Пятница, марта 29, 2024
Важное

«Агропромсервис» ООО-сь – велень хозяйствань кеме ды виев предприятия. Сон сови Мордовиянь агропромышленной вейсэндявксонть юрс. Неень шкане хозяйствась важоди сюронь ды ламбамо якстерькаень кастомань, сюракшов ракшатнень ды алашатнень трямонь ёнкстнэсэ. 

Меельце кемголмово иетнень перть предприятиянть прявтсо ашти превей ды ёроков аграрникесь, эсь тевень вадрясто содыця ломанесь Владимир Ильич Нужнов. Сонзэ самонзо марто тесэ пек ламось полавтовсь – хозяйствась стясь кеме пильге лангс, весемесь одкстомтовсь, важодемась ладявсь од лувсо.

Ды кода тешксты Владимир Ильич, теньсэ покш путовксост эсест важодицятненьгак. Эдь «Агропромсервисэнь» коллективесь – алкуксонь важодицят, эсь тевень вечкицят ды чарькодицят.
Течи минь тынк содавттадызь хозяйствань прявт специалисттнэнь марто, конатнень эйстэ ашти сюракшов ракшатнень шумбрачист, потявтозь ловсонть ламочись, ракшатнень кирдема таркатнень ваньксчись ды конатнень вийсэ весе коллективсэнть кирдеви ояксчи ды важодемань сэтьме лув. Неть ломантне – фермань важодицятне.

Прявт зоотехникекс хозяйствасонть вана уш зярыя иень перть важоди Татьяна Николаевна БУРНАКОВА. Вановтонзо ало эрьва скалось, эрьва вазнэсь. Сон пштистэ ваны ракшатнень андомань, потявтомань технологиятнень топавтоманть мельга, вети племенной тевтненьгак, мезенть лувсо вадрялгавтови поголовиянть вадрячись ды кастовить производственной невтевкстнэ.

Сон истямо мельспаросо ёвтнесь эсь важодемадонть, сеске редяви, ломанесь эсензэ таркасо.
– Эйкакш шкасто саезь пек вечкан ракшат. Секскак школадо мейле тонавтнемеяк молинь Кемлянь сестэ эштё совхоз-техникумов зоотехникень тевентень, – корты Татьяна Бурнакова. – Ды сонзэ прядомадо мейле карминь важодеме лишмень заводсо. Зярс роботынь алашатнень марто, мейле жо аравтымизь прявт зоотехникекс сюракшов ракшатнень трямонь фермав. Ды комсешка ие уш те таркасонть.

Кода тешкстызе Татьяна Николаевна, хозяйствась сынст аволь вишкине. Неень шкане сюракшов ракшатнеде весемезэ лововить 1300. Сынст эйстэ 560 – потявтовиця скалт. Важодицятнеде фермасонть малав ведьгемень ломанть, конатнень эйстэ кемнилеетне – потявтыцят.

– Потявтыцятнеде минек ламо, эдь скалтнэ кирдевить сюлмсезь (привязное содержание), – тешксты прявт зоотехникесь. – Целанек жо коллективесь вадря, эсь тевень вечкицят. Ламот важодицятне – од ломанть. Те пек паро.
Тесэ потявтозь ловсонть рамицянзо улить аволь ансяк эсенек республикасо, сонзэ томбалеяк. Истя, хозяйствась эсь ловсонть мии Чувашиянь «Ядринмолоко» ОАО-в, «Маслосырзавод «Починковский» АО-в ды сырань теемань эсенек заводтнэс.

– «Ядринмолоко» заводось минек саи высшей сортонь ловсо. Сон юты эйкакштнень туртов продукциянь теемантень, – тешкстызе Татьяна Бурнакова. – Починкань заводось минек ловсодонть теи элитной сырат, ловсо, топо ды лия продукция. Эряви меремс, неть предприятиятнень марто минек теевсть уш кеме сюлмот. Секскак важодемасо кодаткак кевкстемат а лиснить. Ловсонть мельга сынь сакшныть кемекстазь графикень коряс, свал шкастонзо.
Бути жо кортамс сывельденть, сон целанек юты эсенек «Оброченский» сывелень комбинатс, косо эйстэнзэ теевить эрьва кодамо колбаса ды сывелень лия продукция.

