Аволь умок сась кенярксов куля – Кочкурбуень дока гармонистэсь Владимир Завьялов ды Ташто Мурза велень «Норовава» фольклорной ансамблясь якасть инжекс «Песни от всей души» передачань съемкатнес. Гармонистэнть ды ансамблянь морыцятнень ульнесь покш мелест варчамс эсь вийтнень истямо содавикс ды весенень вечкевикс передачасонть, косо казить мазый морот ды мельспаросо евтнить минек масторонь ероков ломантнеде.
– Весемесь лиссь апак учне. Декабрянь васенце чистэ монень гайневтсть «Песни от всей души» передачань редактортнэ ды тердимизь съемкав. Омбоце чистэнть уш журналисттнэ састь Семилеев ды снимасть ланган сюжет. Снимамсто эзинь тално, мельспаросо евтнинь эсь чачома таркадон, тиринь Мордовиядонть, гармониясо налксемадонть. Истя жо евтнинь вадря ялгадон – «Норовава» ансамблясо морыцятнеде. Редактортнэ сынсткак тердизь. Снимасть лангаст сюжет ды тердизь мартон Московов съемкав, – евтни Владимир.
Мордовиясто инжетнень Московось вастынзе шалтсо. Кода корты гармонистэсь, те ошсонть сон ульнесь васенцеде ды кеми, аволь меельцеде. Передачань редактортнэ морыцятнень вастызь лембестэ, ютавтсть телецентрава апокш экскурсия, содавтызь съемкатнень прявт ветицянть Андрей Малахов марто. Владимирэнь туртов те передачантень понгомась умок уш ульнесь покш бажамокс.
– Минь тосо ульнинек теке тиринь кудосо. Сехте пек мелезэнек тусть содавикс артисттнэнь ды морыцятнень марто седейшкава кортамотне. Кияк эзь покшкавтне, весе ветясть пряст истя, прок минь мартост умонь ялгат. Талномась, нама, покшоль, ансяк мелявтынек стяко, весемесь ютась пек парсте. Морамсто эзинек маняво, валт эзинек стувто. Мордовиянть невтинек кода эряви. Казнетнедеяк эзинек стувто. Ускинек Кочкурбуень содавикс ды весенень вечкевикс предприятиянть продукциянзо. Неть казнетнень кисэ сюкпря евтатано Александр Ильич Поздняковнень. Эсень пельде Андрей Малаховнень казия «Семистрельная» Пазонь Авань пазаванть, конань аволь умок монсь викшния. Эште казинь чувтосто керсезь тавлань лишминеть, евтнинь сынст историядост ды теицядост. Весе кадовсть покш мельспаросо, – корты гармонистэсь.
Весемезэ съемкатне ютасть ниле част, ансяк вадря ежось ды ледстнематне кармить эждеме ломантнень кувать шкань перть.
Капшатано евтамс, «Песни от всей души» передачась, косо снимавсть Мордовиянь ероков гармонистэсь Владимир Завьялов ды «Норовава» ансамблясь, лиси эфирс 2025 иень декабрянь 21-це чистэ. Учотано паро мельсэ!
Алена Артемьева