Надежда Удельновань аволь весть савкшнось неемс Московсо ютавтовиця эрзянь ды мокшонь кенярксчитнесэ. Сон свал сцена лангсо. Вайгелезэ виев, гайтев, мазый. Ушоды морамо – ды арсят, ансяк бу а прядоволь морось. Сонзэ кунсоломсто мельсэть-превсэть вельмить велесь, паксятне, виртне… Авась морси народной морот. Ды вана минь теевинек мартонзо содавиксэкс, мельспароль марямс, кавоненек вейке райононь. Надежда Ивановна важоди Москов енксонь Дзержинский ошсо эйкакшонь искусствань школань прявтокс.
Надежда чачсь Орданьбуень Куцянвелесэ. Авазо, Анна Павловна, важодсь велень КБО-со, тетязо, Иван Степанович, пингензэ перть роботась трактористэкс. Сон казезь Трудовой Славань III-це степенень орденсэ. Мирдть-нить вейсэ эрить ведьгеменде ламо иеть. Чачтсть-кастсть колмо тейтерть: Надянь, Любань, Верань. Весе сынь прядсть вузт. Надя школасо тонавтнемстэ морсесь эрьва кенярксчисэ. Мазый вайгелесь сатотсь тензэ аванзо пельде. Анна Павловнань вишка шкане натой сайнизь кунсоломо Саранскоень эйкакшонь музыкальной школав-интернатов, кадыксэлизь тоско тонавтнеме. Сон аванзо марто мекев велявтсь кудов. Кудосо вастынзе бабаст, кедензэяк вачкодинзе: «Пазось маримим, чинь перть ознынь, ансяк бу аволидизь сае». Ков нолдамс эйкакшонть истя васов?! Сеть шкатнестэ те марявсь тамашань тевекс. Ней те тевенть сеедьстэ ледстнить Удельновтнень семиясо ды пеедькшнить.
Морамонь кияванть тусь васенце тейтерест – Надежда. Сон теньс пек эзь бажаяк, ансяк истя лиссь, паряк, сонсь Пазось ветясь эйсэнзэ. Эрямонь килангсо свал вастыль паро ломанть, конат лездасть эрьва мейсэ.
Школань прядомадо мейле Надежда мольсь тонавтнеме Орданьбуень медицинской училищав. Теде косто-бути марясь Мордовиянь культурань сестэнь министрась Н.Я. Наумкин. Сон умок редизе тейтеренть, кона сакшнось морамо художественной самодеятельностень смотратнес. Теизе весементь, кортась Орданьбуень Культурань кудонь прявтонть Т.Ю. Курбатовань, райононь омбоце секретаренть Е.Н. Турдаковань марто. Мерсь, те тейтеренть эряви совавтомс культурань енксонтень. Истя, Надежда кармась тонавтнеме Саранскоень культурань ды искусствань колледжсэ.
– Мон понгинь пек вадря ломань юткс. Вастымизь И.Л. Сиротина кураторонок, тонавтыцянок ульнесь Т.В. Тюрина. Весе эрямом полавтовсь. Тонавтыцятнень марто – теке вейке семиясо. Баянсо седямо тонавтсь В.П. Кошелев. Те шкас пек лембестэ ледстнян тонавтнемань иетнень. Мартон тонавтнесть МР-нь заслуженной артисткась Евгения, Наталья Касаткина, сон ней вети «Умарина» ансамблянть, Татьяна Сидоркина, кона ламо иеть ульнесь Н.П. Огарев лемсэ МГУ-нь ИНК-нь прявтокс, ды лиятне, – ледстни Надежда.
Седе тов Надежда Удельновань Мордовиянть пельде кучизь тонавтнеме Московонь Гнесинтнэнь лемсэ музыкань академияв. Сеть шкатнестэ МР-нь Культурань министерствась парсте тонавтницятнень мельга пштистэ вансь, лездась, ветясь. Кода ней ледстни Надежда, сон эзь мелявто тень коряс. Весе тонавтнеманть перть эзь максо питне те профессиянтень. Морси, ды паро, мезе теньсэ, кодамо лезэсь? Вана улевельгак врачокс эли инженерэкс!
Московсо Академиясо приемной комиссиянть икеле сон морась кавто рузонь морот ды эрзянь «Умаринанть». Мерсть ловномс кодамояк стихотворения. Тесэ тейтересь талнозевсь. Мезеяк мелезэнзэ эзь леде, ансяк Лениндэ вейке валморо. Сень ловнызеяк. Тензэ путсть 10 баллт. Вейке тонавтыцясь – Л.В. Маркова – пшкадсь Надянень: «Арась мелеть невтемс прят Щукинской училищасо?». Надянень те мездеяк эзь корта. Сон тейгак сась мельде-валдо, мезеньгак апак учо. Мейле те педагогось кармась ветямо тенст «Сценическое мастерство» предметэнть. Ды весе вете иетнень перть яла тердсь тейтеренть Щукинской театральной училищав. Паряк, несь эйстэнзэ вадря артистка?
