Минек газетась аволь весть ёвтнекшнесь «Восток» МАПО-нть важодемадо. Те чарькодевияк, эдь Отяжелень райононь «Мордовское агропромышленное объединение «Восток» ООО-сь – Мордовиянь велень хозяйствань покш предприятиятнестэ вейкесь. Тесэ важодемань прявт ёнксось – ламбамо якстерькаенть, сюротнень ды технической культуратнень, тикшетнень кастомась.
Ламот иетнень перть «Восток» МАПО-сь сови ламбамо якстерькаень видиця Россиянь кемень сехте вадря велень хозяйствань предприятиятнень юткс. Меельце иетнестэ хозяйствасонть башка мель явови сюракшов ракшатнень трямонтень-кастомантень ды ловсонь потявтомантень.
Неень шкасто хозяйствасонть, кода республикань велень хозяйствань лия предприятиятнесэяк, моли сюротнень ды лия культуратнень видемась. Эряви меремс, «МАПО «Восток» ООО-нь трудий ломантне неть тевтнень республикасонть ушодызь малав васенцекс. Тесэ тундонь видемантень кундасть апрелень 4-це чистэ ды, бути пертьпельксэсь карми вадря, неть читнестэ тевтнень прядсызь.
«МАПО «Восток» велень хозяйствань предприятиянть прявтсо меельце зярыя иетнень перть важоди Александр Владимирович Трошин. Агропромышленной комплексэнтень Александр Владимирович алтызе весе эрямонзо. Теде икеле велень хозяйствань прявтокс зярыя иеть важодсь Чаунзань районсо, лиясо.
– «МАПО «Восток» велень хозяйствань предприятиясь теевсь 2007 иестэ, – ёвтни хозяйствань прявтось Александр Трошин. – Эйзэнзэ совить Отяжелень райононь Ламбаськень, Трокскужонь, Целпановань, Пенькозаводонь, Тазалень, Низовкань ды истя жо Ицялонь райононь маласо аштиця велетнень модатне. Весемезэ мельганок кемекстазь 19 тёжат 980 гектарт мода. Хозяйствасонть важодить малав кавтосядт ломанть. Сынь пек вечксызь эсь тевест. Мартост эрьва мезесь топавтови вадрясто. Велень хозяйствань предприятиясонть мельде-валдо важодицят арасть. Эрьвась эсь тевензэ теи кода эряви.
Кода ёвтнесь предприятиянь прявт агрономось Николай Иванович Слугин, те иестэ «МАПО «Восток» ООО-со сюротнень ды технической культуратнень алов явозь 18 361 гектар мода. Тень ютксо 2507 гектарт шуж, 2091 гектар яровой товзюро, 355 гектарт ликша, 2002 гектарт кснав, 509 гектарт лияназ, 507 гектарт соя, 141 гектар рапс, малав 451 гектар силосокс кукуруза, 105 гектарт максозь зёрнакс кукурузанть алов. Видезь 5000 гектарт озимой товзюро. Ды истя жо 199 гектарт веиень тикшеть, 1051 гектар – ламо иень. Те иестэ 3005 гектарт максозь ламбамо якстерькаенть алов. Ды истя жо хозяйствасонть васенцеде кемекстасть видемс чиньжарамо. Сондензэ кармить 438 гектарт.
– Меельце иетнестэ ламбамо якстерькаенть алов модадонть явтано малав 3 тёжат гектарт. Те минек прявт культура ды прибылеськак эйстэнзэ седе покш, – тешксты Николай Иванович. – Те иестэ эштё варчасынек видемс чиньжарамо. Икеле те культуранть эзинек видне, ансяк меельце шкасто сюронть лангс питненть валгомась пачтимизь те мелентень. Чиньжарамось рамави парсте ды кисэнзэ питнеськак седе покш. Бути жо кортамс озимой сюротнеде, сынь лиссть вадрясто, телентькак ютавтызь а беряньстэ. Нама, улить а покш таркат, конатнень видинек одс. Ансяк истямо тевесь эрсекшни эрьва ие. Тень коряс мелявтомс а мезть. Теке марто весе озимойтне минек страховазь. Тундонь видемантеньгак анокстынек вадрясто. Арасть кодаткак стакачить видьмексэнь коряскак. Весементь анокстынек шкастонзо. Минь раминек эсенек масторонь видьмекст, нама, улить омбо мастороньгак. Раминек весе эрявикс удобрениятнень, ГСМ-нть, техникань витнема-петнема пелькстнэнь.
