Неть читнестэ МР-нь Госсобраниясо ютавтовсь «кругловой столь», косо кортамось мольсь районной прессанть важодемадо, уликс стакачитнеде ды сы шкань аравтлувдонть.
Сонзэ панжизе ды ветясь МР-нь Госсобраниянь Председателень полавтыцясь, Социальной политикань коряс комитетэнь прявтось Наталья Долматова.
Тосо ульнесть МР-нь Госсобраниянь Председателень старшей лездыцясь Иван Москаев, МР-нь Финансонь министрань полавтыцясь Ольга Шапошникова, Мордовиянь Журналистэнь вейсэндявксонь прявтось Людмила Резяпкина, Районной газетатнень журналистэнь ассоциациянь прявтось Юлия Черенкова ды республикань райгазетань редакторт.
– Районной прессась – лиятнень ёнов а молиця, – мерсь промксонть панжомсто Наталья Долматова. – Сонзэ прявт тевезэ – невтемс сеть событиятнень, конат малавикст ловныцятненень, ваномс ды невтемс райононть туртов эрявикс проекттнэнь тевс нолдамост, сынь истя жо вейсэндить семиятнень ды цела поколениятнень. МР-нь Госсобраниясь ламо иень перть ютавтни «Закон и власть» журналистэнь пелькстамонть, косо тешкаставить республикань ды райононь СМИ-тнень сехте паро важодевкстнэ. Райгазетатнень улить эсь старницаст социальной сеттнесэ, косо пачтить кулятнень.
Сеть тиринь таркатнеде сермадовкстнэнь эрявиксчидест, конатнеде сёрмадыть райгазетатне, пунавозтненень пачтясь МР-нь Журналистэнь вейсэндявксонь прявтось, «Рузаевские новости» медиахолдингень прявт редакторось Людмила Резяпкина. Сон тешкстась, ламот од ломантне райгазетатнень ловныть сынст сайтнэстэ ды соцсеттнестэ. Райононь газетатнестэ истя жо ламот ловныть кулятнень. Теде башка, сынь кадовить эште духовно-нравственной питнейчитнень ванстыцякс.
Райгазетатненень финансонь лезксэнь максомадо промкссонть кортась МР-нь Финансонь министрань полавтыцясь Ольга Шапошникова. Сонзэ валонзо коряс, явовиця ярмактне иестэ иес ламолгавтовить.
Меельце шкастонть зярыя редакциятне лиснить изницякс грантонь саемасонть. Тень коряс ледстязельть Рузаевкань, Ардатовань, Теньгушевань ды Краснослободской районтнэ.
Те промкссонть ульнесь кортамо подписной изданиятнень тарифной политикадонть. Теде толковамот тейсть Федеральной почтань связень минек региононь управлениянь специалисттнэ. Башка темакс ливтезель кадратнеде кевкстемась. Тешкстазель, газетатнесэ а сатныть од журналисттнэ.
Валентина Юдина