МР-нь Культурань, национальной политикань ды архивень тевень министрась Светлана Баулина макссь каршо валт республикань эрицятнень кевкстемаст лангс. Виде эфирэсь мольсь «ВКонтакте» сетень «Республика Мордовия» куросонть. Сон пачтясь, кода минек ёнкссо топавтови «Культура» национальной проектэсь.
Тешкстызе, мелят неень шкань оборудования марто од кинозалт панжовсть Лямбирень, Теньгушевань, Кадошкинань районтнэсэ. Истят кинозалт седе тов арсеви панжомс Мордовиянь эрьва районсо.
Ломантне ламо кевкстнесть культурань кудотнень витнемадост.
– Алкукскак, стакачитнеде ламо. Течи эрявить витнемс-петнемс 136 учрежденият. Секскак «Культура» нацпроектэнть топавтомс сыця ярмактнень минь явтано культурань кудотнень стявтомс ды сынст витнемс-одкстомтомс. Тень коряс ветяви покш тев, – пачтясь Светлана Баулина.
Виде эфирсэнть ульнесь кевкстема Ф. Ф. Ушаков лемсэ Темниковань историко-краеведениянь музеень витнемадонть, сон ловови культурань сюпавчинь ванстомань таркакс. Министранть валонзо коряс, маласо шкасто арсеви анокстамс проектно-сметной документациянть.
Кортамось мольсь Чернобылень АЭС-сэ лисезь зыяндонть мейле тарканть ванськавтыцятненень монументэнь стявтомадо. Те кевкстеманть коряс кармавтома макснесь уш мелят МР-нь Прявтось Артём Здунов. Содавикс скульпторось Николай Филатов тейсь памятникень эскиз. Неень шкасто арсеви, козонь аравтомс кеврунгонть.
МР-нь Культурань, национальной политикань ды архивень тевень министрась Светлана Баулина домкасто ёвтнесь «Минь вейсэ» раськень культурань од ломанень весероссиянь фестивальденть. Этнокультурной покш кенярксчись карми ютамо кизна, августсто. Сонзэ пингстэ карми молеме «Молодёжь в этнокультурном пространстве: реальность и перспективы» финнэнь-угрань раськетнень весероссиянь форумось. «Минь вейсэ» фестивалесь юты ниле таркава: Советской площадьсэ ды фонтантнэнь вакссо валгома таркасонть, «Мордовия Арена» стадионсо, А. С. Пушкин лемсэ парксо ды Тёжа иетнень площадьсэ.
Ютавтовить мастер-класст, «Морыця чувто» раськень промыслань ды ремеслань регионъютконь фестиваль, панжови «Изнямонть кисэ» менель ало музей, «Шумбрат» фольклорной кенярксчи, Россиянь раськетнень спортонь фестиваль... Омбоце чистэнть Россиянь творческой коллективтне сыргить инжекс республикань районтнэва, теевить содавиксэкс минек культуранть, койтнень-кирдатнень марто.
– Мордовиясо учовить содавикс коллективть: «Лезгинка» Дагестанонь киштемань Государственной академической заслуженной ансамблясь, Чечнянь «Вайнах» киштемань государственной ансамблясь, М. Е. Пятницкий лемсэ Государственной академической рузонь народной хорось ды «Русская песня» Надежда Бабкинань ансамблясь, – пачтясь Светлана Баулина.
Истя жо сон ёвтнесь, Мордовиясо ламо мезе тееви раськень культуранть ванстомга ды виевгавтомга. Покш мель явови креативной индустриясо эсенек нолдавкстнэнень. Те иень февральстэ ютась республикань Ремесленной васенце форум, косо ламо кортавсь региононь художественной промыслатнень ды ремеслатнень эрьва кодамо таркава тевс нолдамодост. Арсеви панжомс специализированной лавка «Саранск Арена» стадионсо. Тосо Мордовиянь мастертнэ кармить микшнеме эсь теевксэст ды важодевксэст. Эдь сынь лия ёнов а молицят ды кармасть республикань визитной карточкакс. Сынст ютксо Теньгушевань семицветкась, Орозбиень кемтне, Тавлань налкшкесь, эрзянь ды мокшонь викшневкстнэ, илёвсто кодазь теевкстнэ, чувтосто керсевкстнэ...