Апрелень 3-це чистэ Владимир Чибиркинэнь прявтсо ютась Мордовия Республикань Государственной Собраниянь сисемеце тердемань ведьгемень кавксоце сессиясь. Сонзэ важодемасонзо ульнесть Мордовиянь Прявтось Артем Здунов, МР-нь Прявтонь ды МР-нь Правительствань Администрациянь члентнэ, министерстватнень ды ведомстватнень руководительтне, истя жо муниципальной районтнэнь прявттнэ.
Ваннозь промксонь повесткань 19 кевкстемат.
Мордовиянь Госсобраниянь депутаттнэ кемекстасть покш мель лездамс республикань од аватненень. Сондензэ кортави «О внесении изменения в статью 6.1 Закона Республики Мордовия «О мерах социальной поддержки отдельных категорий населения, проживающих в Республике Мордовия» законопроектсэнть, конань совавтызе Социальной политикань коряс комитетэсь ды конань яволявтызе комитетэнь прявтось Наталья Долматова. Икеле од аватненень, кить чачтызь 25 иес васенце эйкакшонть 2025 иень июлень 1-це чистэнть саезь 2026 иень июлень 1-це чинть самс, пандовиль региононь лезкс – 100 тежат целковойть. Те программась поладозь 2027 иень июлень 1-це чинтень, ды од аватненень, кить чачтыть 2026 иень июлень 2-це чистэ саезь 2027 иень июлень 1-це чис, кармить пандомо уш 150 тежат целковойть.
Эште вейке прявт проектэсь, конась яволявтозель промкссонть, аравтозь СВО-нь участниктнень семиятненень лездамонтень. Кемекстазь «О гарантиях прав членов семей лиц, пропавших без вести в период участия в специальной военной операции» законопроектэсь, конань совавтызе МР-нь Прокурорось Сергей Лапин. Мордовиясо уш нолдавить специальной военной операциянь участниктнень семиятненень лездамонь тевтне. Ансяк емазтнень семиятне кадовкшность правовой тевтнеде ве ено. Те законопроектэсь вансты семиятнень, кинь малавиксэст емасть кулявтомо СВО-нть шкасто тевтнень топавтомсто, ансяк конатнень коряс эште эзь сова закононь вийс судонь решениясь кулозекс яволявтомадо.
Совавтозь полавтомат Мордовия Республикань башка законтнэс уроз эйкакштненень ды тетявтомо-ававтомо кадовозь эйкакштненень лездамонть виевгавтомга.
Сессиясонть кемекстазь закон, конань коряс меревить вейке муниципальной образованиянь бюджетстэ лия муниципальной образованиянь бюджетэнтень кредитэнь максомань тевтне. Истя жо кемекстазь бюджетэнь истямо кредитэнь максомань, тевс нолдамонь ды велявтомань лувось.
Истя жо ванкшнозь лия законтнэнь кемекстамодо ды законопроекттнэс полавтоматнень совавтомадо кевкстематне.
Сессиянть лувсо ютавтовсь «правительственной час» Мордовиянь омбудсментнэнь марто. Кунсолозь региононь Предпринимательтнень праваст ванстомань коряс уполномоченноенть Елена Юрченковань ды Эйкакштнень праваст коряс уполномоченноенть Наталья Юткинань пачтямотне. Сынь тешкстызь сынст лемс пачтязь пшкадематнень марто важодемань цетавкстнэнь ды евтнесть кемекстазь тевтнеде. Тешкстазель, целанек республикасонть ветяви покш важодема бизнесэнь ветямонть ды предпринимательтнень потенциалонь топавтоманть туртов условиятнень тееманть, эйкакштнень ды эйкакш марто семиятнень эрямост вадрялгавтоманть коряс.