Пятница, февраля 07, 2025
Важное

Аволь умок Республикань Культурань кудосо ютавтовсть «Шумбрат, Мордовия!» шкинемань фестивалень концерттнэ, косо эсь ёрокчист невтсть Мордовиянь районтнэстэ аволь ансяк самодеятельной артисттнэ, истя жо кедьчелькев ломантнеяк. Сынст важодевкстнэ невтевсть выставкатнесэ. Кодамо сюпав минек республикась истямо ломаньсэ, кодамо мазычи сынь маштыть тееме! Весементь ванкшномсто ёжот паролгады, седеесь кенярдозеви.
 
Пек сюпав ульнесь Орданьбуень райононь кедьчелькевтнень выставкась. Тесэ невтевсть Од иень куз лангс налкшкеть, чувтосто теезь парнеть, эрьва кодамо техникасо анокстазь кудоютконь кедьёнкст ды мазылгавтомат. Нама, эрьва истямо выставкань сюпавчись – Орозбиень понань лембе кемтне. Истя жо инжетнень кенярдовтызь райононь художниктнень картинаст. Тесэ иень эрьва кодамо шкасто невтевсь пертьпельксэсь, раськень койтне-кирдатне, мазый эрзяватне. Ды эрьва картинанть ванкшномсто ломанесь редясь эсь туртов мезенть-бути малавиксэнть, седейлембень максыця пелькскенть.
Артыцятнень важодевксэст ютксо явовсть Михаил Алтушкинэнь пейзажтне. Вейкесэнть ваныцянть кенярдовтсь кудо икеле касыця бояронь курось (сирень), конась, мерят, весе пертьпельксэнть пештизе эйстэнзэ качадыця цецятнень панжомань тантей чинеде. Лиясонть прок сельме икеле солась меельце ловось ды уш весемесэ неявсь тундонть самозо. Эряви меремс, ушодовиця тундось невтеви художникенть ламот роботатнесэ. Ды те шканть сон панжи эрьванть туртов лия, икеле а содавикс ёндо. А кодамо лембе марить неть картинатнестэ сеть, кие чачсь-кассь велесэ. Вана икелеть ашти покштять-бабать кудынест ды превсэть сеске вельми эйкакш порат, кода крыльцянть лангсо аштесь бабат, учось эйсэть ды свал каванясь тантейкадо. Лия картинась панжи теть тиринь веленть перька мазычитнень, невти пандотнень юткова чудиця лейненть. Ды те весемесь минек эрямосто.
 
Михаил Алтушкин чачсь-кассь Орданьбуень райононь Вишка Игнатова велесэ, конась ней уш араськак. Чамсь велесь, кизэнь шкасто ансяк дачникть сакшныть. Алтушкинтнэнь семиясь тусь тосто меельцекс, зярыя иеде икеле. Эрямонь од таркакс кочкизь теке райононь Баеньбуе веленть, косо Михаил важоди вечкевикс тевсэ – тонавты эйкакштнень артомантень.
 
Артомантень ёрокчись Михаилэнь ульнесь уш вишкинестэ. Ютась сон, паряк, аванзо ёндо. Артоманть вечкилизь аванзо сазорозо ды тетянзо ёндо бабазо. Вишкинестэ кода-бути рисовизе-черькстнизе бабанзо каштомонь весе ушоёнксонть, тонась сёвномо эзь карма, сайсь конёв, ручка ды теке минутастонть рисовизе вальма лангсо аштиця цецянть, лиссь истя мазыйстэ, теке алкуксонь, цёрыненть те пек дивавтызе. Бабазо велень ломанель, важодсь колхозсо, трясь-кастсь ниле эйкакшт, сонзэ овсе арасель шказо артомантень, куш талантозо алкукс ульнесь. Теде мейле Мишаяк вечкиль козояк рожомомс конёв ды карандаш марто, рисовиль весементь, мезенть «кундыль» сельмезэ. Седе сеедьстэ те ульнесь шабратнень кудось, пире удало касыця чувтотне ды куракштне. Секскак школанть прядомадо мейле парсте содась, косо поладсы тонавтнеманзо. Кочкизе Ицялонь педагогической колледжень художественно-графической отделениянть. Сонзэ прядомадо мейле служась армиясо, аламос тонавтсь Саранскойсэ художественной школасо. Седеесь тердсь тиринь таркатнес, ды сон велявтсь эсь районов.
 
Баеньбуесь вечкеви тензэ. Велесь эриця, ломантнеде ламо, ули эйсэнзэ энергия. Зярс, паряк, веленть перька аволь весе мазый таркатнень ванкшнынзе, ансяк кува якась, весементь невтизе эсь картинатнесэ. Ялатеке ледстнематнесэ ванстовсь эйкакш пингень пертьпельксэсь – Вишка Игнатованть велькссэ валдо менелесь, ве ёндо неявиця килеень посадкатне, пижелдыця виресь ды эрьва кодамо тюсонь цецядо пешксе паксятне. Весемесь те шкас эжди седеенть.
 
Сон нейгак юткошкасто этюдник марто арды тиринь таркатнес. Эрси тосо кизнаяк, рана тундаяк, секс мекс седейсэ эрить лия ёнов а молиця куринкатне, мазыйдеяк мазый чивалгоматне. Секс ламот картинасонзо – чачома-касома велень пейзажтне. Кода уш тешкстынек вере, седе ламо роботасонзо невтеви ансяк ушодовиця тундось. Зярдо кевкстинек, мекс сон сеедьстэ невти самай те шканть, Михаил мерсь, паряк, сёксенть эштё эзизе чарькоде. Сонзэ седеентень седе малавикс шождалгавтыця, весементь сыргозтиця шкась – солыця ловось, эенть алдо вельмиця леесь, чокшнень экшесь. Те весемесь аламонь-аламонь изни теленть, вельмевти пертьпельксэнть.
 
Неень шкасто Михаил Алтушкин топавты Баеньбуень Культурань кудонь прявтонь тевенть. Истя жо артомантень тонавты эйкакштнень. Сынст туртов Культурань кудонть юрсо важоди кружок. Кода мерсь артыцясь, эйкакштнень марто важодеманть свал ушоды художникень тевенть марто содавтомасто. Ёвтни, мезе истямось тюсось, тонось, композициясь. Ды васенцекс ушодовкшныть натюрмортонть рисовамсто.
– Минек пурнавкшны группа, ков свалшкане якить 10–15 эйкакшт. Цёрынькатнень-тейтерькатнень ёрокчист ули. Нама, лиясто а кирдевить, эдь артомась – те терпения, усидчивость. Вейке ансяк бажамось – улемс художникекс – те аламо. Те тевсэнть эрявить оймень вийть. Бути те весемесь эйкакшонть ули, невтевксэнзэ кармить, – тешксты Михаил Алтушкин.
 
Михаил Алтушкинэнь картинатнесэ невтевить ломантне, пертьпельксэнь мазычись. Неть тематне свал ульнесть малавикст художникентень, сынст марто сюлмавозь сонзэ шкинемазо. Ды те чарькодевияк. Михаил сонсь велень ломань ды пертьпельксэнть мазычинзэ несь вишкинестэ саезь.
Юлия Еремина
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».