Тундонь видематнесэ хозяйствасонть важоди вадря техника, ламо мезе эрявикс рамазь меельце иетнестэ. Телень перть сонзэ витнизь-анокстызь ды ней весемесь моли вадря лувсо.
ВАЖОДИТЬ МЕЛЕНЬ ПУТОЗЬ
Зярдо ульнинек Ламбаськесэ, хозяйствань весе паксятнесэ мольсь виев важодема. Ве паксясонть видсть товзюро. Дмитрий Сергеевич Трофимов од механизаторось роботы омбо масторонь Massey Ferguson тракторсонть, конантень понгавтозь John Deere видемань агрегатось. Техникась пек вадря ды эряза, секскак трактористэнть тевензэ молить парсте.
– Тракторось пек вадря, сонзэ руль экшсэ важодемась – покш мельспаро. Ды сон ладияк од ломантнень туртов. Неень шкань, навигация марто. Роботы спутникенть вельде, секскак рулентькак токшемс а савкшны, бути ансяк велявтома таркатнесэ. Тракторсонть ули компьютер, конась весементь мельга домкасто ваны. Невтемга, бути видьметне мекскак эзть пра эли понгсь модань пандыне, тракторось лотки ды компьютерэнь мониторонтень лиси пачтямо, мейсэ тевесь, – корты Дмитрий Трофимов. – Видемань агрегатось истя жо вадря. Сонзэ келезэ 11 метра. Минь роботатано чинек-венек, ды весе те шканть перть сон види 140-150 гектарт.
Од цёрась хозяйствасонть важоди 2012 иестэ саезь, сась тей сеске Кемлянь аграрной колледженть прядомадо мейле. Аламос роботась, тусь армияв ды службанть ютамодо мейле велявтсь мекев. Весе те шканть перть роботась «Беларус-1221», вете иеть John Deere трактортнэсэ ды ней нилеце ие – Massey Ferguson-со. Кизна, зярдо ушодови сюротнень нуемась, Дмитрий Трофимов озы комбайнас. Те тевсэнтькак уш кемень кизэть важодсь, кавто иеть комбайнёронь лездыцяль, мейле, весементь тонавтнезь-чарькодезь, сонсь сюронь нуицякс кармась. Теде башка, сёксень шкасто цёрась роботы Ромодановань сахаронь заводонь паксятнесэ, тарги ламбамо якстерькаенть.
– Мон вана а чарькодян, мекс од ломантне оргодить велестэ ды овсе а бажить роботамс мода лангсо. Ламот ялган вахтасо ардтнить Московов, Северэв. Ковонь-ков а некшнить семияст, кудочис овсе а пракшныть. А эдь пандыть тенст зняро жо ярмакт, кода моненьгак велень хозяйствасо роботазь, – корты од специалистэсь. – Велень хозяйствасо роботамс тень пек вечкеви.
Валентина Васильевна Грачева «Восток» МАПО-со роботы сюронь ванстома утомонь прявтокс. Сонсь авась эри Ицялонь райононь Пардэлесэ. Эрьва чистэ тей ардтни. Ардомс аволь васов, теке марто предприятиясь эсь важодицятнень туртов яви транспорт, конась пачти эйсэст роботав ды мекев кудов.
Валентина Грачевань эйстэ ашти видьметнень ванстомась ды сынст вадрячист кирдемась.
– Минь домкасто вантано сюронь видьмекстнэнь анокстамонть-ванстоманть мельга, – корты Валентина Васильевна. – Кода ушодови сюротнень нуемась, сеске ушодови минек важодемаськак. Васняяк, сюрось вадрясто костяви, пштистэ ванови утомсо летькечинть мельга, штобу телень перть сюронть вадрячизэ ванстоволь. Тундо ёнов ушодтано анокстамо видьмекстнэнь: сюронть сортоватано, морятано эрявикс гербицидтнэсэ. Покш сюкпря минек прявтонтень Александр Владимировичнень, сон рамась эрявикс агрегат, конась лезды видьмекстнэнь пештнемс покш кескавс. Сон пек шождалгавты тевенть.
Ламо иеть уш хозяйствасонть важодить механизатортнэ Александр Киринкин ды Евгений Эрзяйкин. Эсь тевенть сынь содасызь парсте, секскак мартост а эрсить кодаткак мелявкст. Цёратне чарькодить куш кодамо техникас ды куроксто эрьва мезентень тонавтыть одтнэньгак.
Юлия Еремина
Фототне
Эдуард Ретунскиень