«Мясокомбинат «Оброченский» ОАО-сь – минек республикасо сехте умонь предприятиятнестэ вейкесь. Сон панжовсь 1958 иестэ Оброчноень спиртзаводонть юрсо ды ульнесь Саранскоень мясокомбинатонь филиалокс. Весе те шканть перть ламоксть полавтневсь лемезэ, 2010 иестэ саезь, МР-нь Правительстванть Постановлениянзо коряс, кармась «Мясокомбинат «Оброченский» панжадо акционерной обществакс.
Предприятиясь стявтсь од цехть, котельной, холодильникть, тевс нолдась од технологият, конат лездасть теемс эрьва кодамо продукция. Ней мясокомбинатось нолды сывелень продукция, колбасат ды полуфабрикатт. Зярыя иень перть тесэ прявтокс важоди В. И. Нужнов.
Течи «Мясокомбинат «Оброченский» ОАО-сонть важоди 61 ломань. Кода тенек пачтясть, коллективсэнть улить квалифицированной кадрат, конат парсте содасызь тевест перерабатывающей промышленностень производствасонть.
Предприятиянть улить эрявикс оборудования марто производственной зданиянзо, утомонзо, котельноезэ, автохозяйствазо. Мясокомбинатсонть важодить зярыя цехть: ракшатнень васенце переработкань цех, колбасань, анок продукциянь утом, холодильник, механической цех, ремонтно-строительной участка, электроремонтной мастерской, столовой.
«Мясокомбинат «Оброченский» ОАО-сь нолды эрьва мезть: сывелень ярсамопельть анокт ды консервированнойть, нармунень сывелень, сывелень субпродуктат; сывелень эрьва кодамо продукция микшни лавкатнева ды оптовой рамсицятненень.
Покш тарка саи сертификациянь ды стандартизациянь вешематнень коряс вадря колбасатнень нолдамось. Предприятиянть ассортиментсэ колбасань малав 60 изделият, сынь зярыя сортонь:
- пидезь колбасат (невтемга, «Русская», «Докторская», «Молочная» ды седе тов);
- пидезь-коптязь ды верекстэ коптязь (сырокопченой) колбасат («Московская», «Салями», «Венгерская» ды седе тов);
- пельскоптязь колбасат (краковская, ветчинная ды седе тов);
- деликатесэнь нолдавкст (буженина, карбонад, грудинка);
- сосискат ды сарделькат;
- полуфабрикатт: котлетат, шашлыкть, сывть (фарш), купатат ды седе тов;
- ливерэнь колбасат ды паштетт.
Весе анок продукциясь микшневи эрьва кодамо таркава, малав ветесядт микшнемань лавкатнесэ, мясокомбинатонь эсензэ лавкатнесэ. Неень шкане ветяви покш тев продукциянь миеманть коряс, вешневить од таркат, косо кармить миевеме нолдавкстнэ.
Колбасатне ды сывелень лия ярсамопельтне нолдавить тувонь, скалонь, букань сывельстэ, конась тееви первичной переработкань цехсэ. Весе ракшатне кастозь Мордовиянь агропромышленной комплексэнь предприятиятнесэ (Покш Игнатовань, Орданьбуень, Отяжелень, Ицялонь, Ромодановань районтнэсэ).
Ули меленек ёвтнемс тесэнь важодицятнеде, конат зярыя иень перть роботыть коллективсэнть, ули мезень кисэ шнамс ды ёвтамс кувалмаст паро валт.
Эрзянь авась Анна Михайловна Вдовина чачсь теске, Ицяло велесэ. Кода ледстни, вете иес эзь машто кортамо рузонь кельсэ. Чийниль бабанстэнь, конань кедьсэ эрясть студенткат, сынст марто кортамсто тонавтнизеяк келенть. Школанть прядомадо мейле тонавтнесь Н.П. Огарёв лемсэ МГУ-нь велень хозяйствань экономикань факультетсэ (ней – Аграрной институт). Прядызе 1985 иестэ ды кучомань коряс мольсь важодеме Ицялбуень «Память Ленина» колхозов экономистэкс. Кавто иень ютазь, 1987 иестэ, ушодсь важодеме Оброчноень мясокомбинатсо. Ладизь трудонь организациянь ды нормированиянь коряс инженерэкс. Те шкас важоди те таркасонть. Лангсонзо кадратне, зарплататнень ловомась, трудонь нормированиясь, трудовой договортнэ, од важодицятнень саемась, пенсияв ильтямось ды седе тов.
