Четверг, июня 20, 2024
Важное

Ноябрянь 7-це чистэ Самарасо ютась Ледстнемань парад. Сон алтавсь 1941 иень ноябрянь 7-це чистэ ютавтовиця парадонтень. Се шкастонть Куйбышевесь ульнесь минек масторонь запасной прявт ошокс. Тедеде парадось ютась кемголмовоцеде, «Герои и подвиги» лементь ало, кода свал, В. В. Куйбышев лемсэ площадьсэ.

Ледстнемань парадонтень сакшность минек масторонь эрьва кодамо ошсто парадонь 125 расчётт. Малав 7 тёжат ломанть ютасть торжественной маршсо Куйбышевень площадьга. Те: кадетт, юнармеецт, военно-патриотической клубов совицят.

Паро инжекс тесэ ульнесть Россиянь Президентэнть Равчирень федеральной округсо полномочной представителень полавтыцясь Игорь Паньшин, Самарань областень губернаторось Дмитрий Азаров, Ине Отечественной войнань ветерантнэ, специальной военной операциянь участниктне, од ломанень вейсэндявксонь, патриотической клубонь, образованиянь ды культурань важодицятне.

Мордовиясто Ледстнемань парадов якасть Саранскоень 26№ лицеень кадеттнэ. Сынь уш котоцеде сыргасть истямо парадов. Весемезэ 53 тонавтницят. Нама, эйкакштне анокстасть шкадо икеле. Сынь лиссть изницякс строевой подготовкань коряс республикань пелькстамосонть. Сеедьстэ невтить пряст патриотической проекттнэсэ ды сайнить изнямонь таркат.

Лицеень тонавтницятне парсте невтизь пряст ды совасть вете сехте вадря парадонь расчёттнэнь юткс. Сынь ютасть «Прощание славянки» моронть марто минек республикань знамененть марто. Площадьганть ардсь исторической техника: Т-70 танк, броневик, полуторкат, се шкань мотоциклат.
Парадто мейле школань тонавтницятне ульнесть эрьва кодамо экскурсиясо ды вастневсть минек масторонь содавикс ломантнень марто. Мелезэст тусь «80-летию освобождения Киева посвящается…» военно-исторической реконструкциясь. Кадеттнэнь марто якасть МР-ва Россиянь МЧС-нь ГУ-нь трудонь охранань отделениянь прявтось А. А. Проскура, 26 № лицеень прявтось Ж. В. Шабанова, кадетэнь класстнэнь кураторось С.П. Екатеринин, тонавтыцятне ды эйкакштнень тетяст-аваст.

Кадеттнэ ледстизь Мордовиясо чачозенть Максим Алексеевич Пуркаевень лемензэ, конанень максозель армиянь генералонь лемесь, сон ветясь Куйбышевсэ 1941 иень ноябрянь 7-це чистэ военной парадонть. Мемориальной лазонтень путозельть цецят.

Анокстызе
Татьяна МАТОРКИНА

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».