2026 иень август ковсто Мордовиясь ды весе православиянь масторлангось кармить тешкстамо иневанькс праведной воинэнть Феодор Ушаковонь канонизациянь чистэнть саезь 25 иетнень топодеманть.
Россиянь Федерациянь Президентэсь Владимир Путин аволь весть тешкстакшнызе минек государствань историясо апак изняво адмиралонть башка таликанзо кода Отечествань изнямонь славань кандыцянть, военной содавикс стратегенть.
Культурань ушодкстнэнь Президентэнь фондонь грантонь ярмактнень лангс ды Мордовия Республикань Прявтонть Артём Здуновонь лезксэнзэ вельде 2025 иестэ «АЛЛЮР-ФИЛЬМ» кинокомпаниясь «СОЛАР» компаниянть улеманзо вельде снимась полнометражной художественной фильма апак изняво флотоводецэнть коряс. Лентань снимамось мольсь Ярославской областьсэ, косо чачсь Фёдор Ушаков, ды Мордовия Республикасо, косо сон ютавтынзе эрямонь меельце иетнень.
Московонь ды весе Русень Патриархонть Кириллэнь баславамонзо коряс «Тайна адмирала Ушакова» фильмань премьерань невтемась ютавтовсь даволковонь 3-це чистэ Московсо Христос Спасителень Храмонь Церьковань Собортнэнь Залсонть. Тов тердезельть покш инжеть -Президентэнь Администрациянь, Правительствань, Московсо эрзянь-мокшонь землячествань ды масторонь эрьва кодат регионтнэстэ эрзянь-мокшонь диаспорань представительтне.
«АЛЛЮР-ФИЛЬМ» кинокомпаниянь генеральной прявтось ды продюсерэсь Алла Каргина ёвтась сюкпря Культурань ушодкстнэнь Президентэнь фондонь руководствантень ды Мордовиянь Прявтонтень - сынтемест фильмась бу аволь лисе. «Те ломанень покш уцяска - важодемс тынк марто, - мерсь сон. - Те продюсерэнь уцяска - зярдо тон кемат вандынь чинтень: тон нолдыть проект ды тон содат: пачтясак сонзэ педе-пев. Секс мекс ули истямо кемевикс партнер, кода Мордовия Республикань командась».
«Кенярдан, те проектэсь топавтовсь. ПФКИ-сэ весе проекттнэ топавтовить педе-пев. Те фильмась иневанькс, ине военачальникенть адмиралонть Фёдор Фёдорович Ушаковонь коряс - те ульнесь башка ответственность! Кенярдан, те ушодксось топавтовсь истя вадрясто! Кеман, те фильмась весень минек кепедьсынзе мельёжонок!» - тешкстызе РФ-нь Президентэнь общественной проекттнэнь коряс Управлениянь прявтось Сергей Новиков.
Мордовиянь Прявтось Артём Здунов премьерань ваномань пурнавозетненень пшкадемстэ мерсь: «Покш мельспаро, минек иневанькс праведной воинэсь, Россиянь Военно-морской флотонь ванстыцясь Фёдор Ушаков вейсэндимизь тесэ, Христосонь Спасителень Храмсонть. Ютазь пингень 50-це иетнестэ саезь арасель полнометражной художественной фильма адмиралонть ланга. Минь тень теинек. Покш сюкпря Президентэнь Администрациянтень лездамонть кисэ. Мон пачтинь государствань прявтонтень седе, што минь тейтяно фильма. Ды тейтяно тень, васняяк, од ломантнень туртов. Миненек эряви ёвтнемс минек геройтнеде. Весенень миненек эряви свал кирдемс мельсэ ине адмиралонть валонзо: «Илядо мелявто, неть кежей даволтнэ велявтыть Россиянь славантень».
Прявт ролень налксицясь Юрий Беляев ледстни: «Минь ульнинек инжекс Зиновий Владыканть кедьсэ. Сон казсь тень книга иневанькс праведной воинэнть Фёдор Ушаков ланга. Содынь: мезе бажан пачтямс ваныцянтень. Мордовиясо улить вийть, мель, бажамо сенень, мезенть лемдить культуракс».
«Единая Россия» партиянь Генеральной советэнь Секретарень полавтыцясь, РФ-нь Госдумасо «Единая Россия» фракциянь руководителесь Владимир Васильев тешкстызе: «Фильмань снимамось ушодовсь самай сестэ, зярдо уставась специальной операциясь - ды те ульнесь пек шкастонзо. Весенень покш сюкпря! Артём Алексеевич, уцяскав ки теть эрямосонть. Тонть уцяскав кись - те Мордовиянь изнявксось, те Россиянь изнявксось. Седе ламо бу истят церат минек Отечествасонть!»
Залось цяпась кинокартинантень стядо!
Саранскоень ды Мордовиянь митрополитэсь Зиновий мерсь, иневанькс таркасонть - Христосонь Спасителень Храмсонть фильмань невтемань ушодовомась тешксэв: «Те ёвтнемась ней пек эрявикс - эдь минек Отечестванть перька тагояк пурнавить пельть. Пазонтень кемемась ды Отечествантень вечкемась - юр минек ды минек од ломантнень туртов».
«Весемесь ансяк ушодови!» - тешкстызе Алла Каргина.
«Фильмась тусь мельс! Сюкпря!» - мерсь Тюменень областень Сургут ошонь «Масторава» эрзянь-мокшонь культурной вейсэндявксонь прявтось Геннадий Наркаев, кона чачсь Рузаевка ёнксонь Трускляй велесэ.
«Минь эзинек ульне Мордовиясо, ансяк те мелень кепедиця картинадонть мейле саинек мель улемс тынк мазый ёнкссонть», - кортасть фильманть ваныцятне.
«Тайна адмирала Ушакова» художественной фильмань Весероссиянь прокатось ушодови февралень 5-це чистэ саезь (невтицясь «МТД Медиа»). Билеттнэ меревить рамамс Пушкинской карта мартояк.