– Коллективесь аволь пек покш, содаса эрьванть. Малав весе тесэ важодить умок, састь сеске школанть прядомадо мейле ды роботыть пенсияв лисемазост. Ломантне парт, эсь тевест вадрясто содыцят, – пачтясь А. М. Вдовина.
Важодемадо башка, авась кувать кирдсь эсензэ покш хозяйства, кастсь тувот, букат. Ней весе юткошканзо алты вечкевикс нуцькантень. Иринанень кемень иеть, сон кецявты бабанзо вадря оценкасо. Анна Михайловна икеле пек вечксь книгань ловномо. Ней вана педясь кроссвордтнэнь содамо. Валонзо коряс, те тевесь лезды важодевтемс пряудементь. Аволь умок сон тешкстызе 60 иень юбилеензэ. Ёвтатано тензэ седейшкавань лембе валт!
Апрелень 14-це чистэ 50 иень юбилеезэ ульнесь мясокомбинатсо важодицянть Ирина Анатольевна Агаповань. Чачсь сон Саранскойсэ. 1990 иестэ прядызе Оброчноень средней школанть. Важодема кизэ ушодовсь Республикань ветлабораториясо лаборантокс. Мейле зярыя иеть важодсь Елховкань «Октябрьская» птицефабрикасо. 2005 иестэ саезь ды те шкас – «Мясокомбинат «Оброченский» ОАО-со. Васня ульнесь технической продукциянь производствань аппаратчикекс, седе тов – колбасань натуральной оболочкань теицякс, ней, рузокс сёрмадсынек – боец скота. Мясокомбинатсо важодемстэ тонавтнесь сывелень нолдамонь коряс зярыя специальностть. Тевензэ теи парсте, невтевксэнзэ вадрят, иень коряс заданиятнень топавты 104 ды седе ламо процентс. Теде башка, кирди безопасностень техникань, производственной санитариянь ды трудонь гигиенань вешематнень.
Максы превс путомат од важодицятненень, сон анокстась аволь аламо вадря специалистт. Парсте важодеманзо кисэ Ирина Анатольевна казезь ламо покш наградасо предприятиянть ды райононть пельде; тешкстазель предприятиянь почётонь доскасо; 2018 иестэ казезь МР-нь Велень хозяйствань ды продовольствиянь министерстванть пельде Почётной грамотасо, 2020 иестэ – МР-нь Госсобраниянть пельде Почётной грамотасо. Истя жо казезь РФ-нь Велень хозяйствань министерстванть пельде Почётной грамотасо, трудонь ветеран. Ирина Анатольевна эри Баева велесэ. Сон ламо эйкакшонь триця ава: кавто цёранзо ды кавто тейтерензэ.
Ольга Михайловна Липатова важоди тесэ комсь иеть. Чачсь сон Ицялбуень Баевасо. 1998 иестэ прядызе Саранскоень 35 № ПТУ-нть, косо од тейтересь тонавтнесь поварокс-кондитерэкс. Роботамо кармась специальностень коряс Ицялонь райпонь общественной питаниянь предприятиясо поварокс. Мейле ютась Ицялонь педучилищав кондитерэкс. 2003 иестэ саезь – «Мясокомбинат «Оброченский» ОАО-со сывтень теиця.
Весе неть иетнень перть тесэ важодезь, сон кармась алкуксонь специалистэкс. Парсте содасы ассортиментэнть, колбасань нолдамонь рецепттнэнь ды весементь, мезесь сюлмавозь колбасатнень нолдамост-теемаст марто. А эдь эрьва сортонть теемс эряви башка. Сон вети сывтень тееманть. Авась тонавтнесь мясокомбинатонь лия специальностть: сывелень салтыцянь ды обвальщикень.
Теде башка, Ольга Михайловна содасы колбасань ды сывелень лия продукциянь нолдамонь оборудованиянть. Тенень тонавты одтнэньгак. Тевензэ вечки, свал бажи топавтомс вадрясто. Бути предприятиясонть тевс нолдыть од технологият эли колбасань од сортт, од оборудования – те тевенть кармавтсызь О. М. Липатованень. Кие, кода аволь сон, кунды покш заданиянь топавтомо? Од колбасатнес ды сывелень лия продукциятнес теи сывть.
Ламо иень перть парсте важодеманзо кисэ Ольга Михайловна казезь предприятиянь ды райононь Почётонь грамотасо, ульнесь предприятиянь почётонь доскасо, 2017 иестэ казевсь МР-нь Велень хозяйствань ды продовольствиянь министерстванть пельде Благодарностьсэ, РФ-нь Велень хозяйствань министерстванть пельде Почётонь грамотасо.
Татьяна Маторкина