Эрямосонок эрьва ломанесь вастови а стяко, тенень савсь тень кемезевемс аволь весть. Ламо ялгатнень ютксто улить истят, кинь марто алкуксонь оякс теевинь аволь сестэ, зярдо сонзэ пельде мезеяк эряви, эли, мекевлангт – мон кодамо-бути тувталонь коряс эряван. (Ней истя сеедьстэ эрямосо эрси). Пазось кучизе тень сазоркакс Валентина Васильевна Солдатовань, Саранск ошонь округонь колмоце номер эйкакшонь поликлиникань, эйдень кавто кужонь (121 ды 58 №№) дошкольной отделениянь врачонть сестэ, зярдо эсь эйдень уш кассть ды тусть эрямо ве ёнов. Кода ульнесть вишкинеть, чуросто мартост совсинь лецямонь учреждениятнес (ульнесть ваныцян). Сонзэ жо ансяк чамалицяс содылия.
Кеменьшка иеде икеле вастовинек, кортазевинек ды се шкастонть саезь свал карминек аволь ансяк гайневтнеме, вейке-вейкенень кенярксчитнестэ мельспаронь явомо, стака шкасто валсо-тевсэ лездамо. Виде, сонзэ перька свал эрсить пек ламо ломанть, лецямонь коряс эрьва кодамо кевкстема марто секе-тев тензэ пшкалить. Телефонозо оймсема читнестэяк а чатьмони, бути эряви, кудовгак чии, ков сатыть виензэ, весенень лезды. Лиясто арсезеван, косто зняро вийть, весенень лембень максома, паронь арсема саи те эрзянь тейтерь-авась.
Койсэнь, обуцянь ламо паро ёнкстнэ ютыть тенек тетянок-аванок, покштянок-сырькаенек эйстэ. Валентина Васильевна чачсь-кассь Орданьбуень райононь Орозбие велень ламо эйкакшонь триця Волковтнень семиясо. Тетязо, Василий Фёдорович, ды авазо, Раиса Васильевна, трясть-кастсть кото эйкакшт. Валентина ульнесь омбоцекс, тень кувалма мельганзо чачозтнень весень савсь тензэ аволь ансяк вишка порасто ваномс, истя жо, покшсто касозьгак, пингень перть тенст лездамс. Валентинань оштё вишка пингстэ ульнесь покш бажамозо врачонь тевентень. Школань прядомадо мейле васня тусь тонавтнеме Ардатовань медучилищав «Эйкакшонь лецямонь учреждениятнесэ медицинань сестра» специальностенть коряс. Истя, кемгавксово иесэ тонадсь малавиксэнзэ лецямо, ормалгадозтнень мельга якамо.
Важодемань пингезэ ушодовсь Республиканской эйкакшонь васенце номер больницясонть. Виде, аволь весень медучилищань прядомадо мейле сайсызь операционной сестракс, Валентина Волкованень (тейтерьксэнь фамилиязо) те кемемась максозель ды сон идесь эйсэнзэ парсте. А стяко мартонзо важодиця врачтне аволь весть тензэ мерекшнесть поладомс тонавтнеманзо вузсо. Видьстэ меремс, эсензэ тейтерькантькак ульнесь покш мелезэ тонавтнемс Н. П. Огарёв лемсэ Мордовской государственной университетэнь медицинань факультетсэнть.
Валентина Васильевнань мелесь седе курок топавтоволь, бути сон сыргаволь се кияванть, конань тензэ ёвтакшнызе содавиксэзэ: улемс иень перть лаборантокс ракшань лецямонь кафедрасо. Ансяк сон эзизе полавто тень лангс операционной сестрань тевенть. Теде мейле, колмо иень перть снартнесь улемс студентэкс, ансяк нилеце терявтомасонть теевсь медфаконь чокшнень отделениянь студенткакс.
Истя лиссь эрямосонзо, васенце курстнэстэ лиссь мирденень эсест велень цёранть И. Я. Солдатовонь экшс. Шкань ютазь одтнэнь чачсь Юлия тейтернест. Тесэ ушодовсть алкуксонь стакачитне, нардевчинь варчамотне. Те шкас ёвты покш сюкпря сыре патянстэнь, кие кадызе велесэ кудонзо ды сась эйкакшост ваномо Саранскоев. Чинь-чоп больницясо важодсь, чокшне тонавтнеме якась, веньперть тонавтнесь лекциятнень, анокстась экзаментнэс. Паро, сонензэ прась уцяска эрямс вечкиця, чарькодиця ды эрьва тевсэ тензэ лездыця мирде марто, кие тейсь весементь, штобу низэ аволь ансяк шкастонзо прядовлизе вузсо тонавтнеманзо, васняяк домка содамочить пурнаволь малав сисем иень перть.
