Республикань культурань кудосо ютась вастовома, конась алтавсь «Шумбрат, Мордовия!» раськень творчествань фестивалень Гала-концертэнтень. Промксонтень сакшность МР-нь Культурань, раськень политикань ды архивень тевень министрань васенце полавтыцясь А.Е. Губанищев, Республикань раськень творчествань кудонь прявтось Т. Н. Сидоркина, фестивалень жюрис совицятне А.Н. Ермолин ды В.А. Варданян.
Тедеде райононь отчётной концерттнэ ютасть райононь культурань кудотнесэ. Жюрись кавто ковонь перть ардтнесь, эрьва оймсема читнестэ савкшнось ваномс кавто райононь пельде концертт. 2022 иень фестивалесь-пелькстамось алтави Россиянь раськетнень культурань сюпавчинь иентень ды сон моли «Эряк, монь Мордовиям!» теманть коряс.
– Весемезэ минь ванынек творческой 500 номерт. Неть ульнесть фольклорной, раськень моронь ансамблят, эйкакшонь коллективть, ветеранонь хорт, ськамост морыцят, киштемань коллективть. Тедеде райононь эрицятнень туртов концерттнэ кармасть алкуксонь покш чикс, эдь аволь эрьвась сави ваномо Саранскоев. Залтнэ пешксельть ваныцядо, эрьва номерэнть вастсть пси цяпамосо. Ульнесть ламо виев номерт, муевсть од тештинеть. Кецявтымизь эйкакшонь ды од ломанень коллективтне, ськамост морыцятне, – кортась А. Е. Губанищев.
Морамонь ды киштемань номертнэде башка, кедьчелькев ломантне невтнесть эсь важодевксэст. Тёжадо ламо мастерт ульнесть выставкатнесэ. Кода пачтясь жюрись, иеде иес выставкатне седеяк вадрят.
– Районтнэсэ минь вастынек выпускникенек. Сынь важодить раськень культурасо, кепедить сонзэ, тонавтыть эйкакштнень – ды те пек кецявты. «Шумбрат, Мордовия!» фестивалесь – минек вейкине пелькстамо, конань вельде ванстовить койтне-кирдатне, моротне, промыслатне, этнокультурной сюпавчись. Сонзэ вельде ванстови минек культураськак. Те фестивалесь эсенек ды алкуксонь, – пачтясь М. Е. Евсевьев лемсэ МГПУ-нь преподавателесь В. А. Варданян, кона кеменде ламо иеть сови жюрис ды ванкшны декоративно-прикладной искусствань выставкатнень.
Сехте мазый ды виев номертнэ кочказь Гала-концертс, истя жо кармить важодеме раськень промыслань выставкатне.
Гала-концертэсь карми декабрянь 17-це чистэ Республикань культурань кудосо. Ваныцятнень энялдомаст коряс концертэсь невтеви кавксть – 13:00 ды 18:00 чассто.
Татьяна Маторкина