Аволь умок Саратова ёнксонь Петровской райононь Оркина велесэ «Саратовская студенческая весна-2022» областной фестиваленть юрсо теевсь видеорепортаж эрзянь раськень культурадонть, койтнеде-кирдатнеде ды явовиксчитнеде.
Снимамонть шкасто Саратовань инжетне ды SMtv студентэнь телевидениянь группась вастовсть Оркина велень Эрзянь-мокшонь центрань важодицятнень марто ды теевсть содавиксэкс веленть эрямонзо марто, ваннызь, кода тесэ ванстовить эрзянь культурась ды раськень койтне.
«Лисьмене» ансамблясь кенярдовтынзе инжетнень эрзянь кезэрень моросо. А велень эрицясь Пётр Живайкин ёвтнизе Оркина велень теевемань историянть, пачтясь седе, косто тесэ саевсть васенце эрзятне. Вера Живайкина жо каванинзе весень эрзянь сюкородо ды ёвтынзе сынст панемань салавачитнень, конань коряс неть тантейкатнень пансть эштё авазо ды сырькаезэ.
Вастовоманть шкасто «Шумбрат» Эрзянь-мокшонь раськень культурань центрань Саратовань региононь общественной вейсэндявксонь прявтось Валентина Кривошеева Оркинань СДК-нь коллективтненень эсь раськень культурантень алтазь проекттнэсэ участиянть кисэ макссь грамотат ды эрзянь кельсэ стихень ды моронь книгат.
Теде мейле весе тердевсть инжекс Оркина велень эрицянтень Мария Аношкинанень, косо теевсть содавиксэкс эрзянь кудонь эрямо лувонть марто, алкуксонь каштомосо пансть курник ды чапавтомас теезь кши. Весе каванявсть суронь тантей кашадо.
Анокстызе Юлия Еремина