Декабрянь 23-це чистэ ютась Мордовиянь Госсобраниянь сисемеце тердемань 55-це сессиясь. Промкссонть ульнесть Мордовиянь Прявтось Артем Здунов, региононь Правительствань члентнэ, властень исполнительной органтнэнь ды местной самоуправлениянь органтнэнь представительтне. Депутаттнэ ванкшность повесткань 27 кевкстемат.
Вемельсэ кирдезель Алексей Гришакинэнь кандидатуранзо МР-нь Правительствань Председателень полавтыцякс аравтомадо. Сонзэ вановт алов саевить ЖКХ-сь ды строительствась. «Ломантнень туртов неть енкстнэ сехте пиштевтицят», – тешкстызе Артем Здунов.
Совавтозельть полавтомат «О налоге на имущество организаций» МР-нь Закононь 3-це статьянтень, косо ванкшнови 2028 иень декабрянь 31-це чис налоговой льготань действиянть кувалгавтомазо сеть организациятнень туртов, конатнень важодемаст сюлмавозь почтань связенть марто.
Истя жо совавтозельть полавтомат «О физической культуре и спорте в Республике Мордовия» МР-нь Закононтень, конань вельде седеяк ламо ломантненень карми максовомо эрявикс социальной лезкс. Сынст ютксо ламо эйкакшонь триця семиятне, истя жо боевой действиянь весе категориянь ветерантнэ ды сынст семияст.
Полавтомат совавтозельть «О дополнительной государственной жилищной поддержке семей при рождении детей» МР-нь Закононтень. Васняяк неть полавтоматне кандовить сеть семиятненень, косо арась тетясь эли авась. Тесэ а карми мельс саевеме яволявтыцянть тетянзо-аванзо ендо эрямо таркась, сень лангс апак вано, нинть эли мирденть семиязо сермадстозь сынст эрямо таркасонть. Арсеви, те Законось лезды бюджетэнь сферань, государственной ды муниципальной службань роботниктнень эрямо таркаст ды демографиянть паролгавтомасо.
Од полавтоматне совавтозельть «О мерах социальной поддержки отдельных категорий населения, проживающего в Республике Мордовия» Закононтень: общественной транспортсо питневтеме ардомань правась максови нужачисэ эриця семиятнестэ студенттнэнень, конатне тонавтнить СПО-нь организациятнесэ.
«Об административной ответственности на территории Республики Мордовия» МР-нь Закононь 15 статьянтень полавтовкстнэнь вельде покшолгавтови штрафтнень покшолмась сеть ломантнень, должностной ды юридической лицятнень лангс, кить колызь кемекстазь вешематнень Мордовия Республикань государственной символиканть коряс.
Истя жо совавтозельть полавтомат «О патриотическом и духовно-нравственном воспитании в Республике Мордовия», «О правовых актах Республики Мордовия» ды лия законтнэс. Мордовиянь судьянь квалификационной коллегиянь общественностень представителекс аравтозель Сергей Буренин, республикань Адвокатской палатанть юрсо квалификационной комиссияс Мордовиянь Госсобраниянь представителекс кочказель Светлана Петрикова.
Нама, теке жо чистэнть МР-нь Госсобраниянь сессиясонть покш мель явозель 2026–2028 иетнес региононь бюджеттэ законопроектэнтень.
2026 иентень Мордовиянь бюджетэсь доходтнэнь коряс лиссь 79,3 млрд целковойть, расходтнэ – 77,8 млрд целковойть. Кода тешкстызе Мордовиянь финансонь министрась Сергей Тюркин, 62,2% расходтнэ, эли 48,4 млрд целковойтне явовить социальной сферантень: образованиянтень, здравоохранениянтень, социальной политикантень, культурантень, спортонтень, СМИ-тненень.
2026 иень бюджетсэнть ванстовить ярмакт китнень теемга-одкстомтомга, велень хозяйстванть, ЖКХ-нть ды транспортонть кемекстамга-виевгавтомга.
Мордовиянь Госсобраниянь Председателень полавтыцясь, Бюджетэнь, финансонь ды налогонь коряс комитетэнь председателесь Сергей Вдовин мерсь: «Бюджетэсь арсезь васняяк ломантнень эрямост паролгавтомга, республикань Прявтонть Кучомасонзо прявт вешематнень топавтомга. Тосо тешкставить истят прявт кевкстематне, конатне талновтыть кочкицятнень (руз. избиратели). 2026 иестэ ламо ярмакт явовить общественной транспортонть одкстомтомантень (221,6 млн целковойть, те колмоксть седе ламо 2025 иенть коряс), лифттнэнь полавтомантень (300 млн целковойть, мезесь истя жо колмоксть седе ламо). Бюджетэнть кемекстамодо мейле минь пек пштистэ карматано ваномо сонзэ расходтнэнь мельга».
Законопроектэнть толковамосо ульнесть фракциятнень руководительтне: Наталья Долматова («Единая Россия»), Дмитрий Кузякин («КПРФ»), Евгений Тюрин («ЛДПР») ды Тимур Гераськин («Справедливая Россия – За правду»). Истя жо кортась Счетной палатань председателесь Николай Ларьков.
«О республиканском бюджете Республики Мордовия на 2026 год и на плановый период 2027 и 2028 годов» МР-нь Законось кемекстазель вемельс сазь (единогласно).