Четверг, марта 28, 2024
Важное

Сентябрянь 23-це чистэ Мордовияв сакшнось «Единая Россия» партиянь Генеральной советэнь Президиумонь Федеральной мониторингень группась. Минек республикав самонь тувтлось  – регионтнэсэ национальной проекттнэнь топавтомаст мельга ваномась. Тешкстасынек, те группась теезь Россиянь Правительствань Председателенть, партиянь прявтонть Д.А.Медведевень кармавтоманзо коряс.

Мордовиясо улемстэ активисттнэ содавтызь Покш Березникень, Ташто Шайговань, Лямбирень, Темниковань районтнэнь ды ульнесть Саранск ошонь округонь образовательной ды здравоохранениянь учреждениятнесэ.

Теде мейле МР-нь Госсобраниянь Покш залсонть ютавтовсь покш вастовома республикань активенть марто. Сонзэ панжизе ды ветясь МР-нь Госсобраниянь Председателень полавтыцясь В.В.Алехин.

Васенцекс пурнавозтнень икеле кортась РФ-нь Госдумань Культурань коряс комитетэнь прявтонь васенце полавтыцясь О.М.Казакова. Ольга Михайловна ульнесь Мордовиянь райононь зярыя Культурань кудотнесэ, ваннынзе республикань ды муниципальной някань театратнень, пачколесь Покш Березникень одкстомтозь Культурань кудонтень ды республикань Кардиоцентрантень. Неть весе объекттнэсэ улемадо мейле сон тешкстась: велетнес эрявить седе ламо тевест парсте содыця специалистт. Кастомс велень культурань важодицятнень зарплатаст.

РФ-нь Федеральной Собраниянь Госдумань депутатонть Н.Н.Пилюсонь вановтонзо коряс, минек республикасо башка мель явови раськень культурантень ды ули весемесь туризманть виевгавтомга, ансяк те кевкстеманть коряс эряви эштё важодемс.

Кода тешкстызь инжетне, минек республикасо ламо тееви инновациянь продукциянть нолдамонзо коряс, те тевентень вузсо тонавтнемстэ одтнэнь кармавтомга. Истя, Госдумань депутатось, Образованиянь ды наукань комитетс совицясь Т.В.Касаева ульнесь Ёроков эйкакштнень туртов республикань лицейсэнть. Теде башка, содавтынзе Технопарконть, оптикань волокнань теемань заводонть ды Н.П.Огарев лемсэ МГУ-нть. Весе тосо неезенть ды марязенть коряс мерсь: «Мордовиясь – инновациянь регион ды эрявить келейгавтомс продукциянь миемань рынкатнень, теемс наукань кеме база».

Седе, кода Саранскойсэ паролгавтовить ошонь ульцятне, кудотнень перька таркатне, мелензэ-арсеманзо ёвтызе Госдумань депутатось И.В.Сапко. Сон покш питне путсь «Формирование комфортной городской среды» нацпроектэнть коряс теезь Ине Изнямонь 70 иетненень алтазь парконтень, кармавтсь тосо ютавтнемс седе ламо культурно-массовой мероприятият. Ташто Шайговань Новотроицкой школанть содавтызе Госдумань депутатось Т.В.Касаева. Сон путсь покш питне сенень, кодат виевть ды тевест парсте содыця тонавтыцят тосо важодить.

* * *

Теке жо чистэнть «Единая Россия» Партиянь Генеральной советэнь Президиумонь мониторингень  Федеральной группась ульнесь Мордовия Республикань Прявтонть  В.Д.Волковонь кедьсэ. Вастовомсто МР-нь Прявтось путсь покш питне национальной проекттнэнень, конатнень ёвтынзе РФ-нь Президентэсь В.В.Путин. Сонзэ валонзо коряс, Мордовиясь эрязасто ушодсь сынст топавтомо, 56 федеральной проекттнэнь пелькстнэсэ важодить минек республикань эрицятне.

В.Д.Волков ёвтнесь региононть социально-экономической тевтнеде, промышленностьсэ, велень хозяйствасо, образованиясо, медицинасо невтевкстнэде.

Эсь ёндо, мониторингень группань прявтось О.М.Казакова ёвтась сюкпрянь валт республикань прявттнэнь, министратнень вейсэнь лезэв важодеманть кисэ. Сон тешкстась, Мордовиясь – те 23 регион, ков састь сынь важодеме.

Нацпроекттнэнь коряс теевиця объекттнэнь марто содавиксэкс теемстэ сынь редизь сеть паро ёнкстнэнь, конат талномо а кармавтыть, весе объекттнэ теевить ды тевс нолдавить шкастонзо. Сехте эрявиксэкс ёвтызь сень, штобу ломантне марявлизь лезэв ёнкстнэнь национальной проекттнэнь топавтомсто ды тевс нолдамсто.

Кода мерсь МР-нь Госсобраниянь Председателень полавтыцясь В.В.Алехин, Мордовиясь сеске кундась икелест аравтозь задачатнень топавтомантень. «Единой Россиянть» пельде сеске ульнесть кемекстазь ответственной ломанть РФ-нь Госдумань, МР-нь Госсобраниянь, муниципальной образованиянь депутатонь представительной органтнэнь пельде.

Валентина Юдина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».