Январень 19-це чистэ Ашо Кудосо ютась кенярксчинь промкс, кона алтавсь Россиянь Печатень чинтень. Журналисттнэнь туртов лембе валт ёвтась Мордовиянь Прявтось Владимир Волков. Сон тешкстынзе массовой информациянь средстватнень эрявиксчист, валонзо коряс, журналисттнэнь паро важодемась лезды муемс стакачитнень ды сынст витемс.
Коень коряс те вастовомасонть В.Д.Волков ютавтынзе 2018 иень цётамотнень. Мордовиясь а ашти ве таркасо. Валовой региональной продуктось кассь 5%, промышленностень производствась – 9%. Прявтось тешкстызе, покш путовксост теньсэ инновационной ды высокотехнологической продукциянь нолдамонь предприятиятнень. Кассть микшнемань, транспортонь, связень, социальной сферань услугань невтематне. 6,8% кассь средней заработной платась.
Паро изнявкст тейсть аграрийтне, сень лангс апак вано, кодамо ульнесь пертьпельксэсь (тунда ульнесть якшамот, кизна – арасельть пиземеть). Пурназель 1 миллион 144 тёжат тоннат сюро, средней урожайностесь вейке гектарсто 28 центнерт (ПФО-со те сехте покш невтевксэсь). В.Д.Волков мерсь, велень хозяйствань производствась Мордовиясо меельце кото иетнень перть ансяк касы.
Ули мезень кисэ шнамс строительтнень. Футболонь коряс масторлангонь чемпионатонтень шкастонзо ды парсте стявтозельть объекттнэ ды инфраструктурась. Теде башка, республикась тевс нолдась социальной инфраструктурань стявтомань покш программа. Те: панжовсть од школат, эйдень кужот, здравоохранениянь объектт, теезь эрямонь малав 334 тёжат кв.метрат ды килангонь 100 вайгельпеть.
Паро невтевкст улить продукциянь экспортонь коряс. Меельце вете иетнень перть миемась кассь нилексть. Экспортось юты 65 масторов. Сынст ютксо Китаев, США-в, Германияв, Иранов, Австрияв, Великобританияв, Швейцарияв, Японияв ды лия масторов.
2018 иень цётамотнеде кортамсто МР-нь Прявтось ледстизе республикань государственной долконть. «Меельце шкане молить ламо кортамот региононь бюджетэнть коряс, – мерсь Владимир Волков, – минек долкось икеленек – те стявтозь эрьва кодат объектт, килангот, велень хозяйствась. Минь ютавтынек ярмактнень касомас-кепетемас. Ламо иетнень перть васенцеде тевс нолдынек республикань профицитной бюджет. Те – социальной ёнкс марто бюджет. Социальной сферанть кастомга ютавтови малав 62% весе расходтнэнь эйстэ. Тень вельде сы иестэяк карматано тевс нолдамо республикань касомань-кепетемань программат, стявтомо седе ламо эрямо таркат, кастомо зарплатанть. Минь састыне велявтсынек долконть. Теньсэ, тешкстаса, тенек лездыть Правительствась ды Россиянь Минфинэсь».
В.Д.Волков мерсь, 2018 иень весе цётамотнень сон пачтясынзе МР-нь Государственной Собраниянтень эрьва иень Кучомасонзо.
Ютазь иень сехте покш чикс МР-нь Прявтось ёвтынзе Россиянь Президентэнь кочкамотнень ды Футболонь коряс масторлангонь чемпионатонть. Бути кортамс икелепелень аравтлувтнеде, сынь сюлмавозь «О национальных целях и стратегических задачах развития до 2024 года» РФ-нь Президентэнть Указонзо марто.
Маласо шкасто национальной кемгавтово покш проекттнэнь вельде тевс нолдавить федеральной 67 проектт. Мордовиясь карми явомо мель 55 проекттнэнень.
«Минек туртов те лезды топавтомс ламо ёнксонь коряс арсеманок, максови федеральной финансирования сеть проекттнэнень, конат эрявить республикань эрицятненень, конат алтавить экономикань ды социальной сферань касомантень, – мерсь Владимир Дмитриевич. – Ламо топавтови медицинасо: минь прядсынек Химмашсо эйкакшонь поликлиниканть стявтоманзо, Юго-Западсо стявттано Республиканской эйкакшонь больницянь хирургической од корпус, онкодиспансерэнь поликлиника. Ламо проектт улить промышленностьсэ ды велень хозяйствасо. Карматано кепедеме заработной платанть. Кемтяно, ламолгадыть республикасонть эрицятне. Нацпроекттнэс путовксось карми истямо жо, кода Футболонь коряс масторлангонь чемпионатонтень».
2021 иестэ саезь республикасонть киланготнень витнемга-стявтомга кармить явовомо 3 млрд. целковойде седе ламо (бути ваномс неень шканть коряс).
Весе неть од ёнкстнэ ды вешематне, кода тешкстызе Мордовиянь Прявтось, кармить невтевеме телевидениянь эфиртнэсэ ды пачтявомо газетань лопатнесэ. Теде башка, В.Д.Волков пшкадсь СМИ-тненень, райононь газетатнененьгак, седе виевстэ важодемс Интернетсэ.
«Исследованиятне невтить, онлайн-аудиториясь касы. Информациянь вешнемстэ ломантне сеедьстэ тевс нолдыть цифровой СМИ-тнень. Кортамс ловныцятнень марто недлязонзо весть газетанть вельде – те ютазь шка. Ней весенень тенк эряви кеместэ важодемс Интернетсэ, эрявить ванстомс ловныцятнень», – мерсь республикань Прявтось.
В.Д.Волков мерсь, неень шкане а сатны видечинь невтемась, питнейчи канды информациянть видестэ пачтямось. Республикань СМИ-тнень прявт вешемась – а ёмавтомс эсь лементь.
Профессиональной кенярксчинть кувалма яволявтозельть ды казевсть МР-нь Прявтонь журналистэнь конкурсонь изницятне ды призёртнэ. В.Д.Волков ёвтась тенст лембе валт, арсесь кеме шумбрачи, уцяска, паро эрямо ды изнявкст.