Воскресенье, июля 21, 2024
Важное

И. Д. Воронин лемсэ краеведениянь музеесь ды «Ресурсный центр «Волонтёры культуры Мордовии» АНО-сь Президентэнь грантонь фондонть лезксэнзэ вельде анокстыть «Эрий кель. Живой язык» культурно-просветительской проектэнть. Аудиогидэнть туртов молить эрзянь ды мокшонь кельс ютавтомат, косо ёвтневи краеведениянь музеенть экспозициятнеде.



Нама, «Эрий келенть» прявт бажамозо – ванстомс тиринь кельтнень, койтнень-кирдатнень ды сравтомс неть содамочитнень ломантнень юткова. Ды вана октябрянь меельце читнестэ Раськень театрань студиясо ушодовсь аудиоэкскурсиянь сёрмадомась. Эрзянь кельсэ ютавтоманть ловныцякс кармась МР-нь заслуженной артисткась Галина Яковлевна Самаркина, мокшонь кельсэ – МР-нь заслуженной артисткась Елена Николаевна Гудожникова. Сыненст лездасть: режиссёрось, МР-нь заслуженной артистэсь Андрей Иванович Анисимов ды звукорежиссёрось, МР-нь культурань заслуженной важодицясь Виктор Михайлович Чичайкин (Бакич Видяй). Тешкстасынек, аудиогидэнть марто музейга экскурсиянь питнесь валгстови малав кавксть.

Омбоце покш тевесь, кона топавтови проектэнть юрсо, – те эрзянь ды мокшонь од оршамопельтнень стамось, конат седеяк тешкстасызь раськень ёнкстнэнь. Кезэрень шкасто эрьва оршамонть пельксэзэ ульнесь, эряви меремс, кода паспорт, сон ламо мезе ёвтнесь эсь азоронзо ланга: од эли сыре ломанесь, урьвакстозь, венчазь-апак, кодамо чачома тарказо (буезэ). Ды сехте эрявикс ёнксось – оршамопеленть коряс содави раськесь. Лисни, ломаненть лангс ансяк варштазь, содавить, васняяк, раськень ёнкстнэ (мокшо эли эрзя), мейле уш сонзэ культуразо (келезэ, коензэ-кирданзо). Оршамотне теевить кода покштнень лангс, истя вишкинетнененьгак.
«Эрий кель» проектэнть лангсо важодемась ушодовсь тедедень августсто ды карми молеме малав ие. Келесь тесэ алкукскак «эрий», эдь эрзянь ды мокшонь келень содыцятненень ды вечкицятненень тееви башка творческой тарка. Теде башка, анокставить культурно-образовательной программат, мастер-класст, урокт, литературной вастовомат ды седе тов.

Саемга, октябрянь 3-це чистэ ютавтовсь эрзянь ды мокшонь келень коряс тонавтыцятнень туртов «Уроки радости» семинарось. Проектэнь прявтось Татьяна Червячкова ёвтнесь од ломантненень «Эрий келенть» неень шкасто эрявиксчидензэ, а Галина Сергеевна Самаркина, проектэнть автортнэстэ вейкесь, невтсь тонавтыцятненень «Раськень налксемат», конатне ютавтовить уроксояк. Весе сакшность ве мельс – тиринь келень уроконть эряви ютавтомс мазыйстэ, теемс мельстуицякс, сестэ эйкакштнеяк паро мельсэ кармить сынст тонавтнеме. Тешкстасынек, Галина Сергеевна ульнесь наряжазь раськень од оршамопельсэ.

Проектэнть (колмоце течинь чис) юрсо анокстазь тевесь – те задания марто буклетэсь, конань прявт героезэ Музейка. Сон соды рузонь, эрзянь ды мокшонь кельть. Эйкакштне теевить содавиксэкс И. Д. Воронин лемсэ краеведениянь музеень эрьва залонть ды сынст экспонаттнэнь марто Музейкань вельде. Теде башка, весемесь кунсолови эрзянь ды мокшонь кельтнесэ, максовить кевкстемат эрьва мезде содыця Музейканень ды топавтовить максозь темань коряс заданиянзо.

Истят буклеттнэ кармить келейстэ нолдавомо тевс музеень уроктнесэ, интерактивень занятиятнесэ, конат алтазь тиринь ёнксонь историянтень ды культурантень. Школасо тонавтницятне тердевить ютамо музеень нупальтнева Музейка марто вейсэ.
Ледстясынек, проектэсь анокстави Президентэнь грантонь фондонть лезксэнзэ вельде.

Марина Агафонова

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».