И. М. Яушев лемсэ оперань ды балетэнь театрасо ютась «Единство народов – единство страны» лементь ало кругловой столь. Сон алтавсь Россиянь Раськетнень вейсэндявомань иентень. Вастовомантень сакшность раськень культурань автономиянь, аволь коммерческой ды религиозной вейсэндявкстнэнь ветицятне.
Кода пачтясь МР-нь культурань, раськень политикань ды архивень тевень министрась Светлана Баулина, те иентень алтавить ламо покшчить ды сынь курок ушодовить. Сон евтнесь культурань кенярксчитнень ковкерькстэнть. Тедеде карматано тешкстамо ине скульпторонть Степан Эрьзянь чачома чистэнзэ саезь 150 иетнень. Мартсто Санкт-Петербургонь Рузонь музейсэ панжови покш экспозиция. Тосо невтевить минек музейстэ Эрьзянь 50 скульптурат ды 24 – Рузонь музеень фондсто. Кизна выставка панжови Третьяковской галереясо. Весе ноябрясь алтави С.Д. Эрьзянь юбилеентень. Карми путозь «Мой Эрьзя» балет ды тагояк – важодевксэнзэ покш выставка.
Мартонь 27-це чистэ васенцеде ютавтови Театральной искусствань ве, питневтеме кармить невтезь раськень спектаклят, сынст ваномо тердевить семиянек. Истя жо арсеви ютавтомс Семиянь ды Инечинь фестивальть. Сынь кармить Зубова-Полянань райононь Покровские Селищи велесэ.
Майстэ паро казнекс карми СВО-нь участниктнеде спектаклясь, косо эрьва кодамо раськень геройтне евтнить неезденть.
Кода свал, кармить тешкставомо Акша Келу, Сабантуй, Раськень Озкс республикань кенярксчитне. Августсто карматано тешкстамо иневанькс праведной воинэнть Феодор Ушаковонь канонизациянь 25 иетнень. «Шумбрат» фольклорной покшчись ютавтови Орданьбуесэ ды Баеньбуесэ. Теде башка, ютавтови Тиринь кельтнень весероссиянь фестиваль. Ды те – аволь весе.
Вастовомасонть ульнесь «Ассамблея народов России» Весероссиянь общественно-государственной организациянь прявтонь полавтыцясь Назиржон Абдуганиев. Сон тешкстызе, республикасонок явови покш мель раськень политикань виевгавтомантень. «Васенце таркасо важодемасонок улезэ Россиянь раськетнень вейсэндявоманть ванстомась. Теде башка, а эряви стувтнемс од ломантнеде, эряви седе кеместэ мартост важодемс», – мерсь инжесь.
Татьяна Маторкина