Февралень 15-це чись минек масторсо – ледстнемань чи Россиянь эрицятнеде, конат топавтсть служебной тевест масторонть томбале. 1989 иень те чистэнть советской войскатне ливтезельть Афганистансто. Тосо тюремась мольсь вейксэ иень перть. Мордовиясто саезельть малав колмо тёжат ломанть. Сынст ютксто 68 чавовсть ды вейке ёмась кулявтомо.
Эрьва ие республикасонок ютавтови «Афганонь гайть» военно-патриотической моронь фестивалесь. Сон алтави минек воинтнэнь подвигест ледстнемга, кить идесть тиринь масторост, ульнесть тюремань паксятнесэ; од ломантнень духовно-нравственной ды военно-патриотической мелест кастомга. Фестиваленть ютавтыть МР-нь Культурань, национальной политикань ды архивень тевень министерствась, Республикань Раськень творчествань кудось ды «Боевое братство» ветерантнэнь весероссиянь вейсэндявксонь республикань отделениясь.
Рузонь драмань театрав кенярксчинь промксов сакшность ветерантнэ, школасо тонавтницятне, тонавтыцятне. Чатьмонемань минутасо ледстязельть чавовозтне. МР-нь Прявтонть пельде пурнавозтненень лембе вал марто пшкадсь МР-нь Государственной Собраниянь Председателесь Владимир Чибиркин. Сон ёвтась сюкпря весе сетненень, кить топавтсть воинской долгост.
– Историясь велявты одс. Течи тагояк нетяно, кода Россиянть лангс каявить апаро вийтне, яволявтыть санкцият, информационной каявомат, ёмавтыть весементь, мезе сюлмавозь рузонь культуранть ды масторонть марто. Специальной военной операциянь ушодовомась а нолдасы фашизманть, конась вельмесь минек границятнесэ, – кортась Владимир Чибиркин. Сон казсь Благодарностть МР-нь Прявтонть ды МР-нь Госсобраниянь Председателенть пельде.
«Боевое братство» общественной вейсэндявксонь членэсь Вячеслав Кормилицын казсь «25 лет Всероссийской общественной организации «Боевое братство» медальть. Казезтнень ютксо – Валерий Иванович Миточкин, кона тусь эрямосто 2022 иень декабрясто. Сонензэ ульнесть 72 иеть. Казнесь максовсь нинзэ Екатерина Васильевнань туртов. В. И. Миточкин колмо иеть ульнесь Афганистансо, сон малав кеветее иеть ветясь «Боевое братство» ветерантнэнь весероссиянь вейсэндявксонь республикань отделениянть. Сонзэ пингстэ минек школатнесэ кармасть панжовомо кадетэнь класст. Ламо мель явсь эйкакштнень ды од ломантнень духовно-нравственной тонавтомантень.
«Афганонь гайть» фестивальсэнть гайгсть седейстокиця морот. Сынь алтавсть минек ветерантнэнень, боевой действиянь участниктненень. Сцена лангс лиснесть Саранскоень ды районсто сазь морыцятне: Руслан Нарбеков, Мария Кочеткова, Ольга Челмакина, Андрей Барашкин, «Переправа» ансамблясь ды лият.
Татьяна Маторкина