Пятница, марта 29, 2024
Важное

Сон чачсь васоло, Мордовиянь томбале, ды эзь арсеяк, эрямонзо сюлмасы минек республиканть марто. Саранскоенть васенцеде неезь, пек мелезэнзэ туекшнесть ошось ды тесэнь ломантне, конат вастызь мельспаросо. Эряви меремс, минек ёнксоськак кецнесь од тейтерентень. Сон дивавтынзе весень мазый, виев ды лия ёнов а молиця стихсэнзэ.



Татьяна Мокшанова – поэт, лия кельстэ ютавтыця, важоди МР-нь Писателень союзонь правлениянь прявтокс, «Чилисема» эйкакшонь ды од ломанень журналсо ответственной секретарекс. Ды кода вадря, те ломанесь эри ды важоди минек республикасо, теи-топавты паро тевть, касты од сёрмадыцят.

Татьяна чачсь Самарань ёнксонь Шенталабуень Баганя велесэ. Шенталань буесэ эрить човор ламо раськеть: эрзят, рузт, татарт, ветькеть. Эрить покш ояксчисэ, вейсэ тешкстыть кенярксчитнень. Баганя велесь эрзянь. Тейтеренть авазо Мария Павловна ды тетязо Пётр Яковлевич трясть-кастсть вете эйкакшт: Галина, Любовь, Юрий, Александр ды Татьяна. Саша марто Танят – веженсеть, кавтаськеть. Сынь 16 иеде седе вишкинельть Галя патядост. Мартост эрясь ды ламо лездась Прасковья Назаровна бабаст, сон чачокшнось 1911 иестэ. Мирдезэ чавовсь Ине Отечественной войнасо, ськамонзо кепединзе колмо эйкакшонзо. Таня пек вечксь бабанзо, бажась удсемс вакссонзо, аштемс лембе ёжинесэнзэ, кунсоломс, мезде корты, мезе ёвтни кезэрень шкадонть. Патяст-леляст уш покшольть, тукшность тонавтнеме ошов, кудов сынст самось ульнесь покш кенярксокс.

– Школасо тонавтыцянок ульнесть пек парт. Нейгак ледстнян сынст. Васенце классо эйсэнек тонавтсь Вера Николаевна Первова. Пек виевель рузонь келень ды литературань тонавтыцянок Любовь Николаевна Фадеева, сон ойме путсь тевезэнзэ. Школасонок эрсесь эрзянь келень факультативгак. Тонавтнеме вечкилинь, вечкилия школанть. Свал учинь, зярдо прядовить кизэнь каникулатне, истя кувакакс марявсть! Вечкинь литературань уроктнесэ сочинениянь сёрмадоманть, лиясто натой сёрмадылинь сынст стихсэ, – ледстни Татьяна.

Стихень сёрмадомо превей ды ёроков тейтернесь кармась вишкинестэ. Зярдо тензэ ульнесть 11 иеть, «Шенталинские вести» райононь газетасо лиссь васенце публикациязо. Те ульнесь 1995 иесь. Школань прядомс стихензэ нолдасть газетасонть. Весть Танянь тердизь школань библиотекав. Тосо тензэ невтизь «Чилисема» журналонть, косо васенцеде лиссть эрзянь стихензэ ды артовксонзо. Зяро кеняркс ульнесь, а ёвтавияк! Се шкастонть саезь сон седе сеедьстэ кармась сёрмадомо эрзянь кельсэ, тевезэ мольсь парсте. Татьянань тердизь Саранскоев од сёрмадыцянь семинаров.

– Школасо тонавтнемстэ колмоксть сакшнынь авань марто Саранскоев семинаров. Сестэ васенцеде неинь ды теевинь содавиксэкс минек виев поэттнэнь ды писательтнень марто: П. К. Любаевень, И. А. Калинкинэнь, А. В. Араповонь, Ч. Г. Журавлёвонь, Н. И. Ишуткинэнь, А.М. Доронинэнь, К. Г. Абрамовонь ды лиятнень. Ней уш сынь весе тоначисэть…

«Чилисема» журналонь прявтось Н. И. Ишуткин кевкстимим, ков бажан молемс тонавтнеме. Меринь, мелем ули «Журналистикав». Сон каршон истя кортась: «Бути бажат улемс национальной журналистэкс, тонеть седе парсте эряви содамс келенть, мольть эрзянь отделенияс». Кунсолыя. Ды зярдояк эзинь янксе. Группанок покшоль, виевель. Ламо мель явинек тонавтнемантень. Весе теевинек паро ялгакс, ды те шкас ванстовсь ояксчись, – ёвтни Татьяна.

