Мартонь васенце читнестэ Челябасо ютавтовсть эрзянь-мокшонь раськень культурань чить. Сынст арсицясь-пурныцясь – «Иненармунь» раськень культурной центрась, конань прявтсо эрзянь ёроков тейтересь Ольга Лысенко. Мероприятиятнень содавтызь инжеть минек республикастояк. Тов якасть Эрзянь-мокшонь раськетнень регионъютконь вейсэндявксонь прявтось Юрий Мишанин, весенень содавикс эрзянь морыцясь Артём Мамаев ды баянсо седицясь, морыцясь, мокшонь цёрась Сергей Фудин.
Васенце чистэнть Мордовия Республикасто инжетнень марто пурназель вастовома Челябань «Центр народного единства» (ЦНЕ) МКУ-со. Челяба ошонь Администрациянь общественной сюлмотнень коряс управлениянь прявтось Вячеслав Борисов кортась раськень культурной центратнень администрациянть марто вейсэнь важодемань эрявиксчиденть. «Центр народного единства» МКУ-нь прявтось Дмитрий Гришин седе домкасто ёвтнесь ЦНЕ-нть ды раськень культурной центратнень вейсэнь важодемадонть. Истя жо инжетнень туртов ютавтозель экскурсия центраванть. Эряви меремс, учреждениясь вадря ды мельстуиця. Сон вейсэнди областьсэнть эриця прявт раськетнень, юрсонзо улить раськень кельтнень тонавтнема класст, мероприятиятнень ютавтомань туртов залт. Ули тесэ мельстуиця музейгак, конанень покш инжетне алтасть максомс эрзянь-мокшонь оршамопельть ды раськень лия кедьёнкст. Юрий Мишанин васенце казненть теизе вастовоманть лувсо. ЦНЕ-нтень сон казсь книга Мордовиядо.
Вастовомасонть истя жо ульнесть ЦНЕ-нь прявтонь полавтыцясь Рауль Асатулин, Рузонь раськень культурной центрань прявтось Пётр Акимов, «Доброе кино» киностудиянь ветицясь Ольга Малахова, краеведэсь, «Край РА» издательствань прявтось Елена Змиенко ды лиятне.
Теке жо чистэнть Мордовиянь инжетнень марто покш вастовома пурназель Чесма велесэнть. Тесэ эрить ламо эрзят ды мокшот. Самай сынь сакшностькак вастовомантень. Эрицятне ёвтнесть эсь веледенть, кода, зярдо ды косто сынь тей састь. Ламотнень ёвтнемаст токшесть седейть.
Седе тов велень Культурань кудосо ютась «Оймень туртов морот» концерт, козонь пурнавкшность эрицятне, конатнень ундоксост эрзянь эли мокшонь, ды «Иненармунь» НКЦ-нь ялгатне-оятне. Артём Мамаев ды Сергей Фудин морсесть колмо кельтнесэ: рузокс, эрзякс ды мокшокс. Цёратнень ламот уш содасызь, сынь аволь васенцеде Челябасо инжекс. Морыцятне эзть пелезеве васоло киденть, сынь эрьва пшкадемантень явить мель: морсить покш сцена лангсояк, вишка велесэяк. Алкуксонь патриотт! Ламот ваныцятнестэ эзть кирдеве ды лиснесть киштемеяк.
Мельстуиця концерттэнть мейле Юрий Мишанин ёвтась лембе валт пурнавозтненень, Благодарностьсэ ды Мордовия Республикадо книгатнесэ казинзе Чесменской райононь прявттнэнь.
Омбоце чистэ покш вастовомат ютавтозельть Варненской райононь Кулевчи велесэ.
Васняяк жо инжетне Варнасо якасть Ине Отечественной войнасо чавовозтненень кеврунгонтень, косо путсть цецят. Эряви меремс, Стелласонть тешкстазь пек ламо эрзянь ды мокшонь фамилият.
Седе тов содавтызь Кулевчи велень средней общеобразовательной школань музеенть, косо весень туртов ютавтозель мельстуиця экскурсия.
Теде мейле ульнесь прявт мероприятиясь – «Кулевчаста мокша» конференциясь, конась алтавсь мокшонь литературань ды публицистикань ушодыцянтень, мокшонь букварень арсицянтень-теицянтень Фёдор Иванович Завалишиннэнь. Эряви ёвтамс, те иестэ азбукантень топодить 100 иеть. Мероприятиясь истя жо алтазель Педагогонь ды наставникень иентень.
Покш инжетнень вастызь кши-сал марто, лембе валсо ды седейс токиця моросо, конатнень казизь «Слобода» эрзянь-мокшонь коллективесь ды ДК-нь лия ансамблятне. Мероприятиянтень сакшность ламо инжеть Челябасто, Троицкойстэ, Чесмасто ды Варнасто. Вастовоманть арсицякс-ютавтыцякс кармасть Челябань «Иненармунь» ды Кулевчань Культурань кудонь Эрзянь-мокшонь культурань центратне.
Панжизе чокшненть Варненской муниципальной райононь прявтось Константин Моисеев. Сон ёвтась поздоровт Челябань областень Культурань министрань васенце полавтыцянть Ирина Анфалова-Шишкинань пельде ды казсь инжетненень книгат Варненской райондонть.
Челябань областень Правительствань Общественной сюлмотнень управлениянь прявтось Дмитрий Семенов тешкстызе истят мероприятиятнень эрявиксчинть.
– Минек регионсо эрить ды эрясть ламо содавикс ломанть. Сынденст эряви ёвтнемс. Теньсэ пек лездыть самай истят мероприятиятне, кодамо ютавтови течи, – мерсь Дмитрий Семенов.
Юрий Мишанин ёвтась покш сюкпря Челябань областень ды Варненской райононь прявттнэнень вейсэнь важодеманть кисэ. Сон тешкстызе, истят вастовоматне эрявикст Мордовия Республиканть туртов ды целанек весе эрзянь ды мокшонь раськетнень туртов.
Вастовоманть лувсо кортазель тесэнь районтнэсэ «Шумбрат» фестиваленть ютавтомадо. Те арсемась тусь весень мельс. Эрицятненень пек а сатныть раськень творчествань истят фестивальть. Ютавтозь мероприятиядонть жо мерсть, сон сынст туртов кармась историческоекс ды зярдояк а стувтови.
Меельцекс пурнавозтнень оймень токиця моросост тагояк кенярдовтызь Артём Мамаев ды Сергей Фудин. Цёратнень кувать эзть нолда сцена лангсто. Ломантне покш мельсэ кунсолость эсь тиринь раськень моротнень, конатне вельмевтсть ледстнематнень.
Фёдор Иванович Завалишин чачсь 1895 иень октябрянь 1-це чистэ икелень Оренбургонь казаконь войскань (ней Челябань Варненский район) Николаевской станциянь Кулевчи велесэ, нужачисэ эриця казаконь семиясо. Раськень коряс мокшоль.
1917 иестэ саезь 1921 иес роботась вишка класстнэсэ тонавтыцякс. Мейле ВКП(б)-нь ЦК-нь Мордовской секциянть кармавтоманзо коряс тусь Московов, роботась «Якстере теште» газетань редакциясо. Те газетань лопатнесэ сон печатавсь аволь ансяк кода журналист, истя жо кода поэт ды прозаик, сёрмадсь эсь стихть, ёвтнемат. 1923 иестэ Фёдор Иванович мокшонь школатнень туртов сёрмадызе «Букваренть».
Юлия Еремина