А. И. Полежаевень музейсэ панжовсь «Региональная пресса – голос родного края» лементь ало выставка, конась алтазь Россиянь Печатень чинтень. Эйсэнзэ невтевить эсест ды архивень фототне, эрзянь ды мокшонь журналисттнэнь документтнэ, печатень изданиятне, ютазь иень книгатне.
Пурнавозтненень пшкадсь ды евтась поздоровт профессиональной кенярксчинть кувалма 1941–1945 иетнень войнань ды трудонь подвигень Мемориальной музеень виевгавтомань коряс прявтонь полавтыцясь – А.И. Полежаевень музеень-филиалонь прявтось Лилия Наркаева. «Музейсэ важодицятнень прявт тевест – раськень историянть, культурань ДНК-нть ванстомась ды сы шкань поколениятненень сынст пачтямось. Эсь ендо, журналисттнэ бажить максомс обществантень седе виде кулянть. Минек вейсэнь важодемась пек эрявикс», – тешкстызе сон ды евтась сюкпря вейсэнь важодеманть кисэ.
Пурнавозтнень ютксо – региононь СМИ-нь ветерант, редакторт, корреспондентт ды обозревательть.
Музеень тевтееманть невтемасо благодарность максозь «Мордовия», «НТМ», «10 канал» телеканалонь редакциятненень, «Известия Мордовии» АУ-нь «Вайгель» национальной радиовещаниянтень, «Эрзянь правда», «Мокшень правда», «Присурские вести» газетатнень, «Чилисема» журналонь редакциятненень ды «Союз журналистов Мордовии» региононь общественной организациянтень.
Мордовиянь Журналистэнь союзонь председателесь, МР-нь массовой информациянь средстватнень заслуженной роботникесь, историянь наукань кандидатось, Н.П. Огарев лемсэ МГУ-нь журналистикань кафедрань прявтось Людмила Резяпкина тешкстызе, те невтемась – Мордовиянь журналистикантень ды профессиянь енкстнэнь историянтень эсь коень экскурс.
«Экспозициясь невти журналистикань ды литературань кеме сюлмонть, эдь эрзянь ды мокшонь содавикс ламо писательтне ушодсть газетань сермадовкстнэстэ», – тешкстызе выставкань кураторось, музеень научной сотрудникесь, МР-нь заслуженной поэтэсь, телерадиожурналистэсь Геннадий Гребенцов.
Региононь печатень историянть коряс нурька экскурсиянть ютавтызе МР-нь Центральной государственной архивень ведущей архиографось, исторической наукань кандидатось Виктор Шабаев.
Мероприятиянь покш инжесь – Андрей Голяков, СВО-нь участникесь, Мужествань орденсэ казезесь, Мордовиянь Журналистэнь союзс совицясь, филологиянь наукань кандидатось. Эрьва валозо, конась евтазель пурнавозтненень, пешксель домка патриотизмадо ды изнямонтень кемемадо.
Выставкадонть, журналистэнь читнеде ды профессиянть эрявиксчидензэ эсь мелест-арсемаст евтызь Мордовия Республикань массовой информациянь средстватнень, культурань заслуженной важодицятне: Николай Лобанов, Светлана Пивкина, Сергей Чернавин.
Выставкась карми важодеме февралень 7-це чис.