Пятница, февраля 23, 2024
Важное

Кода пачтинек «Эрзянь правда» газетань лопатнесэ, аволь умок Саранскойсэ ютавтовсь «Кезэрень модань од моро» регионъютконь фестивалесь. Ледстясынек, те кенярксчинть ютавтомс лездась Культурань инициативатнень Президентэнь фондось. Ушодкс тензэ путсь ды саинзе эсензэ лангс сонзэ анокстамонь весе мелявкстнэнь республикасонть содавикс журналистэсь, «Литова» авань вейсэндявксонь прявтось Раиса Щанкина.
Тешкстасынек, Раиса Борисовнанень удалась пурнамс аволь ансяк Мордовиянь, истя жо Россиянь лия регионтнэстэ ёроковсто морыця эрзятнень ды мокшотнень. Истя, республикав те кенярксчинтень сакшность ламо инжеть Пензань, Самарань, Саратовань, Нижнеень ды Волгоградонь областтнестэ. Тешкстасынек, фестивальсэнть покш тевекс ульнесь «Моронь керькс» сборникень презентациясь, конась истя жо нолдавсь Культурань инициативатнень Президентэнь фондонть лезксэнзэ вельде.

Кода совавтовсь эрямос те проектэсь, мезе теезель нурька шкас сонзэ анокстамга, теде ульнесь кортамо неть читнестэ А. С. Пушкин лемсэ Национальной библиотекасо.
Вастовомантень эрьва сыцясь ёвтынзе эсь мелензэ-арсеманзо те паро тевенть ютавтоманзо коряс. Сонзэ ушодовомсто сюкпрянь вал марто весе лездыцятненень, васняяк, оргкомитетс совицятненень, волонтёртнэнень, художественной коллективтненень, сехте пек республикань томбальде сыцятненень пшкадсь Раиса Щанкина. Раиса Борисовна презентациянть вельде пельксэнь-пелькс невтизе, кода мольсь важодемась те проектэнть коряс, кодат задачат аравтозельть икелест, кить ульнесть сынст арсематнень шныцякс ды весе тевтнесэ лездыцякс.

Алкукскак, тевесь а шождаль. Эрявсь ютавтомс покштояк покш важодема, штобу пурнамс ве таркас истянь зняро ёроков ломанть аволь ансяк эсенек республикань, ловт, масторонь келес. Сынст вастомс, муемс тенст эрямонь, андомань таркат ды теемс истя, штобу эрьва инжесь мельспаросо кадоволь аволь ансяк те фестиваленть, целанек республиканть коряс. Кода тешкстызь оргкомитетс совицятне, тень теемс тенст удалась «ветес». Весень мельс тусь седейшкавань вастомась ды культурань программанть ветямось.
Надежда Бочканова, МР-нь А.С. Пушкин лемсэ национальной ды краеведениянь литературань отделэнь прявтось, «Литова» тейтерь-авань вейсэндявксос совицясь:

– Тешкстаса, фестивальсэнть ёрокчист невтизь 27 коллективть, ков совасть 186 ломанть ды 18 солистт. Лиякс меремс, весемезэ участниктнеде ульнесть 200 седе ламо. Сынст ютксо 45 эйкакшт ды од ломанть. Малав сизьгемень ломанть сакшность Россиянь сеть регионтнэстэ, косо эрить ламо эрзят ды мокшот.
Истят фестивальтнень вельде минь седе парсте карматано содамо сеть моротнень, конатнень кезэрень шкасто морсесть минек покштятне-бабатне. Эдь умонь шкатнестэ сынь эзть ютавтне вейкеяк покш чи, косо бу авольть гайге тиринь кельсэ моротне. Неть мероприятиятнень вельде вельмевтевить кезэрень койтне-кирдатне, ванстовить тиринь кельтне.

Лариса Воробьева, Саранск ошонь округонь «Луч» Культурань кудонь структурной подразделениянь прявтось, те проектэнть руководителесь:
– Алкукскак, минек командась ютавтсь покш важодема Культурань инициативатнень Президентэнь фондонть лезксэнзэ вельде. Виде, те весе теезель аволь чаво таркасо. Минек ульнесть истят тевенек. Теде икеле кавксть ютавтнинек эсенек «Луч» Культурань кудосонть тень ёнов молиця фестиваль, сестэ тердекшнинек ансяк Мордовиянь морыцятнень. Ней жо тевенек ков седе ламо ульнесть, эдь арсинек пурнамс аволь ансяк эсенек региононь эрицятнень, истя жо республикань томбальде инжетнень. Самай сынст марто ютавтозель покш важодема, эрьва чистэ тенст гайневтнинек, икелепелев весементь мартост кортынек. Кинь ды зярдо эрявсь вастомс, анокстамс эрьвантень башка условият кода эрямо таркань, истя жо ёрокчист невтемань.

Те мероприятиянть ютавтомань, целанек проектэнть лангсо важодемань коряс аштян покш мельспаросо. Кеман, текень лангсо важодеманок а прядови, кармить улеме эштё аволь вейке проектэнек.

Валентина Юдина
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».