Эрзянь ды мокшонь национальной драматической театрасо невтезель «Менелень нурямот» од спектаклясь. Сон путозь драматургонть, МР-нь народной писателенть Валентина Мишанинань пьесанзо коряс. Авторось лемди сонзэ народной комедиякс.
Режиссёрось-путыцясь – Россиянь ды Калмыкия Республикань искусствань заслуженной деятелесь Борис Манджиев, кона уш аволь васенцеде путы спектакля минек театрасо. Путовксонть лангсо важодсь покш команда: балетмейстерэсь Башкортостанонь заслуженной артисткась Рамиза Мухаметшина, оршамопелень коряс художникесь Наталия Степанова, художникесь-путыцясь Татьяна Чувыкина, музыкань авторось Виктор Чичайкин.
Спектаклянть марто понгат мокшонь кезэрень велес, косо стамбарнэ моли эрямось. Стамбарнэ ды прок аволь стамбарнэ. Коволня (Евгения Акимова) кассь, сась шка максомс мирденень. Лангозонзо сельме каясь Тиньгай цёрась (Максим Акимов), кона яволявтсь: тейтересь карми сонзэ! Семияст уш тень кувалма ломаньгак кучнесь тенст (Марина Аверкина), ансяк тонатнень мелест арась максомс те семиянтень. Тейтеренть авазо Киява (Елена Гудожникова) кода ансяк а ёжовгали апак учонь инженть икеле.
Те шкас пелькстыть эсь ютковаст одтнэнь покштятне Андю (Дмитрий Мишечкин) ды Микиж (Тимофей Чудаев), од шкане вейкень вечкевиксэнзэ максызь мирденень лиянтень.
Кудатне сеске састь одирьва мельга, симизь-ладизь. Ансяк Коволнянь седейс прась лия велень Васлей (Павел Михайлов) цёрась. Тамашань тев лиссь вейке чистэ – кие-бути пачтясь, буто Коволня ваясь… А сонзэ вечкевиксэзэ Васлей салызе.
Артисттнэнь лангсо мазыйдеяк мазый оршамопельть, сынь стазь истя, кода оршнесть умонь шкане мокшонь велетнесэ. Спектаклясь лиссь шожда, пейдевтиця, кецявтыця, улить таркат, косо а кирдевить сельведтнеяк. Эрзянь ды мокшонь ваныцятненень свал мельспаро неемс тиринь кельсэ путовкст. Сюкпря весенень, кие важодсь те спектаклянть лангсо. Кода карминек содамо, актёртнэ чинек-венек ульнесть театрасо, истя капшасть кенеремс теемс путовксонть.
Неень шкане Эрзянь ды мокшонь национальной театрась Од иенень невти вишка ваныцятнень туртов кавто спектаклят – «ЯкшамАтя» ды «Аромат Нового года». Капшадо, билеттнэде кадовсть аволь ламо!
Татьяна Маторкина