Маень 3-це чистэ И. М. Яушев лемсэ музыкальной государственной театрасонть ютавтовсь Мариинской театрань Валерий Гергиевень прявтсо Симфонической оркестрань благотворительной концертэсь.
Тедеде Саранскоесь таго совась Московонь Инечинь фестивалень маршрутонтень, конань лувсо содавикс коллективесь максы концертт масторонть келес. Фестивалесь ушодовсь апрелень 18-це чистэ ды прядови маень 9-це чистэ, те шканть перть оркестрань музыканттнэ пачкодить 25 ламо оштнес. Те иень гастролень турось алтазь Ине Изнямонь 77 иетненень.
Концертэнтень якась Мордовиянь Прявтось Артём Здунов. Сон ёвтась сюкпря Валерий Гергиевнень ды Симфонической оркестрань коллективентень музыкань алкуксонь кенярксчинть кисэ, конась казезь республикань эрицятненень.
«Сюкпря, Инечинь фестивалесь таго Мордовиясо, – мерсь Артём Здунов. – Арсян, те коенть карматано поладомо. Тынк графикенк пешксе, тынь свал ардтнетядо тов, косо эйсэнк учить. Минь тынк вечктядызь ды явтано тенк покш мель патриотизманть кисэ».
Валерий Гергиев ёвтась сюкпря Саранскоень ваныцятненень лембе вастоманть кис ды алтась аволь ансяк самс Мордовиянь прявт ошонтень эштё весть, истя жо келейгавтомс театратнень ютксо вейсэнь тевтееманть.