Тешкстасынек, Валентина Васильевнань эйстэ лиссь тевензэ парсте содыця, весенень лездамо капшиця алкуксонь врач. Сонзэ участкасонзо ульнесть кавксосядто ламо эйкакшт ды вестькак эзь лисекшне апаро тев. Сеть орматнень, конатнень сон путылинзе эйкакшонть ванкшномадо мейле, свал кемевтсть больницятнесэ, ков пачтясть вишкинетнень. Нама, эрямось сонзэ эзь кольневтне. Ульнесь истямо шка, зярдо лоткакшность якамо пильгензэ, зярдо сонзэ лецицятне эзть сода, мезе мартонзо теемс ды кода стявтомс пильге лангс. Иеде ламо сон эзь яка, эзь стяво ацамотнень лангсто. Самай истят шкатнестэ пряст невтьсызь алкуксонь ялгатне, малавикстнэ. Алкуксонь оянзо эзизь кадо, свал ульнесть вакссонзо ды лездасть тензэ. Мирдезэ теизе весементь: усксесь эйсэнзэ иневанькс таркатнева, мукшнось тензэ паро лецицят. Нурькинестэ, теизе весементь пильге лангс стявтомга, пешксе эрямонтень велявтомга. Натой, тенень эзть кеме мартонзо важодиця врачтнеяк.
Пазось макссь тензэ велявтома эрямос, кемема, сон поладызе вечкевикс тевензэ ды кармась важодеме аволь вейке, мик кавто ломаннень лиясто а топавтовикс тевсэ.
Солдатовтнень покш кенярксост – Юлия тейтерест ды Екатерина нуцькинест. Неть читнестэ В. В. Солдатова тешкстызе юбилеензэ. Сонзэ лемс те шкас ёвтавить ламо лембе валт ды паронь арсемат.
Валентина Васильевна! Минь вейсэндявтано неть паро валтнэс ды арсетяно теть уцяска, валдо мельть-бажамот, весе арсезенть топавтома ды шумбрачисэ кувака пингень эрямо!
Валентина Юдина
Мон ёвтан покштояк покш сюкпря тиринь аванень эрямонь каземанть, весе лембензэ ды вечкеманзо максоманть, трямонть-кастоманть, тонавтневтеманть ды виде килангс стявтоманть кисэ. Монень зярдояк а стувтовить эйкакшпингень кенярксов читне, чокшне ланга ёвтнезь ёвкстнэ ды мадстемань морынетне.
Весементь кисэ сюконян тензэ модас. Кадык вечкевикс авам карми шумбра, уцяскав ды сонзэ чачосонзо свал карми налксеме мизолкс.
Вечкезь, тейтерезэ Юлия Тюгаева.
* * *
Валентина Васильевнань марто вейсэ ютась эйкакшпингенек, касынек прок патят-сазорт. Вейсэ тонавтнинек Ардатовань медучилищасо. Те шкас кадовсь ледстнематнес, кода эрьва субутань чокшне Орданьбуестэ Орозбиев малав колоньгемень вайгельбеть вейсэ ялго ютылинек, пелеве шкане кудов пачкодилинек.
Минек ояксчись поладовсь Саранскоев эрямо самстояк, вейсэндясь вейке тевесь – врачокс тонавтнемась, вейке-вейкенень эрьва тевсэ лездамось.
Минь сонзэ марто лиясто апак кортаяк чарькодилинек, мезе эряви теемс вастовомсто, кодамояк апак учонь тевень лисемстэ.
В. В. Солдатова лецясь ды нейгак леци аволь ансяк эйкакшом, нуцькам, весе малавиксэнь, кинь коряс тензэ савкшны пшкадемс. Ды мик кисэнек озныцянок, духовной тетянок вейке.
Кадык Пазось Валентина Васильевнань ванстсы апаро тевтнеде, максы тензэ вийть икелепелевгак важодемс тевензэ парсте содазь ды ормалгадозтненень лезэнь кандозь.
Светлана Антипова,
МР-нь Клинической перинатальной
центрань врач.