Эрзянь ды мокшонь раськень культурань музейсэ панжовсь Светлана Ямбиковань «Я сошью себе мир из цветных лоскутков» лементь ало выставказо. Сон – МР-нь образованиянь заслуженной роботник. Мазый невтеманть пурныцякс кармась Республикань раськень творчествань кудось.
Светлана Ямбикова чачсь Белоруссиянь Брестской областьсэ. Сон прядызе Чувашиянь И.Я. Яковлев лемсэ педагогической институтонь художественно-графической факультетэнть. Малав 30 иеть важоди Ицялонь педагогической колледжсэ артовксонь, технологиянь ды материалонь художественной обработкань тонавтыцякс.
Светлана Владиславовна – весероссиянь, регионъютконь, республикань фестивалень ды выставкань свалшкань участник. Сон – «Параскева-рукодельница» декоративно-прикладной творчествань регионъютконь фестивалень арсиця ды ютавтыця. Конкурсось эрьва ие ютакшны Ицялонь педколледжсэ. Эйсэнзэ пелькстыть школань тонавтницятне, художественной училищань студенттнэ.
«Я сошью себе мир из цветных лоскутков» – аванть туртов васенце персональной невтема. Выставкасонть пурназь малав 100 важодевкст, конат теезь эрьва кодамо техникасо: авторской ды народной няка, тедди налкшкеть, панкссто ставкст, парсейсэ, гладьсэ, крестиксэ викшневкст, строчевой викшневкст, эрзянь ды мокшонь оршамопельть.
Сехте пек дивавтыть строчевой викшневкстнэ. Истямо техникасо викшнить Россиянь келес, ансяк алкуксонь мастерт муят аламо. Те викшнемась стака, эрявить ламо маштомачить. Савкшны ансяк дивсемс, кона шкане кедьчелькев авась кенери тонавтомс од ломанть ды явомс покш мель творчествантень.
Выставкасонть невтевить «пэчворк» техникасо викшнезь нардамот, салфеткат, паннот, панарт, киякс ланга ацавкст. Кенярдовтыть сельметь эрьва кодат налкшкетне: стазь нумолот, сеельть, овтынеть. Эрьвасонть натой редяви ракшань обуцяськак. А кодат мазыйть панкссто стазь вельтямотне (одеялат)! Авторось тейсь някань покш семия, кона мольсь кизна тикшень ледеме-костямо, зяро тесэ элементт, зяро путозь вий!
Невтеманть панжомо сакшность ламо инжеть. Ицялбуестэ пачколесть тонавтыцянть студентэнзэ, малавиксэнзэ.
– Светлана Владиславовна – вадря невтевкс весень туртов. Сон важоди образованиясо, теде башка, яви покш мель минек культурантень, сюпалгавты сонзэ. Весе седейстэ евтан сюкпря те сырнень кедь авантень. Сон свал невти прянзо республикань, регионъютконь, весероссиянь эрьва кодамо выставкасо ды пелькстамосо, свал невти од важодевкст, дивавты организатортнэнь. Лемензэ парсте содасызь лия регионсояк. Арсетяно тензэ шумбрачи ды творчествасо ламо изнявкст! – кортась Республикань Раськень творчествань кудонь прявтонь тевтнень топавтыцясь Ольга Дашкина.
Татьяна Маторкина