Сон зярдояк эзь аште тевтеме, свал ков-бути чийсь, эрьва ков кенерсь: парсте тонавтнеме, стихень сёрмадомо, пелькстамо студентэнь олимпиадасо. Ульнесь студентэнь группань старостакс, профоргокс. Весе оймсема читнень ютавтсь библиотекасо. Сестэ раськень ды краеведениянь отделэсь аштесь ташто зданиясонть. Молят – таркаяк арась, истя ламо ломанть якильть. Секскак эрявсь пачкодемс ранаяк, понгозо теть тарка ды кадовозо эрявикс книгась. Студенткась яксесь «Зазеркалье» поэтической салонов, конась панжовкшнось Н.П. Огарёв лемсэ МГУ-нть юрсо. Тосо теевсь содавиксэкс творческой ламо ломань марто, кить те шкас кадовсть ялгакс.

– Татьяна, ёвтнек, кода понгить важодеме «Чилисема» журналов?

– 2006 иестэ, ансяк прядыя МГУ-нь филфаконть, Николай Иванович тердимим важодеме «Чилисема» журналонь редакцияв. Нейгак мельсэнь: мольтяно ялгань марто кудов, кандтано дипломонок, конатнень ансяк-ансяк явшизь тонавтнема таркасонок, каршонок куринкаванть моли Н. И. Ишуткин. Шумбракстнинек. Сювордызе кедем, ёвтась паронь арсемат ды мерсь недлянть ушодовомсто самс редакцияв – важодеме. Мелезэнь-превезэнь чаповсь се васень чись. Сынь. Ветимим нупалентень, козо озавтымизь важодеме. Тосо журналонь ответственной секретарень тевенть топавтсь Раиса Степановна Кемайкина (Маризь Кемаль). Николай Иванович сонсь путсь тень столь, ёвтась важодемас кундамга паро валт ды макссь тев – ютавтомс мокшонь кельстэ эрзянь кельс зярыя валморот. Тевезэнь кундынь покш бажамо марто. Колмо иеть вейсэ важодинек Маризь Кемаль марто. Неть иетне ламо мезе макссть тень. Сон тонавтсь монь, путсь превс, ванкшнось мельган. Лиясто кадыль апак витне ильведькст: редясынь-арась сынст, витнесынь-арась. Монь туртов сон теке омбоце авакс ульнесь, – ледстни Татьяна.

2006 иестэ Татьяна Мокшановань лиссь «Эрьгекерькс» васенце книгазо. Те книганть кисэ од тейтересь казевсь МР-нь Прявтонь литературань премиясо. 2010 иестэ нолдазель «Толонь лопат» стихень омбоце пусминезэ. Те шкане сон уш эрясь Кировань ёнкссо, косо вастызе уцясканзо ды пурнась семия, чачсть эйкакшонзо. 2013 иестэ сон велявтсь мекев Мордовияв. Валонзо коряс, кияк эзь арсеяк, эзь учнеяк сонзэ велявтоманть. Ансяк сонсь оймесэнзэ содась – сы мекев.
Аволь умок А. С. Пушкин лемсэ библиотекасо ютась поэтессанть «Оймамо тарка» ды «Кудов ки» кавто книгатнень презентациясь. Сынь лиссть 2022 иестэ. Сакшность малавиксэнзэ, ялганзо, содавиксэнзэ. Зяро ёвтазельть паронь арсемат, лембе валт!

Стихень сёрмадомадо башка, Татьяна варчнесь виензэ рузонь кельс ды эрзянь кельс художественной ютавтомасонть. Рузонь кельс ламо ютавтсь Н. И. Ишуткинэнь, Г. С. Гребенцовонь, П. А. Ключагинэнь стихест ды лиятнень. Сеедьстэ кундсесь лия раськень поэттнэнь произведенияст ютавтомас. Те тевесь аволь шожда. Кадовозо смустесь, ванстовост ламо лия ёнкстнэ, содавозо авторось. Произведениянть, конань бажат ютавтомс, эряви нолдамс эсеть пачк, чарькодемс, вечкемс.

– Ламо ютавтынь Н. И. Ишуткинэнь. Сон вестькак эзь мере тень – тесэ аволь истя ёвтазь, эли тесэ а вечкеви тень. Макснинзе витнемс-ваномс тень «Кочказь произведениястонзо» омбоце ды колмоце томтнень. Шнась эйсэнь, – ёвтни Татьяна.

Ней ютавтомань тевесь Татьяна Мокшановань тусь келей киява. Сон теевсь Россиянь раськень художественной произведениянь рузонь кельс ютавтомань мастер-классонь ветицякс (финнэнь-угрань кельтне), конатне эрсить Московсо. Васня ульнесь участникекс, мейле редизь, кармавтызь улемс мастерэкс. Татьянанень сеедьстэ пшкалить ютавтомс содавикс морот эрзянь кельс.

