П. К. Любаевень 105 иетненень
А. С. Пушкин лемсэ библиотекасо ютась «Толсо эждязь поэзия» творческой чокшне. Сон алтавсь МАССР-нь заслуженной писателенть, Ине Отечественной войнань участникенть П. К. Любаевень чачома чистэнзэ саезь 105 иетненень. Вастовоманть анокстызь библиотекань национальной ды краеведениянь литературань отделэнь важодицятне.
Павел Кириллович Любаев чачсь 1919 иень декабрянь 24-це чистэ Нижегородской областень Покш Болдинань райононь Пикшня велесэ. Прядынзе Мордовиянь рабфаконть (1938), Мордовской государственной университетэнть (1961). 1946 иестэ саезь важодсь «Эрзянь коммуна» ды «Ленинэнь киява» газетатнень редакциясо. Седе тов тердизь роботамо правоохранительной органтнэс. Ульнесь прокуроронь лездыцякс, Ковылкинань РОВД-сэ оперуполномоченноекс, МР-ва Россиянь МВД-нь кадрань отделэнь прявтонь полавтыцякс. Заочна прядокшнызе Самарань МВД-нь офицерской школанть.
Литературань кинзэ ушодызе лия кельстэ ютавтниця поэтэкс. Эрзянь кельс ютавтынзе А. С. Пушкинэнь, М. Ю. Лермонтовонь, Н.А. Некрасовонь, Т. Г. Шевченконь стихест. Эсензэ «Тундо» васенце стихотворениязо лиссь «Ленинэнь киява» газетасо 1938 иестэ. 1950 иестэ жо нолдавсь «Мирэнть кис» пусмось. 1970-це иетнень прядовомсто ды 80-це иетнень ушодовомсто лиссть эштё зярыя пусмот: «Сквозь свинцовые вихри», «Валдо ведьбайге», «Толбандянь сяткт», «Кемема» ды лият. 1994 иестэ нолдазель «Васень теште» художественно-документальной повестесь, конась ёвтни Мордовиясто Советской Союзонь васенце Геройденть И. А. Пожарскийде. Сёрмадомадонзо икеле сон натой ардтнесь Дальней Востоков. 2000 иестэ поэтэнть лиссь «Сюкпря» стихень пусмось, конась сёрмадозь рузонь ды эрзянь кельтнесэ. П. К. Любаевень эрзянь ды рузонь кельсэ весемезэ лиссть кемголмово пусмонзо.
Павел Кириллович Любаев – Ине Отечественной войнань участник. Сон тусь фронтов 1941 иестэ ды ульнесь тосо войнанть прядовомазонзо. Понгонесь Сталинградонь тюремаскак. Любаевень марто свал ульнесь А. С. Пушкинэнь аволь покш книгинезэ. Пек вечкилизе поэтэнть. Стихень эрьва пусмосонзо улить произведеният, конат алтазь войнань стака читненень. Валсо а ёвтави, мезе савсь тензэ неемс. Казезь Отечественной войнань II-це степенень орденсэ, «За боевые заслуги», «За оборону Сталинграда» ды лия медальтнесэ.
Павел Кириллович тусь эрямосто аволь умок, 2013 иестэ, секскак улить ламодояк ламо содыцянзо, творчестванзо вечкицянзо, конат сакшность те вастовомантень. Поэтэсь эрясь кувака ды уцяскав эрямо, кадовсь весень мельс пек паро ломанекс, чевте седеекс, лездыцякс. Сакшныль од сёрмадыцянь семинаров, косо эрьвантень муиль лембе вал.
Сехте ламо ледстнесь поэтэнть тейтерезэ Наталья Самаркина.
– Тетям ульнесь чевте седей ломанекс, паронь арсицякс, аволь покшкавтницякс. Кирдсь ламо ялгат. Кудосонок свал ульнесть инжеть. Войнадо пек эзь вечке ледстнеме, эзь ёвтне. Марсинек пельдензэ вейке история, кода чавовсь ялгазо – эрзянь цёрась Виктор Беляев. Снарядось сезевсь ды сонзэ вализе мода потс. Тетям пек ризнэсь. Войнадо мейле сон мольсь тензэ кудов, малавиксэнзэ марто вастовомо. Кенкшенть панжизе… самай се ялгась! Лиссь вана кода: вейке снарядось вельтизе модасо, омбоце снарядось – мекев ёртызе лангс. Седе тов, нать, понгонесь госпиталев, секс кист явовсь. Мезе ансяк арасель тюремань паксятнесэ. А уш кода тетям ды авам вейкест-вейкест вансть мель! Эрясть вечкезь, лездазь, паронь арсезь, ушова яксесть кедте кундазь. Авам, Нина Петровна, чачсь Дубёнкань райононь Кобалесэ, кудосо свал кортасть эрзякс, – ёвтнесь Наталья Павловна.
Сынь чачтсть-кастсть колмо тейтерть, вете нуцькаст. Н. П. Самаркина эрямонзо алтызе музыкантень, нейгак важоди Саранскоень 6№ музыкальной школасо. Тонавты эйкакштнень седямо скрипкасо.
Лембестэ писательденть ёвтнесть филологиянь наукань докторось, Н. П. Огарёв лемсэ МГУ-нь финнэнь-угрань филологиянь кафедрань прявтось Ю. Г. Антонов, Эрзянь ды мокшонь раськень регионъютконь общественной вейсэндявксонь исполкомонь прявтось Т.И. Ларина, «Ламзурь» фольклорной ансамблянь прявтось Р.Б. Щанкина, МВД-нь заслуженной важодицясь, отставкасо полициянь подполковникесь Е. Н. Шульгов ды лият.
– Телевидениясо важодемстэ аволь весть тейнинь сюжет П. К. Любаевень марто. Ды свал дивсинь: ютась войнань толонь пачк, цидярдсь, мейлеяк важодсь МВД-нь структурасо, теке марто седеезэ эзь калгодстомо. Кортыль, уцяскават, зярдо улить паро ялгат, – ёвтнесь Т. И. Ларина.
Вастовомасонть ламот кортасть: Любаевень поэзиязо валдо, чевте, истямо жо, кодамокс ульнесь сонсь.
Татьяна Маторкина