 2024
Важное

Отяжелень аграрной техникумонь омбоце этажонь вейке стенасонть понгавтозь покш картина. Сон васты весе совицятнень ды, мерят, ёвтни техникумонь важодемань ёнкстнэде. «Ды мезе тесэ истямось?» – мертядо тынь. Ансяк вана те картинанть эсензэ лия ёнов а молиця историязо, конанть минь карминек содамо агротехникумсонть инжекс улемстэ. Ней те историянть ёвтнесынек тыненкак.



Артовксонть техникумонь коридоронь стенантень понгавтызь аволь умок, зярыя иеде икеле. Ды сон истя ладясь те таркантень, мерят, сёрмадозельгак тень туртов. Картинась артозель 1972 иестэ, тесэ невтевить Отяжелень райононь се шкань трудий ломантне.

– Икеле те картинась ульнесь «Сельхозтехникань» (организациясь зярыяксть полавтнизе лемензэ) витнемань-петнемань мастерскойсэ. А колмошка иеде икеле предприятиясь вейсэндявсь «Агро-Атяшево» АО-нть марто. Сестэнь прявтось Александр Валентинович Щемеров максызе артовксонть минек техникумонтень ды ёвтась мель теемс тензэ реставрация. Те тевенть топавтсть минек жо преподавательтне ды тонавтницятне. Вейкесь эйстэст – историянь тонавтыцясь Александр Кузнецов, – ёвтни Отяжелень Аграрной техникумонь специальной дисциплинатнень тонавтыцясь Николай Пыненков. – Мон монськак ютазь пингень 1986 иестэ саезь 1994 иес роботынь «Сельхозтехникасо» ды те картинась, эряви меремс, теевсь малавиксэкс.

– Картинась витневсь-одкстомтовсь малав ие, – полады ялганзо валонзо творческой дисциплинатнень тонавтыцясь Виктор Третьяков. – Сонзэ лангсо артозь алкуксонь ломанть, конатне важодсть сестэ райононь велень хозяйствасонть. Куншкасонть (керш ёндо колмоцесь) – мастерскоень прявтось Виктор Степанович Маскаев. Сон кавтошка иеде икеле тусь эрямостонть, ульнесть тензэ малав 90 иеть.

Картинанть лангсо лия артозтне – истя жо велень хозяйствань важодицят: механикть, мастерт, трактористт, комбайнёрт. Эрьванть рунгозо, чамазо, кедензэ ёвтнить велень ломанень обуцядонть, трудий ломанень а шожда тевденть, пачтить кодамо-бути мелявкс, вандынь чиденть арсема.

Кода ёвтнесь картинань реставрациянь теицясь, Аграрной техникумонь историянь, ОБЖ-нь тонавтыцясь ды кедьчелькевень кружоконь ветицясь Александр Дмитриевич Кузнецов, артовксонтень топодить уш ведьгемень иеть.

– Те картинанть смустезэ – невтемс райононть чачонзо. Те максови ломантнесэ, сынст образтнэсэ. Эйсэнзэ артозь тундо, март ковось, валдо сэнь менель, таркань-таркань ашти мода марто човорявозь рудазов лов. Ды, нама, весемесэнть невтеви важодемань шка.
Реставрациянть шкасто тевс нолдазельть художественной артомапельть, конатнень юрсо ули калонь куя. Ды витнемань-одкстомтомань тевтнень шкасто теезель пек покш робота. Зярдо картинась ульнесь «Сельхозтехникань» мастерскойсэ, лангозонзо пиземеведеськак чудекшнесь, секскак таркань-таркань сон колекшнесь. Весементь савсь одкстомтомс. Ды тень коряс картинась чачсь одс. Кода мерсь Александр Кузнецов, реставрациянть теемс пек стака, седе шожда сёрмадомс од робота.

– Картинанть сёрмадыцязо ульнесь аволь эсенек ёнксонь. Раськень коряс – грузин ды сакшнось тей, паряк, инжекс, паряк, тевень коряс, – корты Александр Дмитриевич. – Ней уш лемезэяк а ледстяви. Фамилияськак, паряк, Гавыгадзе эли Гогуадзе (ред. Интернетстэ минь муинек артыця Альберт Гогуадзе. Сон ульнесь масторонь ламот оштнесэ, паряк, Отяжелевгак понгонесь), паряк, кодамояк лия. Киньгак превс эзь кадово.

