МР-нь Государственной Собраниясо ютась сисемеце тердемань 30-це сессиясь. Промксонтень сакшность МР-нь Прявтось Артём Здунов, исполнительной органонь властень ды местной самоуправлениянь органонь прявттнэ, сенатортнэ. Ваннозельть 18 кевкстемат. Кемекстазельть республикань башка законтнэс од полавтоматне.

Саемга, полавтомат совавтозельть налогонь пандомань ниле законтнэс. Ули-паро лангс налогт лоткить пандомо сеть организациятне, конат нолдыть телекоммуникационной оптоволокна. Налогонь те льготась максови тенст 2027 иень декабрянь 31-це чинть самс.

«Неть законтнэнь кемекстамось лезды минек предпринимательтненень, республикав тердевить од инвесторт, тевс нолдавить неень шкань инвестиционной од проектт, конат лездыть виевгадомс региононтень», – тешкстась МР-нь Правительствань Председателень полавтыцясь Наталья Таркаева.

Полавтомат совавтозельть «О дополнительной мере социальной поддержки лиц из числа детей-сирот и детей, оставшихся без попечения родителей» закононтень. Сындест пачтясь МР-нь прокурорось Сергей Лапин. Ней уроз эйкакштненень ды эйкакштненень, конат кадовсть тетяст-аваст вановттомо, мереви эрямо таркань сертификатонть ютавтомс ипотекань кредитэнь пандоманть лангс. Од вешемась алтави сетненень, кинень топодсть 23 иеть. Теда башка, сынст улезэ свалшкань зарплатаст, пандозь весе налогост, арась судимостест ды психической ормаст, илязо уле алкогольной ды наркотической зависимостест.

Сессиясонть кемекстазель МР-нь Государственной Собраниянть РФ-нь Государственной Думань Председателентень Вячеслав Володиннэнь ды РФ-нь Правительствань Председателентень Михаил Мишустиннэнь пшкадемазо – кемекстамс федеральной законодательствасо лоткавтомс эйкакшонь каявтоманть пешксесэ аватненень, лоткавтомс аборттнэнь пропаганданть. Мордовиясь минек масторсо васенце регион, конась кемекстызе те закононть. Ванкшнозельть ламо лия кевкстематкак.

Татьяна Маторкина