2024 иесь, конась яволявтозель Семиянь иекс, прядовома лангсо. Ламо тень коряс ютавтозельть эрьва кодат промкст ды ёвтазельть мельть-арсемат. Ламо мезе пачтязель одтнэненьгак. Минь саинек мель кортнемс Н.П. Огарёв лемсэ МГУ-нь Юридической институтонь теориянь, государствань ды правань историянь ды раськеютконь правань кафедрань профессоронть Юлия Николаевна Сушкова марто. Сон домкасто ёвтнесь тенек эрзянь ды мокшонь раськетнень семиянь кезэрень койтнеде-кирдатнеде.
– Юлия Николаевна, васняяк ёвтнеде, мезекс эрявить койтне ломаненть эрямосо?
– Тешкстама, Российской Федерациясо лововить 190 раськеть. Ламонь эйстэст кувака историяст, сон таргави тёжадо ламо иес. Саемга, эрзятне ды мокшотне, сехте аламо, эрить кавто тёжат иеть. Ды, чарькодеви, те кувака шканть перть раськетнень таштавсть эсест, киньгак ёнов а молицят, коест-кирдаст. Коесь – те сеть невтевкстнэ (ориентиры), конат ютыть вейке пингестэ омбоцес. Коенть сехте прявт тевесь – пештямс ломаненть оймензэ духовной питнейчиде. Коесь а тееви чаво таркасо, смусттеме, а сы костояк ве ёндо, сон натой а тееви государстванть мереманзо коряс. Те се, мезень коряс эри ломанесь вишка пингестэ саезь весе эрямонзо перть. Ды, нама, эйсэнзэ сехте покш тарка саить семиянь питнейчитне. А стяко ломантне кортыть – коень коряс эрямось сехте виде. Секс мекс эрьва раськесь кочки эстензэ ансяк сеть аравтоматнень, конат тензэ ладить ды лездыть эрямс. Минек государствась ёвты сюкпря сеть раськетненень, конат ванстызь эсь коест ды конатнень вельде минь эрятано те шкас. Койтеме минь бу ёмавлинек.
– Ёвтнеде минек раськень кезэрень семиясо прявт койтнеде.
– Кезэрень кудораськетне истят покшольть, натой лиясто лововсть эйсэст 40 ломанть. Учёнойтне а стяко тешкстыльть: «Мордва – народ крестьянско-общинный». Общинась аштесь покш семиясто. Эрьванть прявтокс ульнесь кудазор, кона нинзэ марто, кудазораванть, ветясь кудонь койть. Ды истямо лувсо эрямось ванстызе минек раськенек течинь чис. Весемесь сестэ теевсь коень коряс: эрьванть прянь ветямозо, тевензэ-валонзо… Натой кие козонь озы столь экшс (теде аштесь ярсамонь шкасто сэтьмечись ды аравтлувось), кие васенцекс саи пенч ды ушоды ярсамо, кие явши ямсо сывеленть ды седе тов. Весе неть тевтнень эрявсть явномс ды зярдояк а колсемс ушодозенть.
Сайсынек вана урьвакстомань-мирденень лисемань коенть. Сонзэ эйс совить сядот эрьва кодат эрявикс тевть-валт. Ды лововсь видекс кирдемс эрьванть. Секс мекс эрьва те коенть пельксэнзэ эйсэ кекшезь покш смусть. А стяко содавикс просветителесь Макар Евсевьев сёрмадызе урьвакстомань коенть аванзо пельде ды неть домка содамочитнень ванстынзе сыця пингетнес. Минь нетяно, кодамо стакаль свадьбань ютавтома коесь, конань пароль бу нейгак домкасто тонавтнемс ды чарькодемс. Эйсэнзэ неяви раськенек умонь историязо, кода Сырнень Ордань шкась ды сондензэ икеле шкатне. Натой невтеви, кодамо раськесь кона марто тюрсь эли кирдсь сюлмот.
