Отяжелень райононь «Сабанчеевское» ООО-со минь свалшкань инжеть. Тосонь прявтось, содавикс аграриесь, Мордовиянь велень хозяйствань заслуженной роботникесь, Славань орденэнь кавто степенень кавалерэсь Дмитрий Николаевич Игушкин зярдояк а моли каршо, бути гайневттяно самодо мельденть. Бути сонсь а вастови мартонок, муи ломань кортамс-ёвтнемс тевтнеде, тешкстамс сехте парсте важодицятнень. Сон а вечки эседензэ кортамо, ансяк бу трудий ломантнеде, сынст изнявкстнэде. Яла мери: эряви мелест кепедемс, ёжост паролгавтомс, эдь сонзэ васенце лувозо – предприятиясонть роботыцятнень кисэ аштемась.
Велень хозяйствань важодицятнень кенярксчиденть икеле минь таго сыргинек те эрзянь велентень, косо важодить алкуксонь, эсь тевень содыця, стакачиде а пелиця тейтерь-ават ды цёрат. Вейкесь эйстэст Вера Сергеевна Кочурина, тикшень-сюронь кастомань коряс прявтонь полавтыцясь. Те мазый, мизолдыця, ёроков рузавась тонавтнесь агрономокс ды уш зярыя иеть роботы Сабанцелесэ. Эрьва чистэ ардтни тов Отяжелестэ. Сонсь руль экшсэ, кись аволь кувака, асфальтось паро. Сонзэ лавтов лангсо паксятнень сокамось, сюротнень кастомась, удобрениятнень валномась ды цёратнень марто кеместэ кортамось. Истят неень шкане велень аватне, кода сёрмадсь классикесь: «Лишме ардомсто лоткавты, палыця кудос сови»… Мезеяк сядо иетнес эзь полавтово. Вера Сергеевнань «Нивась» Z букванть марто содавикс весенень, сон а эрси ваньксэкс, чоп паксява, пульга, рудазга. Чоп тевсэ, пиже валскестэ чокшнес.
Сёксняяк тевтне а маштнить. Ней Кочуринань мелявксозо паксясто ламбамо якстерькаенть «Ромодановосахар» заводов саемась-ускомась. Сонсь якстерькаесь 2 тёжат гектартнэстэ уш весе таргазь, эряви ансяк пурнамс. Пертьпельксэсь а максы тевенть теемс эрязасто, пиземеть, паксятнес машинатне а совавить, ялатеке уш 50 проценттнэ урядазь, ускозь заводов октябрянь меельце читнес малав 40 тёжат тоннат. Кода корты агрономось, вана кельмевти ды тевтне туить седе эрязасто. Хозяйствась арси саемс паксятнестэ 60 тёжадо ламо тоннат. Кода жо алкукс карми, невтьсызь ноябрянь меельце читне. Зярс якстерькаень урожайностесь 350 центнерт гектарсто ды те цифрась аволь меельце.
Теке марто уш анокт цётамотне сюронь саеманть коряс. «Сабанчеевское» ООО-со сюрось видезель весемезэ 5750 гектартнэнь лангсо. Пивсэзель 27 тёжат тоннат, озимой товзюродонть саинек 10 тёжат тоннат, – ёвтни Вера Сергеевна. – Урожайностесь 49 центнерт гектарсто ды те цифрась пек паро! Кой-кона таркатнестэ седеяк ламо саинек».
Тундонь мелявкстнэнь, кувака пиземетнень лангс апак вано, конатне кодаяк эзть максо ушодомс видематнень, урожаесь тедеде кенярдовтынзе весень. Пертьпельксэськак, буто чумонзо марязь, начтсь моданть шкастонзо, видестэ ульнесть кайсезь сюротнень-тикшетнень сэвицятнеде ванстомань средстват ды ломантнеяк бажасть роботаст теемс парсте, кизна эрьвась салсесь эрьва маней часонть, штобу урядамс сюронть куроксто ды ёмавкстомо. Неть ёнкстнэде пек ламось ашти велень хозяйстватнесэ. Вера Сергеевна корты, шнамс эрявить весень, тешкстамс киньгак башка а эряви, роботанть тейсь целанек команда, одтнэстэ саезь сыретнес.
Предприятиясонть шкастонзо ды сатышка пурназельть силосось ды сенажось (6 ды 4 тёжат тоннат), скалтнэнень ды букатненень ярсамс тикшесь ванстови 1,5 тёжат тоннат.
Неть читнестэ, зярдо якинек Сабанцелев, тосо мольсь тундонень модань сокамось, озимойтнень видемась, минеральной удобрениятнень каямось ды анокстамось сёксень-телень лия тевтнес. Тракторонь паркстонть вастынек ансяк вейке механизатор, кона сась паксясто ды ванськавтыль сокамканть педязь моданть эйстэ. Аловелестэ Василий Иванович Сорокин роботы тесэ механизаторокс, весемезэ трудонь стажозо 38 иеть. Кизна сон важоди комбайнёрокс, тельня витни-петни техниканть, сёксня кепеди паксятнесэ моданть. Маней чистэ трактористэсь юты 20-25 гектарт, ансяк пиземев шкатне зярс а максыть лисемс неть невтевкстнэс. Ялатеке велень хозяйствань кенярксчинтень, келя, весе икеленек путозь вешематнень топавтсынек, кемевти Василий Иванович ды капши поладомс тевензэ.
