Четверг, марта 28, 2024
Важное

Декабрянь 19-23-це читнестэ Саранскоень Эень дворецсэ ютасть эй лангсо конькасо кирякстнемань коряс Россиянь Чемпионатонь пелькстамотне. Участниктне ды содавикс жюрись республикав састь седе икеле читнестэ. Инжетнень туртов кенкшест панжокшнызь ошонь од отельтне: «Шератон» ды «Меркюри». Содавикс спортсментнэстэ пелькстамотнес сакшность Кореясо Олимпийской налксематнень чемпионкась Алина Загитова, сиянь медаленть саицясь Евгения Медведева, Европань ды мирэнь чемпионкась Елизавета Туктамышева, юниоркатне Александра Трусова, Анна Щербакова, Олимпийской налксематнень призёрось Михаил Коляда, юниортнэнь ютксо чемпионаттнэнь призёртнэ Дмитрий Алиев, Александр Самарин, Олимпиадасо сиянь медалень саиця паратне Евгения Тарасова ды Владимир Морозов, Наталья Забияко ды Александр Энберт ды ламот лият. Чемпионатсонть ульнесь минек республикань эй лангсо кирякстнемань школань воспитанникесь Владислав Катичевгак.

Чемпионатонть панжомась ушодовсь Мордовиянь филармониянь артисттнэнь морамотнестэ-киштематнестэ ды республикань эй лангсо кирякстнемань коряс Олимпийской резервань спортонь школань тонавтницятнень ёрокчинь невтемастонть.
Мордовия Республикань Прявтось Владимир Волков шумбракстнемстэ мерсь, региононть туртов покш мельспаро ютавтомс колмоцеде истят покш пелькстамот. Тень туртов Саранскойсэ ули весемесь. Эень дворецтэнть башка, республикасонть роботыть эень вельтязь вейксэ аренат. Курок панжови эште вейке неень шкантень ладиця площадка Универсальной залсонть 8 тёжат таркас.
Пелькстамотнень панжомо сакшность СССР-нь заслуженной тренерэсь Татьяна Тарасова, Россиянь Эй лангсо конькасо кирякстнемань коряс федерациянь президентэсь, олимпийской чемпионось Александр Горшков, ФФККР-нь генеральной директорось Александр Коган. Сыненст Владимир Волков казсь Славань III-це степенень ордент.
Эсест воспитанникест Чемпионатонтень ускокшнызь весенень содавикс тренертнэ Этери Тутберидзе ды канадецэсь Брайан Орсер. Васенце каналонь трансляциятнень комментировасть олимпийской чемпионось Алексей Ягудин ды содавикс тренерэсь Татьяна Тарасова.
Теке жо чистэнть эсест нурькине программаст невтизь эй лангсо кирякстниця цёратне ды паратне. Чокшне фигуристтнэ ваныцятнень кенярдовтызь эй лангсо киштематнесэ.
Пецясто Эень дворецэсь ваныцятнеде пештязель тыц, эдь 14 чассто тесэ ушодовкшнось сехте талновтыця программась. Ёрокчист нурькине программасонть невтизь тейтертне-фигуристкатне, мейле мелест коряс программасонть весень кенярдовтызь цёратне, ды чокшне ёнов ютавтозельть киштематне.
Те чись ульнесь пек дивавтовтыцякс. Нурькине программанть невтезь, тейтертнень ютксто изнясь Алина Загитова, омбоце тарканть саизе Александра Трусова, колмоценть – Алена Косторная. Евгения Медведева лиссь ансяк кемнилееце таркас, зярыя прамонзо кувалма судьятне валгстызь баллонзо. Ансяк сехте покш талномась кадовсь омбоце чинтень.

Пецясто уш ёвтазельть Чемпионатсонть изницятне. Цёратнень ютксо «сырненть» саизе Максим Ковтун, «сиянть» – Михаил Коляда, «бронзанть» – Александр Самарин. Мордовиянь фигуристэсь Владислав Катичев кармась кевейкеецекс. Эй лангсо киштеманть коряс изницякс лиссть Виктория Синицына ды Никита Кацалапов. Омбоце тарканть саизь Александра Степанова ды Иван Букин. Колмоцекс лиссть Софья Евдокимова ды Егор Базин.
Субутасто васняяк мелест коряс программанть невтизь паратне ды сонзэ коряс ёвтазельть изницятне. Евгения Тарасова ды Владимир Морозов сайсть васенце тарка. Омбоцекс кармасть Наталья Забияко ды Александр Энберт, колмоцекс – Александра Бойкова ды Дмитрий Козловский.
Тейтертнень мелест коряс программась лиссь истямокс, кодамокс кияк эзь арсеяк. Васняяк Евгения Медведева прась кирнявтомсто, мейле истя жо Алина Загитова тейсь зярыя асатыкст. Теке марто юниоркатне невтизь пряст пек парсте, ды секскак васенце таркась максозель од тештинентень Анна Щербакованень. «Сиянть» саизе Александра Трусова, «бронзанть» – Алена Косторная. Алина Загитова сайсь ветеце тарка, Евгения Медведева – сисемеце. Ансяк юниоркатне-изницятне иест кувалма а нолдавить Европань Чемпионатов Минскоев. Январень 23-27-це читнестэ Федерациянь исполкомось ильтясынзе пелькстамотнес Станислава Константиновань, Алина Загитовань ды Софья Самодуровань. Запаснойкс кармить Евгения Медведева ды Елизавета Туктамышева.
Соревнованиятнень прядовомадо мейле эенть лангс ваныцятне ёртнесть пек ламо налкшкеть, цецят, някат, секскак тейтерькатне-фигуристкатне Алина Загитова ды Евгения Медведева Од иенть каршо явсть мель: весе казнетнень ускомс Ялгань эйкакшонь школав-интернатов.
М.Девятова

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».