«Эрзянь правда» газетань коллективсэнть теевсь паро коекс ловныцятнень ютксо эрьва кодамо пелькстамонь ды налксемань ютавтомась. Од иенть каршо тиринь газетась «Мордовская государственная филармония» ГБУК-нть марто вейсэ тейсь казне минек ловныцятненень. Социальной сеттнень ваныцянок ды ловныцянок ютксо налксевсь тердема Од иень спектаклянь ваномо ды кузнэнть перька киштеме.
Вайгелень максомадо мейле изницякс лиссь «Республиканская клиническая больница им. С. В. Каткова» Мордовия Республикань ГБУЗ-нь хирургической корпусонь реанимациянь ды анестезиологиянь медицинской сестрась Елена Коткова.
Вана истя, 2023 иень важодемань меельце чистэнть, Елена Валерьевнань вастыя минек редакциянь холлстонть. Сон сакшнось тенек изницянь казне мельга. Тешкстасынек, те од авинесь важоди пек ответственной таркасо, сонзэ профессиясь сюлмави эрьва чистэ ломанень эрямонь идеманть марто. Мартонзо содавиксэкс теевемадо мейле арсинек ланганзо сёрмадомс, кода сон кочкизе те а шожда тевенть, кить сонзэ малавиксэнзэ ды мезе вечки тееме юткошкасто.
– Елена Валерьевна, инескеть, ёвтнеде эсенк ланга, косо чачиде-касыде, кить тетянк-аванк?
– Монь чачома ёнксось – Отяжелень райононь Наборные Сыреси велесь, тосо ютась эйкакш пингем, тосо эрить тетям, Валерий Васильевич, ды авам, Валентина Николаевна. Авам важоди эсенек ёнксонь Козловкань средней общеобразовательной школасо вишка классонь тонавтыцякс, тетям эрямонзо сюлмизе велень хозяйстванть марто, сон – агроном. Ули эштё вишка ялаксом, лемезэ Анатолий, сонензэ 28 иеть.
Тешкстаса, вишкапингстэ сеедьстэ эрсинь Сабанцелесэ, те авань чачома таркась. Тосо ней эри бабам Анастасия Дмитриевна Гусева. Сон монь ламо тевень тееме тонавтыцям, васень лездыцям, превс путыцям. Бабань авазо Отяжеле ёнкссо паро стыцяль ды парсте кодамо маштыцяль. Те кедьчелькев ломанесь ламонь тонавтсь вечкевикс тевезэнзэ, те шкас эйсэнзэ ледстнетяно ансяк лембе валсо.
– Косто сась тенк арсемась улемс медицинасо важодицякс?
– Эштё школасо тонавтнемстэ ульнесь покш мелем сюлмамс эрямом медицинанть марто. Виде, икелепелев содынь, тосо карми улеме покш конкурс, бажинь седе домкасто тонавтнемс «химия» ды «биология» предметтнэнь. Видькстан, сеске, школанть прядомадо мейле, бажинь молемс тонавтнеме Н.П. Огарёв лемсэ МГУ-нь Медицинской институтов, ансяк тевем эзь лисе ды максынь экзамент Саранскоень медицинской колледжс… Тесэяк мелем эзь топавтово, кедень ялатеке эзинь нолда. Иень перть важодинь ды анокстынь экзаментнэс, истя таго снартынь тонавтнеме кочказь профессиянть коряс. Содынь, а шожда карми тень теемс, ялатеке кемемась ды мелесь эйсэнь покшоль. Видькстан, пек кенярдынь, зярдо иень ютазь теевинь Саранскоень медицинской колледжень студенткакс. Ледстневи, практикам ютыя «С. В. Катков лемсэ РКБ» МР-нь ГБУЗ-со. Реанимациянь ды анестезиологиянь отделениясо васенцеде улемстэ сеске чарькодинь, те тевесь монь!
– Важодемань васенце чинть мельсэ кирдтядо?
– Нама, те ульнесь сисем иеде икеле. Сон монень зярдояк а стувтови. Ледстневи, августонь 4-це чистэ монень эрявсь васенцеде молемс важодема таркав. Марявсь, икелень вестэнть тунь эзинь удояк, яла талнынь, кода тосо вастсамизь, топавтови-арась тень максозь тевесь…
Те шкас эзь стувтово вейке тевесь. Важодемань ашо оршамопеленть кандыя мартон, а вана пряс путомс мезеяк эзинь сае. Ледстяса, кода чевтестэ ды стамбарнэ тень сестэ мерекшнесь старшей медицинской сестрась Ирина Ивановна Федосеева: «Те кода истя, тон стувтык чепчикеть?» Сонсь жо тень сеске венстизе эрявиксэнть…
Виде, ламось ашти седе, кодамо таркас тонь аравттадызь важодеме. Васень шкасто теньсэ покш лезкс тень макссь минек больницянь главной медицинской сестрась Татьяна Анатольевна Иванова. Сон васня кучимим терапевтической отделениянь реанимациянь ды интенсивной терапиянь отделенияв. Эзь сёпово тень, эдь монь ульнесь покш мелем важодемс реанимациянь ды анестезиологиянь отделениясо. Шкань ютазь пшкадинь Татьяна Анатольевнанень топавтомс арсемам. Те шкас ёвтан тензэ покш сюкпря, монь марямонть ды мелень топавтоманть кисэ.
– Елена Валерьевна, инескеть, ёвтнеде, кода цидярдынк пандемиянь шканть?
– Видьстэ мерян, те шкась аволь ансяк республикань, масторонь весе медиктненень ды стакасто сэредицятненень ульнесь нардевчинь лангс варчамонь шкакс.
Васень стакачись, васняяк, ормась а содавиксэль, кияк эзь машто ды эзь сода, кода сонзэ лецямс ды мейсэ? Арасельть ормадонть ванстыця оршамопельть ды ламо лиясь эзь сатно… Ледстневи, ормась сась тенек 2020 иень апрелень васень читнестэ, ковось эштё эзь прядово, мон уш ормалгадынь… Мезесь миненек макссь вийть, те коллективсэ вейке-вейкень кисэ аштемась, вейке-вейкенень лездамось.
Минек, медицинской сестратнень, парсте вейсэндясь ды кепедсь меленек старшей медицинской сестрась Ольга Ивановна Кузнецова.
– Мезе вечктядо тееме юткошкасто, бути сон тынк эрсекшни?
– Видьстэ мерян, сондензэ пек аламо. Мирдем Алексей Александрович марто кавоненек важодтяно ды касттано кавто цёрынеть. Васенцентень, Егорканень, вете иеть, омбоцентень, Матвейнень, ансяк кавто. Сынь кавонест якить эйдень кужов. Кизэнь лембе читнестэ ильтятано эйсэст велев покштяст-бабаст туртов. Вечктяно вейсэ пертьпельксэнь мазычитнень ванкшномо, вирев якамо, пангонь-ягодань кочкамо. А эштё тетянок-аванок туртов садпирень тевтнесэ лездамо. Юткошкасто эйкакштнень туртов стакшнан оршамопельть. Вана Од иень кенярксчинтень стынь тенст мазый костюмт, лавкасто рамазетнень эйстэ допрок а явовить! Нать, бабань пельде ютась тень те ёрокчись. Кода иля корта, гентнэнь ковгак а тейсыть.
ВАЛЕНТИНА ЮДИНА