Эрзянь ды мокшонь раськень регионъютконь общественной вейсэндявксонь президиумось ютавтсь промкс Темниковасо. Инжетне якасть Рождество-Богородичной Санаксарской монастырев, косо тенст невтезель экскурсия, ванкшнызь Советской Союзонь Героенть А. И. Семиков лемсэ Темниковань общеобразовательной школань «Этно-кудо» музеенть, Темниковань центральной районной библиотеканть, косо невтезельть тиринь келень тонавтомань неень шкань технологиятне. Раськень художественной промыслань ды ремеслань кедьчелькевтне анокстасть выставка.
Промкссонть кортамось мольсь «Мордовия Республикасо раськень культуранть, государственной кельтнень ды лия кельтнень ванстомась ды виевгавтомась» государственной программанть топавтомадо. Теде пачтясть МР-нь Прявтонь ды Правительствань Администрациянь Руководителень полавтыцясь, Внутренней политикань управлениянь прявтось А.В. Ратников, МР-нь Культурань, национальной политикань ды архивень тевень министерствань раськеютконь тевтнень коряс отделэнь прявтось А. М. Кочеваткин, муниципальной райононь прявттнэ ды лият.
Пурнавозтненень лембе вал марто пшкадсь Темниковань райононь прявтось О. Н. Радайкин. Вал сайнесь Эрзянь ды мокшонь раськень регионъютконь общественной вейсэндявксонь прявтось Ю.А. Мишанин. Сон тешкстызе, раськетнень духовной сюпавчитнень ванстомась, минек культурантень лездамось, национально-культурной вешематнень топавтомась – организациянть прявт тевезэ. Образованиясо ды культурасо этнокультурной ёнкстнэнь совавтомадо пачтясть Мордовиянь районтнэстэ сазь инжетне. Истя, Д. М. Шиндаков кортась Теньгушевской районсо эриця эрзятнень келест ды культураст башкачидест, ёвтнесь «Шокшунь Адий» кенярксчиденть. Сонзэ пароль бу ютавтнемс эрьва иестэ. Кортасть рузонь-шокшонь келень валксонь нолдамодо.
Кодат тевть ды вешемат аштить Исполкомонь местной отделениятнень икеле, теде кортась Исполкомонь председателесь Т. И. Ларина. Сон ледстизе, районтнэсэ организациянь местной отделениятне – Исполкомонь подразделеният, сынст коряс Эрзянь ды мокшонь раськень регионъютконь общественной вейсэндявксось кемекстась Положения.
Президиумось кемекстынзе общественной вейсэндявксонь местной отделениянь прявттнэнь, неть: М. П. Уткина (Темникова), Д.М. Шиндаков (Теньгушева), О.С. Козяйкина (Атюрьева). Промксось прядовсь Вирень Цибаева велень «Мордовский» этно-кудосо, косо инжетнень вастсть гайтев моросо ды раськень каванявкссо.