Историянть молеманзо марто полавтневсть койтнеяк. Саемга, ульнесть шкат, зярдо семиятненень эрявсть седе ламо цёрат – сынст чачомсто государствась макснесь мода. Ды цёранть марто кудораськес сы тейтерьгак – урьва – те важодемань од вий. Нама, эрзятне кецнесть тейтертнененьгак. Те лововсь истя жо покш уцяскакс, ансяк тетятнень-аватнень икеле мейле аштесь прявт тевесь – парсте сонзэ максомс мирденень. Мирдень экшс лисема шканть малавгадомга тейтеренть васькавтыльть, мазыйстэ наряжильть, секскак зярдо сон лисиль ушов, аволь ансяк неилизь, марилизьгак. Келя, ванодо, моли одирьва… Мейле уш, мирдень кедьсэ улемстэ, авась кекшсь весе рунгонзо ды черензэ. Коень коряс тейтерентень свадьбас эрявсь ванстомс тейтерьксчинзэ. Лиякс кияк лангозонзо а урьваксты. Сехте пек семиясо важодевтсть од урьванть. Сон весенень лездась, ламо тевть топавтсь. Шкань ютазь авторитетэзэ кассь: сон невтсь превензэ, ёрокчинзэ ды чачтнесь эйкакшт. Эрзянь ды мокшонь культурасо авась зярдояк эзь эрсе покордазекс. Секскак христианизациянть самс ульнесть авань пазт – Ведьава, Вирьава ды седе тов. Те сюлмавозь сень марто: авась максы эрямо. Лиясто сыре аватне ульнесть семиянь прявтокскак, бути тосо кулыль кудазорось.
Од ломантнень икелепелев эрямост арсевсь кудораськень кортнематнесэ. Аволь свал кунсоловсь одтнэнь мелест. Ней бу меревельть, истя колавить од ломантнень праваст… Аволь теньсэ тевесь. Одксчись – те эрямонь асодамочи, тетятне-аватне жо лездыльть муемс эрявикс пола. Одирьват-содамот вешнесть маласо велетнестэ. Зярдояк эзизь максне эйкакшост апак сода ломаннень. Эрявсь содамс буенть, зяро сюпавчист, кодат кудост-чист, улить-арасть ормат, конат педить чачиця эйкакштненень, ды седе тов.
Нама, лиясто пейдема тевтькак лиснесть. Вейке исследованиянь шкасто карминек содамо, кода вейке атясь пек кувать цёранзо туртов вешнесь одирьва. Весе тензэ берянть марявсть. Ды вана муизе эрявиксэнть. Ладизь. Урьвакстомань шкасто жо одирьванть чамазо вельтязель. Ды чуросто эрсесь, полавтылизь мазый тейтеренть аволь пек мазый патянзо лангс – сонзэяк эдь эрявсь максомс мирде экшс. Атясь кода неизе, абунгадсь… тень лемезэ, кочкась, кочкась, кочкавсь… Явомс уш эзь мереве, цёрантень савсь эрямс мартонзо пингень перть. Те тагояк корты седе – эрявсь кунсоломс тетят-ават. Секскак минек раськень цёратне тетя-ава лангс кедь эзть кепсе. Бути истямо тев ульнесь, авась кирвазтиль штатол ды якиль веленть кувалт, весе неевлизь, те аванть покш зыян, лиякс семиянь тевтнес кияк а эцниль. Сестэ пурнасть атянь эзем, тердтнизь се а кунсолыця цёранть юткозост ды кортнесть мартонзо. Чарькодеви, истят тевтне пек чуросто вастневсть.
Сеть кезэрень шкатнестэ эрзянь-мокшонь семиятнесэ сатокшнось валонь лангс путомась, те мейле уш тусь церьковасо венчамонь коесь, седе тов ЗАГС-со регистрациясь… А теде икеле свадьбась налксевсь пек келейстэ, эйзэнзэ тердтневсть аволь ансяк роднят, ламо эсь велень эрицят, штобу перька весе содавольть од семиянь теевемадо ды те шкастонть саезь од ломантнень весе ловост мирдекс ды никс. Нама, прявт коесь сестэ аштесь сеньсэ – улезэ семиясь ламо эйдень триця. Эйкакштомо эрямось лововсь кажокс. Эрзятне ды мокшотне – шумбра раське, секскак ламо эйкакшонь трямось ульнесь нормакс.
– Кода икеле семиятнесэ решилизь аладямотнень?
