Воскресенье, мая 28, 2023
Важное

Январень 23-це чистэ МР-нь Государственной Собраниянь комсеце сессиясонть примазель кадрань пек эрявикс решения. Депутаттнэ кирдизь Дмитрий Поздняковонь кандидатуранть МР-нь Правительствань Председателень таркантень. Меленть аравтомс сонзэ те таркантень икелепелев ёвтызе республикань Прявтось Артём Здунов.

 

Сессиядонть икеле Дмитрий Александрович вастневсь весе фракциятнень ды комитеттнэнь марто. Промкссонть сон макссь каршо валт депутаттнэнь кевкстемаст лангс. МР-нь весе фракциятне – «Единая Россия», «КПРФ», «ЛДПР», «Справедливая Россия – Патриоты – За правду», кирдизь сонзэ кандидатуранть.

Региононь Прявтонть валонзо коряс, Поздняковонь содасызь кода вадря прявтонть ды политикенть, конань улить тевень ветямонь коряс эрявикс содамочинзэ. «Дмитрий Александровичень тынь вадрясто содасынк, сон чачсь ды кассь минек республикасо. Васняяк, Дмитрий Александрович од, тень лангс апак вано, сонзэ улить кеме содамочинзэ ды сон превей управленец. Ламо иень перть ульнесь республикань сехте виев велень хозяйстватнестэ вейкенть – «Норов» агрофирманть  прявтсо. Соды производствань одкстомтомадонть, инвестициянь программатнеде, од инвестпроекттнэнь нолдамодост, велень хозяйствань производствань од ёнкстнэнь панжомадост ды социальной эрявикс ушодкстнэнь топавтомадост. Ней пек эряви, стакачитнень содазь, седеяк кастомс минек социально-экономической виевгавтомань вадря аравтлувтнень. Секскак арсян, Правительстванть прявтсо улезэ ломань-хозяйственник, васов неиця, финансонь дисциплинань чарькодиця, трудонь коллективтнень марто важодеме маштыця», – мерсь Мордовиянь Прявтось Артём Здунов.

«Васняяк ёвтан сюкпря Мордовия Республикань Прявтонтень Артём Алексеевич Здуновнень лангозон покш кемеманть кисэ. Мон вадрясто чарькодьса, кодамо покш канст эряви кандомс Правительствань Председателень таркасонть. Монь тевтееманть юрсо карми аштеме Государственной Собраниянтень республикань Прявтонь Кучомась, сеть кевкстематне, конат эйсэнзэ токшезь. Неть: финансонь секторонь шумбралгавтомась, мобилизованной эрицятненень ды сынст семиятненень лездамось, региононь эсь доходтнэнь кастомань коряс важодемась, социально-экономической виевгавтомань программатнень топавтомась, республикань инвестициянь ёрокчинть ванстомась, производстватнень кадрадо пештямось, здравоохранениянть ды образованиянть коряс важодемась, эрямо таркатнень ды китнень строямось, ЖКХ-нть витнемась-вадрялгавтомась, региононь туристэнь потенциалонь виевгавтомась», – мерсь Дмитрий Поздняков.

Дмитрий Александрович Поздняков чачсь 1980 иень июнень 27-це чистэ Мордовиянь Кочкуровань райононь Семилей велесэ. 2003 иестэ прядызе Н. П. Огарёв лемсэ МГУ-нь юридической факультетэнть. 2004-2006 иетнестэ ульнесь «Норов» ОАО-нь прявтокс. Теде мейле 2008 иес важодсь Кочкурбуень райононь администрациясо, васня прявтонь васенце полавтыцякс – велень хозяйствань управлениянь прявтокс, мейле – райононь прявтокс. Седе тов мекев велявтсь тиринь велень хозяйстванть кепедеме. Дмитрий Александрович сови «Наставничество» проектэнтень, конань ушодыцякс кармась «Моя Мордовия» экспертэнь клубось.

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».