МР-нь Някань государственной театрасо ютазь оймсема читнестэ ульнесть ламо инжеть. Ды кода лиякс, эдь тесэ ютась «Садко» од спектаклянь невтема. Эйкакштне бизмолдсть семс, зярс эзь ушодово путовксось. Ваныцятне, теке мерят, понгсть ведь потмонь масторс. Сцена лангсо ульнесть кода артисттнэ, истя жо някатне-геройтне.
«Садко» спектаклясь путозь Г. Сапгирэнь пьесанзо коряс, конань юрсо ашти «Садко» кезэрень ёвтамось (былинась). Сон ловови рузонь раськень сехте кезэрень эпосокс, конась ванстовсь те шкас, косо кортамось моли Великий Новгород ошонь эрицятнеде ды Пазнэнь кемемадост.
Спектаклясонть невтевить христианской модамасторось ды мифологиянь, языческой – мода потмонь масторось. Путовксонть прявт героесь Садко, гуслясо седицясь, пельксты неть кавто мастортнэнь ютксо. Сон морси ды васенце таркас аравты эсь масторонзо кепедеманть, ансяк ёроков музыкантонтень те а канды ярмакт.
Иневедень Инязоронть тейтерезэ Волхова орожиясы Садконь, манясы сонзэ ведь потмонь масторов. Цёрась стувтсы моданть, ансяк теяк а канды тензэ кеняркс ды уцяска. Ды ансяк вечкевиксэнзэ Любашань оймесь лезды Садконень менемс Волховадо ды весементь ледстямс.
«Садко» спектаклянь режиссёрось-путыцясь – МР-нь заслуженной артисткась Лилия Шахова, художникесь-путыцясь – МР-нь культурань заслуженной роботникесь Наталья Кочнева.
Прявт героенть Садконь налкси Дмитрий Кузьмин, Любашань – МР-нь заслуженной артисткась Елена Романовская, Волховань – МР-нь заслуженной артисткась Галина Максутова, Иневедень Инязоронть Михайлонь – Иван Чиндяйкин, спектаклясонть важодить лия артисттнэяк.
«Садкось» лия ёнов а молиця, мазый ды мельстуиця. Секскак вишка ваныцятнень пельде ульнесть виев цяпамот. Те невтемась путозь «Культура малой Родины» проектэнть лувсо «Единая Россия» партиянть лезксэнзэ вельде.
Анокстызе Татьяна Маторкина