«Сабанчеевское» ООО-со эштё а содыть, зярдо кармить тешкстамо те покш кенярксчинть, тевтнеде эштё зярыя. «Коень коряс, – корты прявтось Дмитрий Николаевич Игушкин, – явшетяно трудий ломантненень казнеть республикань ды райононь велень хозяйствань кенярксчитнень тешкстамотнеде мейле. Зярс жо сыре ломанень ковонть кувалма пенсионертнэнень предприятиясь кудова явшесь кеменень-кемень килограммат сахар. Ярмаконь лезкс, мекев а велявтовиця субсидия, карми максовомо мобилизованнойтнень семияст туртовгак. Бути кодамояк мелявкс лиси кудоюткова, сонзэ решамось свал карми васенце таркасо!»
Паксянь ветеранонтень – памятник
Россиясо ды икелень Союзонь республикатнесэ муевить сядодо ламо памятникть, конатне стявтозь ДТ-54 тракторонтень, кода сынст нолдыця заводтнэсэ, истя жо велень хозяйстватнесэ. Кодамояк лия трактор тень кувалма сонзэ а икельдясы. Вьетнамсо жо те «кшнинь лишминенть» портретэнзэ путызь 5 донгонь (тосонь ярмаконь лемесь) купюранть лангс. Постаменттнэс ды банкнотатнес неть трактортнэ понгсть аволь стяко: неть, лангс ваномс а пек ёроков ды а пек мазый, машинатне топавтсть се шкатнестэ покштояк покш ды стакадояк стака тевть: зяро модат-паксят сынь сокасть ды видсть, кодашка лезкс макссть колхозонь тружениктненень ды кодашка эскелькс икелев тейсь отечественной промышленностесь, зярдо ДТ-54 тракторонть нолдызь серийной производствас.
ДТ-54 тракторось а весть ульнесь художественной фильмань героекс. Те тракторсонть сокась паксятнень целинань содавикс изницясь Иван Бровкин «Иван Бровкин на целине» фильмасонть (1958 ие). Фильмась снимавсь аволь косояк павильонсо эли Москов ало – овсе тосо, целинасо, Оренбургонь «Комсомольский» совхозсо. «Дело было в Пенькове» лия содавикс киносонть (1957 ие) Вячеслав Тихоновонь ды Юрий Медведевень геройтне кавто ДТ-54 трактортнэсэ усксесть канаткак, пелькстасть «кинь тракторозо седе виев». Ледстясынек лия се шкань фильматненьгак, кода «Первый эшелон», «Первый парень», «Ссора в Лукашах», «Калина красная», косо неть ДТ-54 трактортнэ аволь ансяк кивчкаить кадратнесэ – эрьва ёндо невтить эсь виевчист.
«Сабанчеевское» ООО-со, тракторонь-машинань парконть чиресэ, ДТ-54 якстере тюсонь тракторось стявтозель колмошка иеде теде икеле хозяйствань прявтонть Дмитрий Николаевич Игушкинэнь мелензэ коряс. Сон теезель Алтаень тракторонь заводсо ютазь пингень 60-70-це иетнестэ. «Те памятникесь аволь ансяк «дизелентень», весе велень тружениктнень туртов, конатне а содыть оймсемат, истят жо виевть, кода кшнинь ялгаст. Те весенень невтевкс, кодат кеметь эрсить велень ломантне», – тешксты Дмитрий Николаевич. Тракторось постаментсэнть аволь кшнинь чаво кеврунго, сон, теке сыре воин, бути эряви, ванды жо сти стройс ды полавтсынзе нуцьканзо-правнуцьканзо. Велень хозяйствань ветерантнэ ваксканзо ардомсто сеедьстэ ледстнить эсест од шкаст, конась сюлмавозь те легендарной тракторонть марто. Ламонь сон ульнесь васенце тракторокс ды, кода васенце вечкемась, сон а стувтови зярдояк.
«Мельвановикс велень хозяйствань труженикть ды ветерант! Ёвтан седейшкавань поздоровт тынк кенярксчинк – Велень хозяйствань ды перерабатывающей промышленностень важодицятнень чинть кувалма. А стяко те праздникесь кезэрень коень коряс тешкстави сёксня, сестэ, зярдо паксятнесэ изнявить покш тевтне ды «пси шкадонть» мейле сыть чить аламодо лекстямс. Теке марто велень хозяйстватнесэ тевтне зярдояк а прядовить, а сёксня, а тельня, секскак тынк трудонк питнейчизэ мейсэяк а онкстави ды зярдояк кодамояк сырнесэ а пандови. Тынь алкуксонь неень шкань геройть, тынк вийсэ раштави раськень сюпавчись ды кирдеви тиринь масторонь продовольственной безопасностесь. Покштояк покш сюкпря сырнень кеденк, кемечинк, эсь тевень вечкеманк кисэ! Седейшкава арсян тенк шумбрачи, уцяскав эрямо, кудосо – парочи, мельванома ды сэтьме менель прянок велькссэ!»
Дмитрий Николаевич Игушкин,
«Сабанчеевское» ООО-нь прявтось.
Марина ДЕВЯТОВА