Неть читнестэ Мордовия Республикань Госсобраниянь депутатось В.В.Руженков ульнесь республикань някань (куклань) театрасо, косо ютавтовить витнемань тевть. Тешкстасынек, «Единая Россия» Мордовской региононь отделениянь Региононь Политической советэнь Президиумонть кармавтоманзо коряс эрьва кодамо уровенень депутаттнэнь мельга кемекстазть объектт, конат теевить национальной проекттнэнь юрсо. Истямо лувось ладязь сень коряс, штобу неть объекттнэ витневельть парсте ды шкастонзо панжовольть.
Журналисттнэнь марто вастовомсто В.В.Руженков пачтясь объекттнэнь мельга пштистэ ванномань эрявиксчинзэ.
– Минек васень тевенек аволь ансяк ваномс объекттнэнь парсте ды шкастонзо теемаст мельга, истя жо исполнительной властень органтнэнь ды общественностенть марто топавтомс вейсэ арсезенть.
Владимир Викторевич Республикань някань театрасо улемстэ вейсэ подрядной организацинять марто витнемань тевтнень ванкшномадо мейле макссь зярыя кевкстемат. Эксплуатационно-ремонтной предприятиянь прявтонтень М.АКрыловнень. Эдь театрасонть неень шкане ютавтовить латонть одс теемась, киякстнэнь витнемась, уштомапеленть, валдомтоманть, толонть а нолдамонь сигнализациянть ветямось.
Тешкстасынек, государствань республикань някань театрась партиянь проектсэнть 2017 иестэ саезь. Сонзэ прявтось Евгений Романовский «Культура малой Родины» партиянь проектэнь региононь общественной советэнь прявт.
В.В.Руженков башка мель явсь театранть перька мазылгавтомань ды паролгавтомань кевкстемантень. Вастовомасонть тешкстазель, «Культура малой Родины» федеральной партийной проектэнть вельде республикань някань театрантень кармить рамамо вейксэ таркасо кавто автобуст, конатнесэ сынь кармить якамо спектакляст марто республикань районтнэва ды велетнева. Тень туртов арсеви явомс 4 млн. 600 тёжат целковойть. Транспортось пачтяви ковонть ютксто, а одкстомтозь театрась панжови 2019 иень ноябрянь васенце чистэ.
Республикань някань театрань прявтось Евгений Романовский сюкпрянь валтнэнь ёвтамодо мейле нурькинестэ пачтясь течинь тевдест ды изнявктост. Васняяк пачтясь автобустнэнь эрявиксчидест. Тешкстась, театрась совась «Большие гастроли» федеральной целевой программантень.
– Ютазь иестэ минь ютынек Равчирень федеральной округонть ды пачколинек Кавказов. Тедеде арсетяно молемс Грозный ошов, – мерсь Евгений Романовский. – Мордовияв учотано инжеть Кемеровань ёнксонь Новокузнецк ошсто.
Валентина Юдина