Васенце шкастонть Надежданень пек стакаль Московсо. Мольсь 1992 иесь, масторсонок ушодовсть аволь шожда шкатне. Сон покш сюкпря евты аванзо туртов, кона эзь терде велявтомс мекев. Лездась, оймавтсь, муиль эрявикс валт. Иень ютазь студенткась кармась важодеме Московонь ГУВД-нть юрсо «Горница» ансамблясо. Кенерсь тонавтнемеяк ды тосо морсемеяк. Сонсь уш лездыль семиянстэнь.
Гнесинтнэнь музыкань академиясо тонавтсть эсь тевень содыця ломанть. Тесэ эзть вано, косто тон сыть, кодамо раськень, кодамо кельсэ кортат. Тонавтыцятне макссть вадря содамочить. Эрьванть марто мукшность шка ютавтомс башка занятият. Надежда кочкизе сольной народной морамонь ды тонавтыцянь специальностенть.
1990-це иетнестэ Московсо тонавтнемстэ Надежда сеедьстэ кармась якамо эрзянь ды мокшонь общественной вейсэндявкстнэнь вастовоматнес. Сестэ РФ-нь Президентэнть пингстэ Мордовия Республикань Свалшкань представительстванть прявтокс ульнесь В.И. Чиндяскин. Ютавтовильть ламо кенярксчить. Надежда свал морыль. Весть ульнесь Раськетнень ялгаксчинь фестиваль, косо шкинемаст невтсть эрьва кодамо раськень студентт. Мордовиянь од ломантне сайсть васенце тарка, сынь невтизь «Эрзянь свадьба» коенть. Надежда нейгак кирди кеме сюлмот Мордовиянь землячестванть марто. Паро валсо ледстни РФ-нь сенаторонть П.Н. Тултаевень.
Академиянть прядомадо мейле, 1997 иестэ, Надежда Ивановнань ладизь Дзержинский ошонь эйкакшонь музыкальной школань прявтокс. Тензэ ульнесть весемезэ 24 иеть. Ансяк сонсь соды, кода ютасть васенце иетне, зяро ризнэмат ды талномат ульнесть. Те таркасонть роботась 17 иеть. Седе тов кармась ветямо общественной тевть. Ульнесь ошонь Депутатонь советэнь депутатокс, вете иеть важодсь социальной кевкстематнень коряс Дзержинский ошонь прявтонь полавтыцякс. Ветясь образованиянь, здравоохранениянь, социальной ванстомань, спортонь, культурань енкстнэнь. Ды зярдо мейскак понгиль школав – седеезэ токнозевиль. Оймезэ тердсь эйкакштненень. Ней уш вете иеть роботы эйкакшонь искусствань школань прявтокс, вети народной морамонть. Сон – РФ-нь общей образованиянь почетной роботник.
– Эйкакштнень марто важодемась канды тень кеняркс. Кецявтыть изнявксост. Арседе тынсь, сыть тей ниле иесэ эйдинеть. Ды шкань ютазь невтить пряст эрьва кодамо енкссо – киштемасо, морамосо, артомасо. Минек кедьсэ тонавтнить 480 эйкакшт. Видьстэ евтаса, талант марто чачнить аволь весе. Эряви мартост ламо важодемс! Ансяк сестэ карми лезэ. Улить регионт, косо чачить ероков ломанть. Саемга, виев вайгель марто. Истят регионтнэнь ютксо Мордовияськак. Эли жо саемс Кубаненть. Кодат тостонь эйкакштне! А виздить ломанде, а пелить сценадо. Сынь анок артистт. Нама, эрьва регионось мейсэ-бути сюпав. Монь койсэ, эйкакшонь искусствань школатне пек лездыть эйдетнень кастомасо-тонавтомасо. Тесэ тонавттано кортамояк, сцена лангсо аштемеяк. Тонавтыцятнень ютксто ламот прядызь Гнесинтнэнь лемсэ музыкань академиянть. Минек выпускниктнень малав весень эйдест сакшныть тей. Кецявты, улить эрзянь ды мокшонь тонавтницянок, – евтни Надежда Ивановна. – Нацпроекттнэнь вельде музыкальной инструментэнь рамамс школантень явозельть 11 млн целковойть. 2027 иестэ явови лезкс оборудованиянть одкстомтоманть лангс.
Надежда Ивановна тонавтницянзо марто ды сонськак ардтнесь морамо Италияв, Германияв, Болгарияв. Весть, Болгариясо концерттэ мейле, малазонзо мольсь цера, конась ютызе Ине Отечественной войнанть, парсте кортась рузонь кельсэ. Сон энялдсь морамс «Калинканть», «Катюшанть» ды лия рузонь содавикс моротнень. Кунсолось ды авардсь. Надежда Удельновань морамонзо кунсоломсто ломантне сеедьстэ авардить. Морамозо токи витьстэ седейс.
Чачома енкссто васоло эрязь, сон эзизе стувто тиринь келензэ. Пек вечки кортамо эрзякс. Ушова ютамстояк, зярдо мари эрзякс кортыця, пшкади тензэ. Куцянвелесэ савкшны эрсемс чуросто. Тосо свал эйсэнзэ учить тетязо-авазо. Сон сюкони тенст модас – лездамост, чарькодемаст, озномаст кисэ. Надежда Ивановнань покш мелезэ невтемс велень эрицятненень концерт, бажи ускомс мартонзо музыкантт. Кадык те мелесь седе курок топавтови!
Татьяна Маторкина