Куш артыцянть лемензэ ней кияк уш а ледстясы, ансяк свалшкань покш казнекс кадовсь сонзэ картинась, конась ёвтни минек историядонть, икелень шкань эрямодонть. Сон тонавты неень шкань од ломантнень важодемань ды тиринь ёнксонь вечкемантень, патриотизмантень. Неень шкасто те пек эрявикс тев.

Теньс тонавтыть Отяжелень Аграрной техникумсонтькак. Кода мерсь Александр Кузнецов, эсь студенттнэнь сынь аволь ансяк тонавтыть те эли тона профессиянтень, а стувтнить тиринь ёнкстонтькак – кастыть-виевгавтыть тесэнь промыслатнень.

– Минь эсь важодемасо покш мель явтано эсь райононь промыслатнень вельмевтемантень. Тонавтницятнень тонавттано чувто ланга керсемантень, чеканкантень, суликанть марто важодемантень. Истя жо минек ули аволь покш музеенек, козонь пурнатано кезэрень шкань ули-паронть, эрьва кодат теевкстнэнь, – ёвтни Александр Дмитриевич. – Ёроков эйкакштнеде пек ламо, сынь снартнить мезе-бути теемс, бажить тонавтнемс. Ды миньгак мартост тонавтнетяно. Музейсэнек улить ламо роботат, конатне анокстазь сынст кедтнесэ. Неть маштомачитне эрямосонть муить тарка.

Отяжелень Аграрной техникумсо Александр Кузнецов роботы кемень иеде ламо. Теде икеле ульнесь тонавтыцякс Андрелесэ. Эряви меремс, ёроков тонавтыцясь тосояк важодсь эйкакштнень ёрокчист панжоманть лангсо – ветясь кедьчелькевень кружокт. Мейле школанть пекстызь, ды Александр Дмитриевич кармась важодеме техникумсонть.

– Мон чачинь-касынь Отяжелень райононь Сабанцелесэ. Школадо мейле тонавтнинь Ицялонь педучилищасо, служинь армиясо ды теде мейле эштё заочна прядыя Н. П. Огарёв лемсэ МГУ-нь исторической факультетэнть, – ёвтни Александр Кузнецов. – Эйкакш шкасто саезь уш, колмоце классо тонавтнемстэ, башка мель явинь артомантень, тонавтнинь весементень. Монь тетям пек ёроковоль. Артомояк маштыль, чертямояк, кшни марто вадрясто роботыль, ульнесь паро мотористэкскак, комбайнёрокскак. Истя жо кололь налксемасо, стихень сёрмадомасо ды морамосо. Сонсь гармошкаяк теекшнесь. Кадык ульнесь простой эрзянь ломань, ансяк талантонзо эрьва кодатольть. Мон, паряк, сонзэ пельде аламошка те ёрокчиденть саинь.
Ды те ёрокчинть Александр Кузнецов ней бажи максомс эсь тонавтницятненень. Мезе машты тееме, весементень тонавты студенттнэнь.

– Течинь эйкакштне ды од ломантне превейть, ёроковт. Сынь куроксто весементень чарькодить, весементень тонадыть. Улезэ ансяк мель. Минь сынст марто эсь ёрокчитнень эрьва кодамо пелькстамосо невтнетяно ды тиринь техникумонтькак а стувтнетяно. Тесэ пек ламось теезь сынст кедтнесэ. Те кецявты, – полады кортамонзо Александр Дмитриевич.

Эйкакштнень марто важодемасонть техникумонь преподавательтне башка мель явить патриотизмань кевкстематненень. Эрьва ие ардтнить «Штурм 13» пелькстамонтень, косо меельце колмо иетнень перть сайнесть изнямонь таркат. А менстить Спартакиадатнень, максыть ГТО-нь нормативтнень.

– Минь касттано сы шкань воинт. Секскак патриотизмась васень таркасо. Те тевесь пек эрявикс. Тентеме неень шкане ковгак, – кемекстызе Александр Кузнецов.

Юлия Еремина
Фототне Эдуард Ретунскиень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».