Пятница, февраля 03, 2023
Важное
2023 иень январень 16-це чистэ тешкстызе эсь юбилеензэ драматургось, поэтэсь, публицистэсь, режиссёрось, МР-нь Национальной театрань ушодыцятнестэ вейкесь Александр Иванович Пудин.


Александр Пудин – малав 80 пьесань автор, конатнестэ комсте ламотне путозь СССР-нь, Россиянь эрьва кодамо сценатнень лангсо, истя жо васоло ды маласо омбо мастортнэнь сценатнень лангсо.
А. И. Пудин чачсь 1958 иень январень 16-це чистэ Мордовской Пимбур велесэ. Школадо мейле парсте прядызе Саранскоень электронной приборонь техникумонть, мейле – Московонь А. М. Горький лемсэ Литературной институтонь поэзиянь отделениянть. Семинаронть прявтсоль содавикс поэтэсь, Социалистической Трудонь Героесь, Ленинской Премиянь лауреатось Егор Исаев.

Институтсонть 3-це курссо тонавтнемстэ нолдазель «Кода эрят-аштят» мокшонь кельсэ стихень васенце книгазо. Эсензэ ладсевть ды лия автортнэнь, конатнень произведенияст ютавтынзе сон, стихтне лиснесть Литературной газетасо, «Дружба народов» ды «Молодая гвардия» журналтнэсэ. Свал сёрмадсь кавто кельтнесэ: рузонь – те келесь аванзо ды мокшонь – тетянзо.

1987 иестэ сёрмадызе «Чаво кудосо ломанть» мокшонь кельсэ васенце пьесанзо, конась васенцеде невтезель 1988 иестэ Саранскойсэ, Рузонь драмань театрасо. Режиссёрось, конась путокшнызе спектаклянть, ульнесь Московонь Таганкасо сестэнь од режиссёрось, а мейле – Россиянь народной артистэсь, РФ-нь Государственной премиянь лауреатось Сергей Арцибашев; художникесь-постановщикесь ды оршамопельтнень коряс художникесь –Ольга Малягина (Москов ош). Спектаклянтень музыканть сёрмадызе Нина Кошелева, конась ней РФ-нь искусствань заслуженной деятель, МР-нь народной артистка. Путовксось пек вечкевкшнесь ваныцятнень мельс, ды покш питне тензэ максокшность профессиональной критиктне.
Теке жо иестэнть од авторонтень максозель Мордовиянь Ленинской Комсомолонь премиясь.

«Чаво кудосо ломанть» драмадонть мейле Александр Пудин сёрмадынзе эштё кавто пьесатнень: «Анахореты или угол для сирот» ды «Очаг», конатне васенценть марто вейсэ теевсть драматической трилогиякс.

1990 иестэ А. И. Пудин совакшнось СССР-нь Писателень союзс. 1991 иестэ драматургонтень максозель «Мордовской ССР-нь заслуженной писатель» почётонь лемесь.
Александр Ивановичень пьесанзо ламоксть лиснесть «Современная драматургия» журналсонть. 2007 иестэ нолдазель колмо томсо драматической произведениянь вейспурнавксось.
А. И. Пудин – Мордовиянь Национальной театрань ушодыцятнестэ вейкесь, сонзэ васенце художественной руководителесь ды директорось.

2014 иестэ А. И. Пудин аравтозель Ростовонь М. Горькиень лемсэ академической театрань прявтокс, 2016 иестэ те театрань коллективентень максозель Ф. Волков лемсэ РФ-нь Правительствань премиясь.

Александр Пудин – Россиянь искусствань заслуженной деятель, МР-нь народной писатель, МР-нь государственной премиянь лауреат, Москов ошонь премиянь лауреат, Весесоюзонь ды Весероссиянь драматургонь конкурстнэнь лауреат, «Театральная жизнь» журналонь премиянь лауреат, финнэнь-угрань раськетнень театратнень раськеютконь I фестивалень лауреат. Истя жо улить ламо лия казнензэ.

Драматургонть од роботатнень ютксо – Василий Беловонь «Привычное дело» повестензэ коряс пьесась. Ютазь иень октябрясто сон путозель Вологдань драматической театрань сценанть лангсо. Драматургось сонсь ульнесь спектаклянть режиссёрокс-путыцякс. Мейле невтезель Московонь Малой театрасо ды Санкт-Петербургонь «Балтийский Дом» театрасо.
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».