– Моронь ютавтомасо рифмась – те вейке. Эряви ютавтомс истя – моравозо. Зяро слогт аштить строчкасонть, зняро жо теемс ютавтозесэнть. Кадовозо смустесь. Эрзянь келесь пек паро тень коряс. Сон моравиця, эйсэнзэ ламо гласной гайтть. Минек кельсэ валвачкодьксэсь (ударениясь) путови куш ков! Ютавтомань коряс мастер-класстнэсэ свал дивсить минек келень те башкачинтень ды натой сельмест сявадыть. Кой-кона кельтнесэ валвачкодьксэсь пры меельце слогонть лангс.

– Татьяна, косто чачсь эйсэть поэзиясь? Арсить теде?

– Авань ёндо покштям ладсиль нурька морот ды морыль эйсэст. Ашти-ашти – мезеяк морамо карми. Сон кулось умок, мон эштё эзинь чачне. Нина Павловна патянок ульнесь, сондензэ мерилинек «якиця энциклопедия». Ней сеедьстэ ледстнетяно эйсэнзэ, мекс эзинек сёрмале мельганзо? Сон содылинзе велень весе ломантнень, кие зярдо чачсь, кинь марто тонавтнесь, кить кода малавикст вейкест-вейкест туртов. Содыль ламо историят ды мельстуезь эйсэст ёвтниль. Авам мериль, те покштястот тонеть ютась, – ёвтни минек героинясь.
2022 иень кизна авазо апак учне тусь эрямосто. Те ульнесь покш вачкодьксэкс. Мария Павловна ансяк тешкстакшнызе 75 иень юбилеензэ. Кияк эзь арсеяк, те эряза ломанесь истя курок туи юткстонок. Мария Павловна свал мель путсь эйкакшонзо весе бажамотнес. Эрьва мейсэ лездась. Мирдезэ кулось 54 иесэ, сон ськамонзо трясь-кастсь вете эйкакшост, вишкатненень эзть топодекшне 10 иетькак. Сеедьстэ сакшныль инжекс Саранскоев. Аванстэнь Татьяна алтась зярыя стихть.

Рузтнэнь ули истямо валмеревксэст: «Талантливый человек талантлив во всём». Неть валтнэ пек ладить Татьянанень. Поэзиядо башка, сон машты парсте кодамо, викшнеме, стамо. Декретсэ улемстэ кедезэнзэ понгсь кодамонь коряс журнал. Сон варчась кодамо. Рамась эрьва кодат спицат, суреть. Ды ушодсь! Мезть ансяк эзь кода: эстензэ ды малавикстнэнень палят, джемперт, эйкакштненень оршамопельть. Викшнесь крёсткесэ картинат. Ней вейкеяк эзь кадово кедезэнзэ, весе казнинзе. Мейле М. Кемаль мурнезь кевкстизе, мекс а сты-викшни эстензэ эрзянь оршамопель? Сон рамась покш коцт, суреть-салмукст. Васня стакаль, маняват – тейсак одс. Ансяк Татьянань истямо обуцязо – бути теемс мезеяк – теемс ансяк парсте! Истя сон моли эрямованть. Зярыя иеть викшнесь оршамопелензэ, аволь свал кадовкшнось юткошка. Мертядо, сизесь? Эзь! Сон марясь покш кеняркс, зярдо топавтозель покштояк покш тевесь. Ней теи-пряды пулаензэ, косо кармить иневедень кумбрят ды советской шкань чова ярмакт.

2021 иень октябрясто Татьяна Петровнань кочкизь МР-нь Писателень союзонь правлениянь прявтокс. Те союзсонть ней 53 члент. Икеле учить покш тевть. Арсеви седе кеместэ важодемс од ломантнень марто. Кода корты Т. П. Швецова (Мокшанова), бути а касттано эсенек мельга ломанть, поладыцянок а улить, весемесь керяви. Секскак эрявить теемс паро сюлмот школатнень, библиотекатнень марто, учовить писательтнень марто вастовомат районтнэсэ.

Савкшны ансяк дивсемс, косто зняро вийть сайни те мазый, превей, чевте седей тейтерь-авась. Валонзо коряс, эряви чачомс истямо обуця марто. Вечкемс эрямонть ды улемс валдо ломанекс, эрьва косо неемс ансяк паро – истямо койсэ моли эрямованть Татьяна Мокшанова. Истямо лувс тонавты эйкакшонзояк. Михаил тонавтни 7-це классо, Маргарита – 5-цесэ. Сон зярдояк стяконь кисэ а сёвны сынст, а кармавты тонавтнемс ансяк «ветес». Тонавты тевде а пелеме, лиянень мелень путомо ды лездамо, лиятнеде парсте арсеме. Истя, кода эсензэ тризь-кастызь, покш вечкемасо. Корты эйкакшонзо марто эрзякс. Бажи кирвазтемс эйсэст тиринь келень вечкемантень сяткине, конань кандсызь эрямост перть.

Татьяна Маторкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».