– Саемга, бути вейке семиясо эрясть зярыя урьвакстозь цёрат, ды эсь ютковаст мирдть-нить сёвнолгадыльть, сынь а капшильть теде ёвтнемс тетяст-аваст туртов, тень кирдсть салавачисэ, куш эрясть вейсэ. Лововсь аволь вадрякс семиянь стакачитнеде пеняцямс малавикстнэнень, аволь эштё шабратненень. Весе кевкстематне ванновильть-решавильть семиясо. Те ней явомань статистикась тандавтыця – кемень полатнестэ-вастатнестэ сисемтне явить. Эрзятне-мокшотне явомат эзть сода. Бути допрок тошна вейсэ эрямось ульнесь, тукшность аламос вейкест-вейкест эйстэ, мейле зярыя шкань ютазь таго вейсэндявильть. Лисни, зярдо сынь эрясть башка, эзть лотка вейке-вейкенень улемс мирдекс ды никс. Тень коряс минек ули пек паро валмеревксэнек: «Кодамо панар стыть, сень кандтник, кинь экшс лисить, сень вечкик».
Эряви чарькодемс, коень коряс эрямось – те аволь кенярксчисэ ды тевтеме кеверькшнема, те покш ответственность ды пек стака тев. Коень коряс эрямсто кирдема ламо аравтомат, савкшны арсемс аволь ансяк эсь прят ланга, целанек кудораськедеть. Саемс ёвксонь Куйгорожонть. Сон ушодыль озоровамо, зярдо арасель роботазо, лисни, тензэ свал эряви максомс тев. Истя эрямосояк. Коень коряс весе эрямось кирдеви важодема лангсо. Бути тон аштят нузяксчисэ, кодамояк кой ланга кортамс а савкшны.
– Неень шкасто кезэрень койтне-кирдатне истя домкасто а кирдевить. Кодамо тень коряс тынк меленк?
– Койсэнь, кода ломантне лоткасть койтнень ванстомо, кармась бардак. Бути минь варштасынек Россиянь законодательстванть, тосо кортави эрямонь весе ёнкстнэде. Саемга, урьвакстомась эли мирденень лисемась – кода авань ды цёрань ютксо сюлмавомась. Ломанентень эряви улемс семиясо – те васенце ды сехте покш питнейчись. Маряви, те чарькодевиця ды эрявикс тев. Ансяк те коеськак ней ёмамо лангсо. А стяко 2020 иень Конституциясонок тешкстазель, семиясь – те авань ды цёрань ютксо союз ды кодаяк лиякс! Лисни, семиянь те питнейчинть кисэяк сави тюремс: ней сон невтеви кода аволь сехте эрявикс тев. Западонь тевтнень лангс ванозь, кой-кона минек ломантнеяк мурдыть раськень койтнеде ве ёнов. Саемга, эйкакштомо эрямось. Келя, ломанесь сонськак уцяскавсто эри, кодамояк семия тензэ а эряви… Те, нама, а истя, эйкакштнесэ ды семиясо минек виенек! Лисни, тагояк савкшны ветямс одтнэнь ютксо просветительской важодема.
Нама, эрямось а ашти ве таркасо, мон а мерян, эряви таргамс ды совавтомс кезэрень шкатнестэ весементь, ансяк кой-кона мельтнень эряволь бу содамс ды кирдемс нейгак: вейке-вейкенень мелень явома, чарькодема, шкастонзо чатьмонеме маштома, тетянь-авань мелень ванома ды лият.
Седе домкасто эрзянь ды мокшонь кудораськень койтнеде сёрмадозь Юлия Сушковань «Неписанные законы мордовской семьи» монографиясонзо, конась нолдавсь 2016 иестэ.
Кезэрень шкасто саезь эрзятнень ды мокшотнень прявт питнейчист – кудораськесь. Секскак тейтерькатне ды цёрынетне вишка пингестэ саезь анокстасть те тевентень. Тейтерькась уш сисемшка иесэ ушодыль эсь кедьсэ анокстамо викшнезь нардамот казнекс, седе тов стыль палят ды лия эрявикс оршамопельть, конатнень теемс ульнесь аволь шожда. Пек ламо эрявсь анокстамс: эрямопаресь пурнамаль весе эсь кедьсэ. Секскак кодаткак кортамот седе, кода мейле явомс мирде марто, арасельть. Свадьбась, конась ульнесь пек питней тевекс, налксевсь эрямопингень перть весть. Бути семиятне ламо эйкакш мартольть, тетятне-аватне арсесть теде зярыя иеде икелев. Эрявсь кенеремс се шкантень весементь анокстамс: ютазо те коесь пек мазыйстэ ды сюпавсто. Лиясто натой ломантне судясть сеть тетятнень-аватнень, конат эзть лезда эйкакшост туртов теемс-пурнамс семия.
Марина Агафонова