Эряви ёвтамс, теске жо, «Агропромсервиссэ», важоди Татьяна Бурнаковань цёразо Александр. Сон кочкизе аванзо кинть ды эсь эрямонть истя жо сюлмизе велень хозяйстванть марто. Александр БУРНАКОВ, кода авазояк, тонавтнесь зоотехникень тевентень васняяк Кемлянь аграрной колледжсэ, а мейле эсь содамочитнень ламолгавтынзе Н. П. Огарёв лемсэ МГУ-со. Предприятиясонть важоди вейксэ иеть. Васняяк ушодокшнось зоотехникекс, 2018 иестэ саезь роботы осеменаторокс.

– Роботась аволь шождатнестэ. Ансяк монень мелень коряс. Прям марян эсень таркасо, – тешкстызе Александр Бурнаков.
Предприятиянь эштё вейке од специалистэсь – ветеринарной врачось Александр ГРАЧЕВ. Цёрась тесэ важоди вете иеть.



– Тей роботамо сынь эсень мелень коряс. Эштё школасо тонавтнемстэ кемекстынь эстень, карман ветеринарной врачокс. Те бажамонть топавтыя. Школанть прядомадо мейле молинь тонавтнеме Н.П. Огарёв лемсэ МГУ-нь Аграрной институтов «Ветеринарной врач» специальностенть коряс. Тонавтнинь «Агропромсервис» ООО-нть пельде, секскак университетэнть прядомадо мейле монь арасель мелявтома, ков молян важодеме. Эйсэнь уш учость тесэ. Договоронь коряс монень эрявсь роботамс вете иеть. Сынь уш ютасть, мон жо кадовинь. Мезекс полавтнемс таркатнень. Минек тесэ вадря коллектив, важодеманть кисэ пандыть вадря зарплата. Мезе эштё эряви?! – кемекстызе Александр Грачев.

Эштё вейке од специалистэсь – зоотехникесь-селекционерэсь Наталья ЗАХВАТОВА. Тейтересь роботы малав ниле иеть. Ды кода тешкстызе, ракшатненень вечкемась васняяк школадо мейле пачтизе Н. П. Огарёв лемсэ МГУ-в зоотехникень тевентень тонавтнеме, мейле жо ветизе «Агропромсервисэв».



– Мон чачинь-касынь велесэ, ды весемесь, паряк, моли тосто. Авам, Людмила Васильевна, ды тетям, Сергей Николаевич, свал трясть ламо ракшат. Ды мон вишка порасто саезь свал лездылинь тенст. Секс монськак ней важодян велень хозяйствасо, – корты Наталья Захватова. – Эсь тевем вечкса ды лия лангс а полавтса. Университеттэ мейле мон эштё прядынь селекционерэнь курсат ды ней важодян селекциянь тевтнесэ, лиякс меремс, касттано тесэнь ракшатнень вадрячинть.
Кода ёвтнесь Наталья Захватова, селекционной материалонть сынь рамить кода эсенек, отечественной, истя германской ды американской селекциянь. Букатнень кочкамсто ваннови продуктивностесь, мель явови ракшанть рунгонтеньгак.

– Ней минек хозяйствасо кирдевить раужо голштинизированной породань скалт ды букат. Ды осеменениянть теемстэ тевс нолдави голштинской породась. Те породанть ловсонть коряс невтевксэнзэ а берянть. Истя, иезэнзэ вейке скалсто саеви 14 тоннат ловсо, улить истяткак, конатне максыть 15 тоннат. Минек хозяйстванть туртов те а берянь. Эдь скалтнэ кирдевить сюлмсезь ды иензэ перть андомань рационось вейке, – корты Наталья Сергеевна.

Кода тешкстызе селекционерэсь, эсь важодеманть сон вети «Селэкс» программасонть. Ды бути эрсить кодаткак полавтомат, сон свал ардтни эсь квалификациянь кастомань курсатнес.

– Неть курсатнень минек туртов арси-аноксты республикань Велень хозяйствань ды продовольствиянь министерствась ды сынь эрсить Практической тонавтнемань центрасо. Истят курсатне минек туртов эрявикст ды лезэвть. Эдь программантень совавтовиця од ёнкстнэнь муемс костояк лиясто а кода, – тешксты Наталья Захватова.
Нама, эсь важодицятнень содамочист кастомга ламо теи предприятияськак. Прявтось Владимир Ильич Нужнов парсте чарькоди, неень шкане важодемасо од ёнкстнэ – те кеме ды виев предприятия ванды.



Юлия Еремина
Фототне Эдуард Ретунскиень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».